सुरु भयो क्रिकेट टोलीको बन्द प्रशिक्षण, ज्ञानेन्द्रसहित ९ खेलाडी अनुपस्थित

सुरु भयो क्रिकेट टोलीको बन्द प्रशिक्षण, ज्ञानेन्द्रसहित ९ खेलाडी अनुपस्थित

A+ A A-

आगामी फेब्रुअरीमा ओमानमा हुने आईसीसी ट्वान्टी-२० विश्वकप ग्लोबल छनोटका लागि नेपाल क्रिकेट संघ (क्यान) ले ३० खेलाडीलाई बन्द प्रशिक्षणमा बोलाएको थियो । यसअघि क्यानले चार खेलाडीलाई कारबाही गरेपछि गिजोलिएको क्यान र खेलाडीको विवाद अहिले प्रशिक्षणमा देखिएको छ । क्यानले बोलाएका ३० खेलाडीमध्ये पहिलो दिन १६ खेलाडी उपस्थित हुँदा कारबाहीमा परेका चारसहित ९ खेलाडी प्रशिक्षणमा उपस्थित भएनन् ।

नेपाली क्रिकेटले जस्तो उचाइ पाएको थियो त्यो उचाइमा अहिले विभिन्न टिप्पणी हुन थालेका छन् । केही साताअघि मात्र नेपाल क्रिकेट संघ (क्यान) ले खेलाडी अनुशासन भन्दा बाहिर गएको भन्दै गरेको कारबाही अहिले क्रिकेटको अभिभावक संस्था क्यानलाई नै गलपासो भएको छ । यद्यपि क्यान आफ्नो निर्णयमा अडिक नै छ । खेलाडी संस्था गलाउने अनेक जुत्ति अपनाइरहे पनि क्यान गल्न सकेको छैन ।

क्यानले फेब्रुअरीमा ओमानमा हुने आईसीसी ट्वान्टी–२० विश्वकप ग्लोबल छनोटका लागि कारबाहीमा परेका चार खेलाडीसहित ३० खेलाडीको सूची तयार पारेर बन्द प्रशिक्षणमा डाक्यो । सोमबार मैदानबाट अभ्यास थाल्ने तयारी गरेको टोलीमा १६ खेलाडी उपस्थित हुँदा कारबाहीमा परेका चारसहित ९ खेलाडी प्रशिक्षणमा उपस्थित भएनन् । सन्दीप लामिछाने विगबासमा भएकाले उनको उपस्थिति सम्भव भएन । घोषणा गरेकामध्ये पहिलो दिन अभ्यासमा १६ खेलाडी उपस्थित भएको र अन्य केही दिनमा जोडिने नेपाल टोलीका मुख्य प्रशिक्षक पुबुदुले बताए ।

पहिलो दिनको प्रशिक्षणमा १४ खेलाडी मैदानमा उपस्थित हुँदा बाँकी ६ जना खेलाडीको पीसीआर परीक्षण बाँकी रहेकाले होटलै छन् । बाँकी ९ खेलाडीले आज साँझसम्म रिर्पाेटिङ गर्ने मुख्य प्रशिक्षक पुबुदु दसानायकेले जानकारी दिए । सोमबार पत्रकारहरुसँग कुराकानी गर्दैै प्रशिक्षक पुबुदुले क्रिकेट एसोसिएसन र खेलाडीबीचको छलफल निकै सकारात्मक भएको र राष्ट्रिय टोलीको तयारी भएकाले बोलाएका खेलाडी उपस्थित हुनेमा आशावादी रहेको बताए ।

दशानायकेले पछिल्लो समय बोर्डले आफूलाई निकै सहयोग गरेको भन्दै पछिल्लो समस्याको समाधान हुने विश्वास पनि व्यक्त गरे । प्रशिक्षक पुबुदुले कप्तान सन्दीप लामिछाने नै रहेको भन्दै अहिले विधागत कप्तानको कुरा आफूलाई जानकारी नभएको बताए । पहिलो दिनको अभ्यासमा उपस्थित खेलाडीले फिटनेस लागि अभ्यास गरेका छन् ।

ट्वान्टी–२० विश्वकपको ग्लोबल छनोट अन्तर्गत समूह ‘ए’ को खेल सन् २०२२ फेब्रुअरी १५ देखि २५ सम्म ओमानमा आयोजना हुनेछ । समूह ‘ए’ मा नेपालसँगै आयोजक ओमान, आयरल्याण्ड,यूएई, फिलिपिन्स, जमर्नी, क्यानडा र बहराइन रहेका छन् । समूहको शीर्ष दुई टोलीले अस्ट्रेलियामा हुने ट्वान्टी–२० विश्वकपमा स्थान बनाउनेछन् ।

प्रकाशित मिति: सोमबार, पुस १९, २०७८ १६:०२