प्रशासनले अनुगमन गरेको भन्दै चितवनमा किराना पसल बन्द

A+ A A-

प्रशासनले गरेको अनुगमनको बिरोध गर्दै चितवनका ब्यवसायीले किराना पसल बन्द गरेका छन् । उनीहरूले आइतबार बिहानैदेखि पसल बन्द गरेका हुन् । नारायणगढको पुतलीबजार, लाइन्सचोक लगायतका स्थानहरूमा रहेका किरानाका थोक तथा खुद्रा पसलहरू बन्द गरिएका छन् ।

जिल्ला प्रशासन कार्यालय चितवनले अनुगमनको नाममा आफूखुसी कसुर तोक्दै अधिकतम जरिवाना तोकेको भन्दै विरोधस्वरुप किराना व्यवसायी संघ चितवनले आइतबार र सोमबार व्यवसाय बन्दको घोषणा गरेको थियो ।

संघले शनिबार विज्ञप्ति जारी गरी प्रशासन कार्यालयका प्रतिनिधिले अनुगमनको क्रममा व्यवसायीमाथि धम्कीपूर्ण भाषा प्रयोग गर्दै तत्कालै जरिवाना तिर्न आदेश दिने, जरिवाना नतिरे थुनाउने जस्ता अभिव्यक्ति दिएको भन्दै आपत्ति जनाएको थियो ।

जिल्ला प्रशासन कार्यालय चितवनले अनुगमनको नाममा व्यवसायीमाथि आफूखुसी अधिकतम तीन लाखसम्म जरिवाना लगाएको भन्दै आन्दोलन गर्नु परेको संघका अध्यक्ष रवीन्द्रकुमार श्रेष्ठले जानकारी दिए । अनुगमन गर्ने कुरामा आफूहरूको बिरोध नभएको श्रेष्ठले बताए । उनले भने, ‘अनुगमन गर्नुपर्छ तर एकैपटक अधिकतम जरिवाना तोक्ने कामचै गलत हो।’ उनले एउटा किराना पसल २–३ लाखको नहुने भन्दै ३ लाख जरिवाना कसरी तिर्ने भन्दै प्रश्न गरे । उनले भने, ‘सामान्य कसुरमा कुनै मौका नै नदिई भोलि बिहानसम्म ३ लाख तिर्नु भन्ने उधारो जरिवानाप्रति हाम्रो बिरोध हो।’

अध्यक्ष श्रेष्ठद्वारा जारी गरिएको विज्ञप्तिमा अनुगमनमा उद्योग वाणिज्य संघ , खाद्य , घरेलु तथा किराना व्यवसायी संघका प्रतिनिधिहरू राख्न माग गरिएको छ।