बन्द प्रशिक्षणमा फर्किएका ज्ञानेन्द्र मल्लले भने– म सधैँका लागि कप्तान बन्न आएको होइन

बन्द प्रशिक्षणमा फर्किएका ज्ञानेन्द्र मल्लले भने– म सधैँका लागि कप्तान बन्न आएको होइन

A+ A A-

क्रिकेट खेलाडी र नेपाल क्रिकेट संघ (क्यान) को विवाद मिलेसँगै फेब्रुअरीमा ओमानमा हुने ट्वान्टी–२० विश्वकप छनोट खेलका लागि मंगलबारबाट सबै खेलाडी बन्द प्रशिक्षणमा उपस्थित भएका छन् ।

मंगलबारको प्रशिक्षणमा नेपाली राष्ट्रिय टिमका पूर्व कप्तान ज्ञानेन्द्र मल्लसहित अन्य खेलाडी पनि प्रशिक्षणमा सहभागी भएका छन् । कीर्तिपुरस्थित त्रिवि क्रिकेट मैदानमा मंगलबार पत्रकारहरूसँग कुराकानी गर्दै पूर्वकप्तान ज्ञानेन्द्र मल्लले मल्लले आफू सधैँभरि कप्तान बन्नका लागि नआएको बताए ।

उनले सबै विवाद बिर्सिएर अब विश्वकप छनोटमा ध्यान केन्द्रीत गर्ने बताए । वर्गीकरणका विषय पछि सतहमा देखिएको खेलाडी र क्यानबीचको समस्या समाधान भएको उनले बताए । बोर्ड र खेलाडीसँग पहिले नै यसरी छलफल भएको भए यो विवाद यस्तो अवस्था नआउने भन्दै मल्लले बिनाजानकारी कप्तानबाट हटाउँदा दुःख लागे पनि सधैँ कप्तान बन्नुपर्छ भन्ने अडानमा नरहेको बताए ।

मल्लले आत्मसम्मानका हिसाबले अलि अप्ठ्यारो महसुस भएको भन्दै देश, आफ्नो र परिवारका लागि खेल्ने बताए । मल्लले क्यानसँग खेलाडीहरूको प्रोत्साहन भत्ता बढाउने र चार जना खेलाडीलाई गरिएको कारबाही फिर्ताको विषयमा पनि सहमति भएको बताए । उनले इगो बाहिर राखेर नेपाली क्रिकेटको लागि एक ठाउँमा बस्नुभन्दा पनि विगत बिर्सिएर अघि बढ्ने अवस्थामा पुगेका बताए ।

अब विश्वकप छनोट नजिकिँदै गएकाले छनोटमा खेलमा केन्द्रित हुने उनले बताए । सेन्ट्रल कन्ट्रयाक्टमा वर्गीकरणका विषयमा सञ्चारमाध्यममा बोलेका कारण चार खेलाडी ज्ञानेन्द्र मल्ल, दीपेन्द्रसिंह ऐरी, सोमपाल कामी र कमलसिंह ऐरीलाई कारबाही गरिएको थियो । त्यसपछि क्रिकेट संघ र खेलाडीबीचको विवाद उत्कर्षमा पुगेको थियो । क्यानले मल्ललाई जिम्मेवारीबाट हटाउँदै युवा लेग स्पिनर सन्दीप लामिछानेलाई नयाँ कप्तानको जिम्मेवारी दिएको थियो ।