कोरोना जोखिमको सामना गर्न लुम्बिनी तयार छ : मुख्यमन्त्री केसी

A+ A A-

लुम्बिनी प्रदेशका मुख्यमन्त्री कुलप्रसाद केसीले कोरोना महामारीको विपतमा जनताको रक्षा गर्न प्रदेश सरकार तयार रहेको बताएका छन् । कोरोना नियन्त्रण गर्न सरकार सक्षम रहेको रहेको भन्दै उनले जनताको जीवन रक्षा गर्ने प्रतिवद्धता व्यक्त गरे । प्रधानमन्त्री शेरबहादुर देउवालगायत संघीय सरोकारवाला निकायसँग भर्चुअल बैठकमा बोल्दै मुख्यमन्त्री केसीले प्रदेश सरकारले जनउत्तरदायित्त्वकाे काम गरिरहेको बताए ।

उनले भारतबाट नेपाल आउने नाकाको हिसाबले लुम्बिनी प्रदेश मिनी नेपाल भएको बताउँदै जनताको जीवन रक्षाका लागि सम्पूर्ण तयारी रहेको बताए ।

बेलहिया नाका, कृष्णनगर र नेपालगञ्जमा होल्डिङ सेन्टर स्थापना गर्ने काम भइरहेको उनले जानकारी दिए । उनले चुनौति अझै थपिदै जानसक्ने भन्दै बजेट तथा सामाग्री थप सहयोग गर्न प्रधामन्त्री देउवासँग अनुरोध समेत गरेका थिए ।

मुख्यमन्त्री केसीले प्रदेशमा सबै राजनीतिक दल, सरोकारवाला निकायहरूसँग कोरोना नियन्त्रणका लागि आवश्यक समन्वय गरी अगाडि बढेको बताउँदै आवश्यक सहयोग गर्न सबै प्रदेशबासीलाई अनुरोध समेत गरेका छन् । उनले कोरोनाबाट तराइको जिल्लाहरू बढी प्रभावित रहेको र विपतका हिसावले बुटवल, दाङ, गुल्मी, प्यूठान, रोल्पा, पूर्वी रुकुमलगायत पहाडी जिल्लाहरू बढी जोखिममा रहेको बताए । उनले रहेकोले कोरोनासँगै अब गर्मी याममा हुने आगलागी र वर्षा याममा हुने बाढी पहिरो नियन्त्रणका लागि पनि ध्यान दिनुपर्ने बताएका थिए ।

भर्चुअल बैठकमा प्रधामन्त्री शेरबहादुर देउवाले सरकारको पहिलो कार्यभार जनताको स्वास्थ्य बचाउने भएकोले सबै प्रदेशमा त्यसरी नै काम गर्नका लागि निर्देशन दिएको मुख्यमन्त्री केसीका प्रेस संयोजक मानसिंह बिकले जानकारी दिए ।