दुई–दुई वर्षमा नेपाल घुम्न आउने बेल्जियन जोडी

कुराकानी गर्दै करेल र रिता । तस्वीर : अनुप पौडेल/शिलापत्र

A+ A A-

‘त्यो पहाडमा त्यसरी चढ्दा उनीहरू लड्दैनन् ?’

भिरमौरीको मह सिकार भइरहेको पहाडतिर हेर्दै रिता करेलसँग जिज्ञासा राख्छिन् । करेल भेन पेल्ट पनि श्रीमतीसँग बसेर पहिलोपटक मह सिकारको दृश्यावलोकन गरिरहेका थिए ।

मनमा केही प्रश्न आए दुवै आफ्ना गाइड रामसँग बुझ्थे । हिमशृंखलाको मज्जा लिन नेपाल आएको यो जोडी भिर मौरीको मह कसरी काढिन्छ भन्ने धेरथेर जानेर बेल्जियम फर्किएको छ । नेपाल बसाइका दिन नयाँ कुरा जानेर यादगार बनाउन उनीहरू मंसिर मसान्ततिर कास्कीको अन्नपूर्ण गाउँपालिका– ७, लान्द्रुकस्थित कोटेसाङ महभिर पुगेका थिए । दुई हप्ताका लागि नेपाल आएका करेल र रिता डेढ वर्षपछि फेरि आउने योजनासहित स्वदेश फर्किसकेका छन् । उनीहरू नेपाली साथी राम ढुंगानासँग घुम्न र उनको परिवारलाई भेट्न नेपाल आउने गर्छन् ।

तेस्रोपटक नेपाल आएर घुम्दा पनि यो जोडीको धित मरेको छैन । अन्नपूर्ण पदमार्गको लान्द्रुकमा शिलापत्रसँगको भेटमा करेलले भनेका थिए, ‘योपटक आउँदा मुस्ताङ जाने योजना थियो । अब मुस्ताङ जान दुई वर्षपछि फेरि आउँछौँ ।’ उनीहरू सन् २०१८ यता तीन पटक नेपाल आइसकेका छन् । अब सन् २०२३ को मार्चतिर नेपाल आउने यो जोडीको योजना छ । सन् २०१८ यता उनीहरू तीनपटक नेपाल आइसकेका छन् ।

कास्कीको लान्द्रुक, तमु, तमिजुङतलगायत गाउँ हिँडेरै उनीहरूले पछिल्लो नेपाल बसाइ सकाए । अन्नपूर्ण आधार शिविर, मर्दी हिमाल बेसक्याम्प, सगरमाथा बेसक्याम्प पदयात्रा जाने रहर नभएको होइन । तर, बुढ्यौलीले धेरै उचाइमा जान सक्दैनन् । ‘नेपाल आउनु र हिमालय हेर्नु मेरो सपना थियो,’ मुस्कुराउँदै रिता थप्छिन्, ‘तर, बुढ्यौलीले गर्दा हामी हिँडेर सगरमाथा बेसक्याम्पसम्म जान सकेनौँ । त्यसैले नजिकबाट हिमाल हेर्न हामी अन्नपूर्ण क्षेत्रको पदमार्गमा हिँड्ने निधो गर्‍यौँ ।’ करेल ७५ वर्षीय र रिता ७२ वर्षीया हुन् ।

करेल र रितासँग गाइड राम ढुंगाना ।

राम ढुंगाना करेल–रितालाई बाटो देखाउने साथी हुन् । पहिलोपटक सन् २०१८ मा नेपाल आउँदा यो जोडीले रामसँग काठमाडौं, पोखरा, बन्दीपुर र धुलिखेल घुमेको थियो । सन् २०२० मा नेपाल आउँदा अन्नपूर्ण संरक्षित क्षेत्रका गन्तव्य घुमेका थिए ।

यो जोडी नेपाल आफ्नो घर र नेपाली परिवारजस्तै भएको सुनाउँछ । कार्लो भन्छन्, ‘विचित्र देश छ । तेस्रोपटक आएँ । नेपाल आइराख्ने भएकाले आफ्नै घरजस्तो लाग्छ । नेपालीहरू परिवारजस्तै लाग्छ ।’ युरोपका अधिकांश देशमा दुवैले अवकाशपहिल्यै घुमिसकेका थिए । ल्याटिन अमेरिकापछि यो जोडीलाई एसिया घुम्ने रहर जाग्यो । कम्बोडिया, थाइल्याण्ड घुमेका उनीहरू त्यसपछि भुटान घुम्न निस्किए । भुटान घुम्न हिँडेको यो जोडीले ट्राभल एजेन्सीमार्फत नेपालबारे थाहा पाएको हो ।

रितालाई भुटान घुम्न मन थियो । त्यसपछि दुवै बेल्जियमस्थित माई हिमालय नामक ट्रेकिङ एजेन्सीमा पुगे । माई हिमालयले नेपाल र भुटान घुम्न प्याकेज घोषणा गरेको थियो । माई हिमालयका प्रतिनिधि रिकले नेपालबारे सुनाउँदै करेल–रितालाई भुटानसँगै नेपाल घुम्न सुझाए । त्यसपछि दुई हप्ता भुटान र एक हप्तालाई श्रीमान्‌सँगै पहिलोपटक रिता नेपाल आएकी थिइन् । त्यतिबेला उनीहरूसहित चार जना एक हप्ताका लागि नेपाल आएका थिए ।

माई हिमालयमार्फत आउने पर्यटकलाई नेपाल घुमाउने जिम्मा हिमालयन ड्रिम टिमले लिन्छ । त्यतिबेला कास्कीका राम ढुंगाना हिमालयन ड्रिम टिमसँग आबद्ध थिए । पहिलोपटक नेपाल आउँदा राम उनीहरूको गाइड बने । हरेक वर्ष उनीहरू नेपाल आउँदा राम साथमै हुन्छन् । उनलाई यो जोडीले पनि औधी रुचाएको छ । रामलाई कसैले यो जोडीको अगाडि गाइड भन्यो भने रिता प्रतिवाद गरिहाल्छिन् । उनी भन्छिन्, ‘ऊ हाम्रो गाइड होइन, साथी हो ।’

कास्कीको लान्द्रुकमा भएको एक सांस्कृतिक कार्यक्रमको तस्वीर लिँदै करेल ।

बन्दीपुर, पोखरा, काठमाडौं घुमेर सन् २०१८ को एक हप्ता नेपालमा बिताएका थिए । दोस्रोपटक सन् २०२० मा आउँदा कास्कीकै अन्नपूर्ण पदमार्गअन्तर्गतकै गन्तव्य घुमे । रामले आफ्नै गाउँ अन्नपूर्ण गाउँपालिका–८, तमुको बाटोलाई घोरेपानी, पुनहिल जोड्ने ट्रेकिङ रूट बनाएका छन् । दोस्रोपटक नेपाल आउँदा उनीहरू रामले खोलेको तमु–दाङसिङ–मोहरिया हिडन ट्रेक हुँदै उनी पुनहिल पुगेका थिए । ‘त्यतिबेला यो रुट भर्खरभर्खर प्रवर्द्धन हुँदै थियो । उनीहरू पनि शान्त भएको ठाउँ चाहन्थे । त्यो नयाँ रुट देखेर एकदमै खुसी भए,’ रामले सुनाए ।

यसपटक गत अगस्टमा नेपाल आउने योजनामा थिए । तर, कोरोना महामारीले युरोपमा आवातजावत बन्द भएपछि दुई महिनापछि अक्टोबरमा उनीहरू नेपाल आए । मुस्ताङ घुम्ने योजना थाँती राखेर यो जोडी स्वदेश फर्किसकेको छ । ‘मुस्ताङमा एकदमै चिसो भएकाले डिसेम्बरमा जान सकिएन । सन् २०२३ को वसन्त ऋतुमा मुस्ताङ घुम्न आउँछौँ,’ रिताले आफ्नो योजना सुनाइन् ।

करेलले पारिवारिक फर्निचर व्यवसायमा ऊर्जाशील २० वर्ष बिताए । पछि उनले बेल्जियममै स्काई डाइभिङ कम्पनीमा म्यानेजर भएर काम गरे । रिता स्काई डाइभिङ गर्न जाने बेला ३० वर्षअघि करेलसँग भेट भएको थियो । दुवैको दोस्रो विवाह भएको हो । रिता अवकाशप्राप्त नर्स हुन् । ६० वर्ष हुँदासम्म उनले आईसीयूमा ड्युटी गरिन् । जीवनमरणबीच बेडमा छटपटाइरहेका बिरामीको सेवा गरेकी उनी आजकल श्रीमान्‌सँग घुमफिरमा रमाइरहेकी छिन् । ‘मैले २१ वर्षको हुँदा जागिर सुरु गरेकी थिएँ । बच्चा पाउँदा केही महिना बिदा लिएँ । त्यसपछि ६० वर्ष हुँदासम्म निरन्तर काम गरेँ । प्रायः रातमा मेरो ड्युटी पर्थ्यो,’ रिता आफ्नो जागिरे दिन सम्झन्छिन् ।

राम सन् २०११ देखि ट्रेकिङ गाइड भएर घुमफिर गरिरहेका छन् । पर्यटक लिएर देशका चल्तीका सबै रुट पुगिसकेका उनी करेल र रिताको स्वभावबाट निकै प्रभावित छन् । ‘पर्यटक भन्दैमा सबै राम्रो स्वभाव भएका हुन्छन् भन्ने हुँदैन । उनीहरू एकदमै बुझ्ने छन्,’ राम सुनाउँछन्, ‘सानातिना कुराहरूमा गुनासो गर्दैनन् । जे छ, त्यो खान्छन् । एकदमै सहयोगी स्वभाव छ ।’ विद्यालय वा आमा समूहलाई उनीहरू आर्थिक सहयोग पनि गर्छन् ।

करेल र रिता ।

गत मंसिर २१ देखि २३ सम्म अन्नपूर्ण-७, लान्द्रुकमा हनी हन्टिङ फेस्टिबल हुँदै थियो । त्यो थाहा पाएपछि रामले करेल र रितालाई लान्द्रुक लैजाने निधो गरे । भिरमौरीको मह सिकार गरेको हेर्ने र नेपालमा हुने फेस्टिबल भनेपछि उनीहरू निकै उत्साहित भएको राम सुनाउँछन् । २० मंसिरमै रामले दुवैलाई लान्द्रुक पुर्‍याए । भिरमौरीको मह सिकारका लागि उनीहरूले त्यतिबेला २० यूरो सहयोग दिएका थिए । दुई दिन बसेर लान्द्रुक हुँदै उनीहरू फेरि रामको गाउँ तमु पुगे । त्यहाँ बसेर दुवै जना गत डिसेम्बरमा स्वदेश फर्किएका छन् ।

उनीहरूलाई पूरै नेपाल घुमाउने रामको रहर पनि मेटिएको छैन । उपल्लो मुस्ताङ जाने दुवैको रहर पनि अधुरै छ । राम उनीहरूको अर्को भ्रमणको घुमफिर योजना सुनाउँछन्, ‘मुस्ताङ घुमाउँछु भन्ने थियो । माथि जान नसकेकाले यसपालि यही अन्नपूर्ण क्षेत्र मात्रै घुमाएँ । अब अर्कोपटक आउँदा उपल्लो मुस्ताङ घोडा चढाएर घुमाउँछु ।’

प्रकाशित मिति: मंगलबार, माघ ४, २०७८ ०६:३६