तनहुँको जीपी कोइराला उपचार केन्द्रमा हड्डीको सफल शल्यक्रिया

A+ A A-

तनहुँ जिल्लाको शुक्लागण्डकी नगरपालिका–५ स्थित जीपी कोइराला राष्ट्रिय श्वासप्रश्वास उपचार केन्द्रमा हड्डीको सफल शल्यक्रिया भएको छ । अस्पतालले शल्यक्रिया सेवा दिन थालेपछि तनहुँ, गोरखा, लमजुङ र कास्की जिल्लाका केही आसपास क्षेत्रका नागरिकलाई राहत मिलेको छ ।

सामान्य शल्यक्रियाका लागि पोखरा, चितवन र काठमाडौं जानुपर्ने बाध्यताको अन्त्य भएको अस्पतालका निर्देशक डा. रामकुमार श्रेष्ठले जानकारी दिए । हड्डीको सफलरूपमा शल्यक्रिया गर्न थालिएपछि जिल्लावासी खुशी भएका छन् । उनले भने, ‘हप्तामा दुई दिन सोमबार र बिहीबार नियमितरूपमा शल्यक्रिया सञ्चालन गर्दै आएका छौँ ।’

हातको समस्यासहित उपचारका लागि पुगेका बिरामीको शल्यक्रियामार्फत हातमा प्लेट राख्न सफल भएको हो । डा. विद्याभूषण ताम्राकार र डा. रमेश घिमिरेले अस्पतालमा रहेको सिआर्म मेसिनको माध्यमबाट शल्यक्रिया गरेका हुन् । ‘अस्पतालमा अन्य सेवा सुविधा थप गर्ने तयारीमा छौँ’, उनले भने, ‘पछिल्ला समयमा अत्याधुनिक सेवासहितका आधुनिक उपकरण अस्पतालमा जडान गर्ने कार्य गरिएको छ ।’

चालु आवभित्र विशेषज्ञसहितका श्वासप्रश्वाससम्बन्धी उपचार सेवा सुरु गर्ने तयारी भइरहेको डा. श्रेष्ठले बताए । ‘नेपाल सरकार र स्थानीयवासीको सहयोगले काम गर्ने थप ऊर्जा मिलेको छ’, उनले भने, ‘सेवा र सुविधाका दृष्टिकोणले नमूना अस्पतालका रूपमा विकास गर्ने लागिएको छ ।’

गत आवमा नेपाल सरकारबाट सात करोड रुपैयाँ विनियोजन भएकामा अक्सिजन प्लान्ट, एचडीयू बेड, भेन्टिलेटरसहितको आइसीयूकक्ष र आवश्यक भौतिक पूर्वाधार निर्माण गरिएको जीपी कोइराला राष्ट्रिय श्वासप्रश्वास उपचार केन्द्रका लेखा अधिकृत वासुराज दाहालले जानकारी दिए । यसवर्ष पनि ओपीडी भवन निर्माणका लागि एक करोड ५४ लाख रुपैयाँ विनियोजित भएकामा ई–टेण्डर खोलिसकिएको उनले बताए ।

स्व गिरिजाप्रसाद कोइरालाको स्मृतिमा उक्त राष्ट्रिय श्वासप्रश्वास उपचार केन्द्रमा स्थापना गरिएको हो । विसं २०६७ मा तत्कालीन प्रधानमन्त्री माधवकुमार नेपाल नेतृत्वको सरकारले पूर्वप्रधानमन्त्री एवं नेपाली कांग्रेसका पूर्वसभापति गिरिजाप्रसाद कोइरालाको स्मृतिमा राष्ट्रियस्तरको श्वासप्रश्वास उपचार केन्द्र स्थापना गर्ने निर्णय गरेको थियो । सरकारको निर्णयानुसार सोही ठाउँमा रहेको सेतीगङ्गा सामुदायिक अस्पतालको स्वामित्व हस्तान्तरण गरी विसं २०७३ साउन १ गतेदेखि औपचारिकरूपमा श्वासप्रश्वास उपचार केन्द्र सञ्चालनमा ल्याइएको हो ।

प्रकाशित मिति: शनिबार, माघ १, २०७८ १८:२२