दूधकोसी र खुम्बु जोड्‍ने मोटरेबल पुल सञ्चालनमा

A+ A A-

सोलुखुम्बु जिल्लाको माप्य दूधकोसी गाउँपालिका र खुम्बु पासाङ ल्हामु गाउँपालिकाको बीचमा रहेको दूधकोसी वालाङघाटमा मोटरेबल पुल बन्दा खुम्बु क्षेत्रमा घुम्न जाने पर्यटक वृद्धि भएको स्थानीयहरूले बताएका छन् । ४८ मिटर लामो पुल निर्माण भएसँगै यस क्षेत्रमा कृषिजन्य सामग्रीको ढुवानीदेखि घुम्न आउने पर्यटकका लागि सुविधा भएको स्थानीयहरूको भनाइ छ ।

सोलुखुम्बु जिल्लाबाट प्रदेश सांसद रहेका बद्रीकुमार राजभण्डारीले पुल निर्माण सम्पन्न भएर सञ्चालनमा आएसँगै दैनिक उपभोग्य वस्तुको मूल्यमा कमी आएको बताए । सांसद भण्डारीले मोटरेबल पुल बनेपछि खुम्बुमा एक सिलिण्डर खाना पकाउने ग्यासको मूल्य २ हजार ३ सयबाट घटेर १ हजार ९ सयमा आएको बताए । उनले एक क्यारेट अण्डाको मूल्य ७ सय पर्ने ठाउँमा ३ सयमा पाउने अवस्था आएको बताए ।

मोटरेबल पुल निर्माण भएसँगै खुम्बु क्षेत्रका स्थानीय जनताले दैनिक उपभोग्य वस्तुदेखि लिएर लत्ताकपडासमेत सस्तो भएको भन्दै हवाई उडान प्रभावित भएर लुक्ला विमानस्थलमा भिड गरेर बस्नुपर्ने पर्यटकको बाध्यताको अन्त्य भएको उनको भनाइ छ । उनले कोरोना महामारीको कारण घटेको पर्यटकको आगम पुल निर्माण भएसँगै वृद्धि भएको बताए ।

खुम्बु गाउँपालिकाका स्थानीयहरू पनि पुल निर्माण भएर मोटरबाटो सञ्चालनमा आएकोमा खुसी छन् । खुम्बुका स्थानीय गौरव राईले पुल निर्माणले खुम्बुवासीलाई मात्रै नभएर विश्वबाट सगरमाथा आउने पर्यटकका लागि पनि सुविधा भएको बताए । उनले सोलुखुम्बु हिमाली जिल्ला भएको र मौसम परिर्वतन भइरहने भएकाले आवतजावतका लागि हवाई उडानमार्फत गर्नुपर्ने अवस्था रहेको बताए । तर पुल निर्माणले महत्त्वपूर्ण योगदान गरेको बताए ।

खुम्बुमा सडक सञ्चालन नहुँदा यस क्षेत्रको अवस्था एकदमै कठिन रहेको तर पुल निर्माण भएर सञ्चालनमा आएसँगै खुम्बुमा उत्पादन भएका कृषिजन्य वस्तु अन्य स्थानमा लगेर बेच्न सक्ने अवस्था आएको स्थानीयवसीहरूको भनाइ छ ।