शहीद स्मारक ए डिभिजन लिगको आठौँ चरणका खेल शुक्रबारदेखि

A+ A A-

शहीद स्मारक ए डिभिजन लिगमा शुक्रबारबाट आठौँ चरणका खेल हुँदैछन् । बिहीबार आठौँ चरणको खेल अघिको पत्रकार सम्मेलनमा सहभागी सबै जसो क्लबका प्रशिक्षकले सुखद नतिजा निकाल्दै सम्मानजनक स्थानका लागि प्रतिस्पर्धा गर्ने बताएका छन् ।

शुक्रबारबाट त्रिपुरेश्वरस्थित दशरथ रंगशालामा आठौँ चरणका खेल हुँदैछन् । पहिलो खेल अपराजित टोली संकटा क्लब र सातदोबाटो युथ क्लबबीच प्रतिस्पर्धा हुँदा शहीद स्मारक ए डिभिजन लिगमा आठौँ चरणका खेल आरम्भ हुनेछन् ।

नवप्रवेशी सातदोबाटोसँग प्रतिस्पर्धामा उत्रिँदा संकटाले आफ्नो लयलाई निरन्तरता दिन चाहन्छ । सातदोबाटो अघिल्ला खेलमा भोगेको नतिजा सुधार गर्न चाहन्छ ।

दोस्रो खेलमा विभागीय क्लब एपीएफले जावलाखेल युथ क्लबको सामना गर्नेछ ।

जारी सिजनमा शीर्ष स्थानमा रहेको मछिन्द्र क्लब उपाधि होडलाई कायम राख्न तालिकाको पुछारमा रहेको फ्रेन्ड्ससँग प्रतिस्पर्धा गर्दैछ । प्रशिक्षक प्रवेश कटुवालले उपाधि रक्षा गर्ने लक्ष्य भएकाले रेलिगेशनबाट बच्न संघर्ष गरिहेको टोलीविरुद्ध स्वभाविक खेल खेल्ने बताए ।

न्यूरोड टिम एनआरटीले आठौँ चरणको खेलमा विभागीय क्लब त्रिभुवन आर्मीविरुद्ध खेल्दैछ । मध्ययम प्रदर्शन गरेको आर्मीविरुद्ध एनआरटीले अंक बाँड्ने लयलाई भंग गर्न चाहन्छ । एनआरटीका प्रशिक्षक राजुकाजी शाक्यले जित्ने लक्ष्यसहित आफ्नो टोली मैदान उत्रिने बताए ।

यसअघि नै उपाधि होड कठिन भएको बताएको आर्मी पनि एनआटीसँग अंक खोस्ने रणनीतिका साथ मैदान उत्रिनेछ । प्रशिक्षक राजु तामाङले शीर्ष तीनभित्र अटाउनका लागि भए पनि जित्नै पर्ने दबाब भएकाले तीन अंकका लागि खेल्ने बताए ।

लिगअन्तर्गत अंक तालिकाको दोस्रो स्थानमा रहेको मनाङ मर्स्याङ्दी क्लबले शनिबार च्यासल युथ क्लबलाई घरेलु मैदान पोखरा रंगशालामा आतिथ्यता गर्दैछ । मनाङको जारी लिगमा काठमाडौंबाहिर भएको तेस्रो लिग खेल हुनेछ ।

प्रकाशित मिति: बिहीबार, पुस २२, २०७८ १९:५३