मुम्बईका व्यापारीको २३ लाख ठगेर यसरी फरार भइन् डायना

A+ A A-

आफूलाई भीआईपी परिवारकी छोरी बताउँदै २३ लाख ठगी गर्ने एकजना युवती पक्राउ परेकी छन् । महोत्तरीकी २२ वर्षीया डायना सेकेन्डलाई ठगी अभियोगमा अपराध महाशाखाको टोलीले शुक्रबार राति ललितपुरको बालकुमारीबाट पक्राउ गरेको हो ।

महाशाखाका प्रमुख वरिष्ठ प्रहरी उपरीक्षक (एसएसपी) सहकुल थापाका अनुसार उनले भारत मुम्बईका व्यापारी श्रीपाल जैनलाई आफू उच्च घरानाको व्यापारी परिवारकी छोरी बताएर ठगी गरेको उजुरीको आधारमा पक्राउ गरिएको बताए । प्रहरीले जैनबाट ठगी गरेको २३ लाखमध्ये २० लाख रुपैयाँसमेत बरामद गरेको छ ।

यसरी ठगिए जैन

महाेत्तरीकी २२ वर्षीया डायनाले तीन महिनाअघि मुम्बईका व्यापारी श्रीपाल जैनलाई फेसबुकमा साथी बन्न रिक्वेस्ट पठाइन् । डायनाको प्रोफाइल तस्बिर सुन्दर थियो ।

जैनले विस्तृत विवरण नहेरी डायनालाई फेसबुकमा साथी बनाए । फेसबुकमा साथी बन्दा डायना दुबईमा थिइन् । जैन मुम्बईस्थित आफ्नै निवासमा ।

फेसबुकमा साथी बनेपछि उनीहरुबीच नियमित कुराकानी हुन थाल्यो । हेलो हाई बाट सुरु भएको कुराकानीले साथीको रूप लियो । मोबाइल नम्बर साटासाट भयो ।

दुवै जनाले आफ्ना परिवारिक अवस्थाबारे समेत खुलेरै कुरा गर्न थाले । डायना आफू अमेरिकाबाट पढाइ सकेर व्यापारको सिलसिलामा दुबईमा रहेको बताउँथिन् । जैन पनि आफ्नो व्यापारबारे डायनालाई बताउँथे ।

यसरी फेसबुकबाट साथी बनेका उनीहरुबीच विश्वासको वातावरण बन्यो । जैन डायनालाई भेट्न १५ दिनअघि दुबई पुगे । दुबईमा डायनालाई भेटेपछि जैनलाई लाग्यो, साँच्चिकै उच्च व्यापारी घरानाकी छोरी हुन् । डायनाको अंग्रेजी भाषा राम्रो थियो ।

हातको घडी र खुट्टाको जुत्तासमेत उच्च ब्रान्डका थिए । उनी जैनलाई भन्थिन्, ‘मेरो बुबाको सिंगारपुर, दुबई र भारतमा समेत विभिन्न व्यापारिक कम्पनी छन् । भारतमा व्यापार विस्तारका लागि बुबासँग तिमीलाई भेटाउँछु ।’ जैनले नपत्याउने कुरै थिएन ।

जैनले डायनालाई भने, ‘तिमी मेरी बहिनी जस्तै हो । राम्रो मान्छेसँग भेट भयो । बरु केही दिनलाई मेरो घर मुम्बई जाऔं । मेरो व्यापार पनि देखाउँछु ।’

डायना जैनको कुरामा राजी भइन् । उनी एक हप्ताअघि दुबई हुँदै मुम्बई पुगिन् । जैनले घर लगेर बहिनी नाता लगाउँदै श्रीमती र परिवारसँग भेट पनि गराए ।

केही दिन मुम्बई बसेपछि डायना जैनलाई लिएर गत बिहीबार काठमाडौं फर्किइन् । जैनलाई होटलमा राखेर आफू बालकुमारीस्थित कोठामा गइन् । जैनको मनमा शंकाले डेरा जमाउन थाल्यो, ‘व्यापारी घरानाकी बहिनीले आफ्नै घरमा लैजानुको साटो होेटलमा ? त्यो पनि सामान्य ।’

शुक्रबार बिहानै डायनाले जैनलाई फोन गरेर भनिन्, ‘दाइ मेरो दुबईबाट सुन आयो । ४० लाख चाहिएको छ । बुबासँग सम्पर्क हुन सकेको छैन । हजुरले मिलाई दिनुपर्यो ।’

जैनले नेपालमा रहेका आफ्ना व्यापारी साथीबाट शुक्रबार नै २३ लाख खोजेर डायनालाई दिए ।

पैसा कोठामा राखेर मुम्बईको टिकट

शुक्रबार नै २३ लाखमध्ये ३ लाख आफ्ना बुबालाई महाेत्तरी पठाएर डायनाले जैनसँगै मुम्बई जाने गरी २ बजेको टिकट लिइन् । जैनले दिएको २३ लाख मुम्बई पुगेर फिर्ता गर्ने भन्दै जैनलाई आश्वस्त पारिन् ।

अनि विमानस्थलबाटै फरार

मुम्बई जान विमानस्थल पुगेकी डायना विमानस्थलबाट जैनलाई छक्याएर भागेपछि बल्ल जैनले आफू ठगिएको पत्तो पाए । महाशाखाका अनुसार मुम्बई जान जैनलाई नर्मल इमिग्रेसन विभागबाट पठाएर आफू भीआईपी कक्षबाट आउँछु भन्दै उनी भागेकी हुन् । डायना भागेको थाहा पाएपछि जैनले मुम्बईको टिकट रद्द गरी प्रहरी कार्यालय टेकु पुगेर आफू ठगिएको उजुरी गरे ।

त्यही उजुरीका आधारमा डायनालाई शुक्रबार राति प्रहरीले पक्राउ गरेको हो । प्रहरीका अनुसार डायना नियमित दुबई जाने गरेको खुलेको छ । उनले हालसम्म पाँचपटक दुबई आउजाउ गरेको खुलेको महाशाखाका प्रमुख एसएसपी सहकुल थापाले बताए । उनी सामान्य परिवारकी सदस्य भएको थापाले बताए । डायनामाथि ठगी मुद्दामा अनुसन्धान भइरहेको उनको भनाइ छ ।

प्रकाशित मिति: सोमबार, असार ९, २०७६ ०५:५१