भरतपुर अस्पतालमा सुत्केरीको मृत्यु, चिकित्सकले लापर्वाही गरेको आफन्तको आरोप

पूर्वी चितवनको राप्ती नगरपालिका वडा नं ८ की ३३ वर्षीया राधिका थापा सुत्केरी गराउन भरतपुर अस्पतालमा २६ पुसमा भर्ना भइन् । अस्पतालले नर्मल डेलिभरी गराउने भन्दै उनलाई २८ गते बिहानसम्म राख्यो । बिहानसम्म सामान्य अवस्थामा नै राधिकाको साँझ आठ बजेपछि मृत्यु भयो।

राधिकाका दाइ तारा थापाका अनुसार उनी बिहानसम्म सामान्य अवस्थामा नै थिइन् । सुप पनि पिएकी थिइन् । ‘साढे ८ बजेतिर अस्पताल सफा गर्ने क्रममा सबै बिरामी कुरुवा बाहिर गएको बेलामा बहिनीलाई एक्कासी हटएट्याक (डाक्टरको भाषमा पल्मोनरी कोल्याप्स) भएछ’, उनले भने, ‘पछि कुरुवा गएर हेर्दा बहिनी पुरै बेहोस अवस्थामा फेला परेकी थिइन् । त्यहाँ डाक्टर नर्स कोही पनि पुगेका थिएनन् । हाम्रो मान्छे गएर बोलाएपछि बल्ल आएर सीपीआर गराए छन् । तुरुन्तै डाक्टरहरु सबै जना आएर भेन्टिलेटरमा राखे तर बहिनीको ज्यान जोगिएन ।’

घटना भएको एक-डेढ घण्टापछि अस्पताल प्रशासनले मिटिङ बोलाएर गल्ती स्वीकार गरेको थापाले बताए । ‘मेसुलगायतको दुई–तीन जना तथा स्टाफ नर्स र हाम्रो तर्फबाट चार जना मिटिङमा गयौँ । मिटिङमा अस्पतालले गल्ती भएको स्वीकार्न चाहेन । नचाहेपछि हामीले अस्पतालका अध्यक्ष भोजराज अधिकारीलाई बोलाउनुहोस् अनि मात्रै हामी शव उठाउँछौँ, नभए हामी उठाउदैनाैँ भनेपछि डा. अधिकारी आए । अन्तिममा उहाँले गल्ती स्वीकार गर्नुभयो । हामीबाट गल्ती भएको छ । आगामी दिनमा सुधार्छाैँ । हामीबाट मिस्टेक भएकै हो । भन्ने हिसाबले कुरा आयो । माइन्युट पनि गरेका छौँ ।’

जापानमा श्रीमानसहित बस्ने राधिका दशैँ अगाडि नेपाल आएकी थिइन् । श्रीमान भने जापानमै छन् । उनी नियमित रुपमा प्रसुति रोग विशेषज्ञ डा. लोकबहादुर सेढाईसँग जचाउदै आएकी थिइन् । २४ पुसमा डेलिभरी डेट डा. सेढाईंले दिएका थिए । उनकै सल्लाह अनुसार २६ पुसमा अस्पताल भर्ना भएको थापाले बनाए ।

उनले अस्पतालले बहिनीको चेकअपमा लापरवाही गरेको आरोप लगाए । ‘समयमा चेकअप गरिएन । डाक्टर नर्सको भिजिट र मनिटरिङ पनि भएन । २६ गते भर्ना गरेको २८ गतेसम्म पनि नर्मल गराउने प्रयास गरे, जबकी नर्मल हुने स्थिति नि थिएन । चार किलोको बच्चा थियो । मेरो बहिनी सानो स्टक्चरको मान्छे थियो । उसले नर्मल्ली कुनै हालतमा जन्माउने अवस्था थिएन ।’

उनले भने, ‘घर पूरै खुलिसकेको थियो रे पुरै घर खुल्दा पनि त्यो बच्चा निस्कन नसकेपछि त्यो बच्चा रिटर्न भएर त्यसले मुटुमा एट्याक गरेको हुन सक्छ । त्यो अवस्थासम्म ल्याउन अस्पतालको ठूलो गल्ती छ । त्यो अवस्थाबारे डाक्टरलाई थाहा हुनुपर्ने थियो । बच्चा निस्कन सक्दैन अप्रेसनमा लानुपर्छ भन्ने मनिटरिङ हुनुपर्थ्याे । आएर चेकअप र अनुगमन नहुँदा बहिनीको ज्यान गयो ।’

अस्पताल प्रशासनसँगको छलफलमा डिउटीमा खटिँदा लापर्वाही गरेका डाक्टर नर्सलाई छानबिन गरेर कडाभन्दा कडा कारबाही हुनुपर्ने माग राखेको थापाले बताए । तर उनले आर्थिक माग नराखेको बताए । ‘आफ्नो मान्छे नै रहेन त आर्थिकले के गर्नु ?’ उनले भने, ‘जसले ड्युटीमा खटिँदा लापरवाही गरेका थिए । उनीहरुलाई छानबिन गरेर कडाभन्दा कडा कारबाही हुनुपर्छ भन्ने हाम्रो माग हो ।’

भरतपुर अस्पतालका सूचना अधिकारी गोपाल पोडैल बिरामीको चाप धेरै भएकाले बिरामीको अपेक्षा अनुसार चेकअप हुन नसकेको बताउँछन् । सुत्केरी मृत्यु प्रकरणमा पनि आफन्तले भने जस्तै समय समयमा चेकअप हुन नसकेको पौडेलले बताए ।

‘उहाँको पाठेघरको दुई घर मात्रै खुलेकाले चेकअपमा प्राथमिकतामा नपरेको हुन सक्छ । ६ घर माथि खुलेपछि मात्रै नजिकबाट मनिटरिङ हुन्छ । तर उहाँको दुई घर मात्रै खुलेको थियो’, उनले भने, ‘अस्पतालका डाक्टर नर्सको जनशक्ति नै कम छ, सेवाग्राही अपेक्षाअनुसार सेवा दिन सकेका छैनौँ ।’ जनशक्ति कम भएकाले अपेक्षाअनुसार चेकअप नभए पनि हेलचेक्र्याइँ नभएको पौडेलको दाबी छ । मृतक परिवारका आफन्तसँँग भद्र सहमति भइसकेको र शव पनि उठाइसकेको उनले बताए ।

प्रकाशित मिति: बिहीबार, पुस २९, २०७८ १६:५४