आन्दोलनरत विद्यार्थी र नोबेल मेडिकल कलेजबीच सहमति, अभिभावककाे गुनासाे कायमै

आन्दोलनरत विद्यार्थी र नोबेल मेडिकल कलेजबीच सहमति, अभिभावककाे गुनासाे कायमै

A+ A A-

अतिरिक्त शुल्कको विराेधमा आन्दोलनरत विद्यार्थी र नोबेल मेडिकल कलेजबीच सहमति भएको छ । शनिबार राति विराटनगरमा नोबेल मेडिकल कलेज, विद्यार्थी र अभिभावकबीच सहमति भएको हो ।

सरकारले तोके भन्दा बढी शुल्क लिन खोजेपछि नोबेल मेडिकल कलेजमा एमबीबीएस अध्ययनरत विद्यार्थी आन्दोलनमा उत्रिएका थिए । उनीहरूलाई विद्यार्थी संगठनहरूलेसमेत साथ दिएका थिए ।

विद्यार्थी र कलेजबीच भएको सहमतिपत्रमा कलेज व्यवस्थापन पक्षबाट प्रा.डा. रामहरि धिमिरे र प्रबन्धक नारायणप्रसाद दाहालले हस्ताक्षर गरेका छन् । त्यस्तै आन्दोलनरत पक्षबाट राजेन्द्र बहादुर थापा, प्रकाश फुयाँल, रामकुमार भट्टराई र वीरेन्द्रकुमार झाले हस्ताक्षर गरेका छन् ।

नोबेल मेडिकल कलेजका अस्पताल प्रबन्धक नारायण दाहालले कलेज र आन्दोलनरत विद्यार्थीबीच सहमति भएकाले अब नियमित पठन पाठन र शैक्षिक कार्यक्रम अघि बढ्ने बताए । ‘कलेज र आन्दोलनरत विद्यार्थीबीच सहमति भइसकेको छ’, उनले शिलापत्रसँग भने, ‘अब शैक्षिक गतिविधिहरू नियमित हुनेछन् ।’

आन्दोलनरत विद्यार्थीका अभिभावकहरूले लामो समयसम्म निकास ननिस्किँदा विद्यार्थीको भविष्य अन्यौलमा पर्ने भएकाले सहमतिमा आउन बाध्य भएको बताएका छन् । अभिभावक प्रकाश शर्माले विद्यार्थीको भविष्यलाई मध्यनजर गर्दै सहमति गरिएको दाबी गरे ।

‘विद्यार्थीलाई कति दिनसम्म तनावमा राख्ने भनेर निकास निकाल्न बाध्य भयौँ । अस्ति मन्त्रालयमा छलफल हुँदा पनि निकास निस्केन, निकास निस्किँने अवस्था पनि देखिएन’, उनले शिलापत्रसँग भने, ‘विद्यार्थीलाई कति दिन सडकमा अनाहकमा राख्ने ? जति गर्न सकिन्छ त्यति गरौँ भनेर सहमति गरिएको हो ।’

शर्माले कलेजको एफिलेसन र छात्रावासका विषयमा मात्र मुख्य विवाद रहेकाले प्याकेजमा सहमति गरिएको जानकारी दिए । ‘एफिलेसनको पहिलेकै विवाद थियो । छात्रावासको ८ लाख ८९ हजार बुझाउनु पथ्र्यो’, उनले भने,‘हामीले प्याकेजमा ६ लाख ६० हजारमा सहमति गरेका हौँ ।’

सहमतिसँगै नोबेल मेडिकल कलेजविरुद्ध हुँदै आएको आन्दोलन रोकिने अभिभावकहरूले बताएका छन् ।अतिरिक्त शुल्कविरुद्धको आन्दोलनमा अनेरास्ववियु, नेपाल विद्यार्थी संघ, अखिल क्रान्तिकारी, नेकपा (एकीकृत समाजवादी)काे भ्रातृ संगठन अनेरास्ववियु, समाजवादी विद्यार्थी युनियन मोरङ र चिकित्सा शिक्षा विद्यार्थी आन्दोलन संघर्ष अभियानले साथ दिएका थिए ।

विद्यार्थी संगठनहरूको सहयोगमा पिडित विद्यार्थीहरूले कलेज प्रशासनमा तालाबन्दीसमेत गरेका थिए ।जिल्ला प्रशासन कार्यालय मोरङको निर्देशनमा ११ पुसदेखि पठनपाठन सञ्चालन गरेको कलेज प्रशासनले अतिरिक्त शुल्क नबुझाएको भन्दै १४ पुसदेखि पठनपाठनमा रोक लगाएको थियो । कलेजमा रहेको एक सय विद्यार्थीको कोटामा भर्ना भएका ९६ विद्यार्थीमध्ये नौ जना भारतीय, १० जना छात्रवृत्तिका र पाँच जना अतिरिक्त शुल्क बुझाएका विद्यार्थीलाई पढाइरहेको तर आफूहरूलाई अतिरिक्त शुल्क नबुझाएको भन्दै कलेज प्रवेशमा नै रोक लगाएकाे भन्दै विद्यार्थीहरू सडकमा उत्रिएका थिए ।

प्रकाशित मिति: आइतबार, माघ २, २०७८ ११:४४