राप्रपाको निष्कर्षः सरकार सर्वसत्तावादी

A+ A A-

राष्ट्रिय प्रजातन्त्र पार्टी (राप्रपा)ले सरकारको कार्यशैली सर्वसत्तावाद उन्मुख भएको निष्कर्ष निकालेको छ । पार्टीको केन्द्रीय कार्य समितिको विस्तारित बैठकले सरकार सर्वसत्तावादी भएको निष्कर्ष निकालेको हो ।

बैठकको निर्णय सार्वजनिक गर्दै राप्रपा अध्यक्ष कमल थापाले अनुसन्धान र कारबाही गर्ने निकायलाई प्रधानमन्त्री कार्यालयअन्तर्गत राखेर सरकार शक्तिकेन्द्रित भएको भन्दै चिन्ता व्यक्त गरे ।

मिडिया काउन्सिल विधेयकमार्फत आमसञ्चर माध्यमलाई नियन्त्रणमा लिने र मानवअधिकार आयोगलाई निष्क्रिय बनाउने प्रयास भइरहेको भन्दै उनले भने, ‘प्रधानमन्त्रीले प्रधानसेनापतिलाई समेत बाइपास गरी सेना परिचालनको अधिकार लिन खोज्नु, भ्रष्टाचार बढ्दै जानु, संवैधानिक निकाय, आयोग, प्रशासनलगायतमा क्षमता र योग्यताभन्दा पार्टीप्रति आस्था राख्नेलाई मात्रै नियुक्त गर्नुले सरकारको नियत खराब भएको प्रस्ट हुन्छ ।’

राप्रपाले विवादास्पद गुठी विधेयक फिर्ता नभई पूर्ण खारेजीको माग गरेको छ । संगठित र योजनाबद्ध धर्म परिवर्तन भइरहेकोमा पनि विस्तारित बैठकले चिन्ता व्यक्त गरेको छ । राप्रपाले सरकारलाई बुझाएको २२ बुँदे माग पूरा नभए दोस्राे चरणको संघर्ष सुरु गर्ने चेतावनी दिएको छ ।

पहिलो चरणको जनसंघर्षका सबै कार्यक्रममा उत्साहजनक रुपमा उल्लेख्य जनसहभागिता रहेको निष्कर्ष निकाल्दै दोस्राे चरणको संघर्षलाई अझै सशक्त र प्रभावकारी बनाउने निर्णय बैठकले गरेको छ । राप्रपाले पार्टी एकीकरणका लागि सधैं तयार रहेको जनाएको छ । पार्टी एकताबारे केन्द्रीय समितिमा उठेका प्रश्नको जवाफ दिँदै अध्यक्ष थापाले एकताको सम्झौताको खाका पनि बुझाइसकेकाले यसबारे केन्द्रीय समितिमा बहस गर्नु आवश्यक नभएको बताए ।