साझा अस्पताल बुटवलले सञ्चालनमा ल्यायो हेमोडायलासिस सेवा

A+ A A-

बुटवलमा रहेको साझा अस्पताल प्रालिले मिर्गौला रोगीहरूका लागि हेमोडायलासिस सेवा सञ्चालनमा ल्याएको छ । ओम साई पाथिभरा हस्पिटल भद्रपुर झापासँगको सहकार्यमा तीन करोडभन्दा धेरै रुपैयाँको लगानीमा सेवा सुरू गरिएको हो ।

एक कार्यक्रमका बीच अस्पतालका अध्यक्ष एवं मानव अधिकार तथा शान्ति समाजका अध्यक्ष गोबिन्द खनालले सेवाको सोमबार शुभारम्भ गरेका हुन् । मिर्गौलाका बिरामीहरूलाई सुलभ उपचार दिने उद्देश्यले सेवा सुरू गरिएको अध्यक्ष खनालले बताए ।

हाल ८ वटा मेसिनबाट हेमोडायलासिस सेवा सुरू गरेको अस्पतालले भविष्यमा ५० वटा मेसिन पुर्‍यायने लक्ष्य राखेएको अध्यक्ष खनालले बताए । नियमित डायलासिस गराउनुपर्ने विरामीहरूले सर्वसुलभ सेवा पाउन नसक्दा बहिर जानुपर्ने र आर्थिक व्ययभार बढ्ने भएकाले निःशुल्क सेवा उपलब्ध गराउने खनालले बताए ।

सेवालाई पूर्णनिःशुल्कका लागि प्रदेश सरकारको स्वास्थ्य मन्त्रालय समक्ष प्रक्रिया अगाडि बढाइसकिएको अस्पतालका सञ्चालक डा. विनोद पराजुलीले बताए ।

यस्तै अस्पतालले सोमबारदेखि एनआईसीयू र न्यूरो सर्जरी सेवा पनि सुरू गरेको छ । बुटवल क्षेत्रमा नवजात शिशु सघन उपचार केन्द्र (एनआईसीयू) अति कम रहेकाले सो सेवा प्रारम्भ गरिएको डा. पराजुलीले बताए । अत्याधुनिक मेसिनहरू जडित एनआईसीयू सेवाले नवजात शिशुको स्वास्थ्य उपचारमा महत्त्वपूर्ण योगदान पुर्‍याउने विश्वास लिइएको अस्पतालले जनाएको छ ।

अस्पतालमा आईसीयू सेवा अर्थोपेडिक तथा ट्रमा सर्जरी सेवा, न्यूरो सर्जरी सेवा, जनरल तथा ल्यापरोस्कोपी सेवा, पेडियाट्रिक सर्जरी सेवा, ईएनटी सर्जरी सेवा, मेडिसिन सेवा, प्रसुति सेवा, रेडियोग्राफी सेवा, चौबिसै घण्टा इमर्जेन्सी सेवालगायतका विशेषज्ञ सेवाका साथै निःसन्तान दम्पतीका लागि टेस्ट ट्युब बेबी सेवा पनि सञ्चालनमा छन् ।

प्रकाशित मिति: मंगलबार, माघ ४, २०७८ १६:२८