ज्ञानेन्द्रसहित १४ खेलाडीले बन्द प्रशिक्षणमा बस्न अझै गरेनन् हस्ताक्षर, क्यानले निर्णय नसच्याए नबस्ने

ज्ञानेन्द्रसहित १४ खेलाडीले बन्द प्रशिक्षणमा बस्न अझै गरेनन् हस्ताक्षर, क्यानले निर्णय नसच्याए नबस्ने

A+ A A-

नेपाल क्रिकेट संघ (क्यान) ले बन्द प्रशिक्षणका लागि बोलाएका ३० खेलाडीमध्ये १४ जना खेलाडी अनुपस्थित भएका छन् ।

खेलाडी वर्गीकरणका विषयमा असन्तुष्टि जनाउँदा कारबाहीमा परेका तत्कालीन क्याप्टेन ज्ञानेन्द्र मल्ल, दीपेन्द्रसिंह ऐरी, सोमपाल कामी, कमलसिंह ऐरीसहित १४ जना खेलाडी बन्द प्रशिक्षणका लागि उपस्थित भएका छैनन् ।

फागुनबाट हुने आईसीसी टी-२० विश्वकप छनोटका लागि क्यानले खेलाडीहरूलाई सोमबारबाट बन्द प्रशिक्षणमा बोलाएको थियो । तर, क्यानले कारबाही गरेका चार खेलाडीबाहेक अन्य १० खेलाडी समेत अनुपस्थित भएका छन् । क्यानविरुद्ध सार्वजनिक रूपमा बोलको भन्दै यसअघि नै क्यानले मल्ललाई क्याप्टेनबाट र दीपेन्द्र ऐरीलाई उपकप्तानबाट हटाएको थियो ।

मल्लको ठाउँमा क्यानले सन्दीप लामिछानेलाई कप्तानीको जिम्मा दिएको छ । त्योसँगै क्यानले चारै जना खेलाडीलाई ६ महिना तलब नदिने निर्णय गरेको थियो । कारबाहीमा परेका एक खेलाडीले क्यानले आफ्नो निर्णय नसच्याएसम्म बन्द प्रशिक्षणमा सहभागी हुने बताए ।

ती खेलाडीका अनुसार, क्यानले बोलाएका ३० खेलाडीमध्ये विनोद भण्डारी, कुशल भुर्तेल, करण केसी, रोहितकुमार पौडेल, अविनाश बोहोरासहित १४ खेलाडी अनुपस्थित छन् । नवनियुक्त प्रशिक्षक पुबुदु दसानायके नेपाल जिम्मेवारी सम्हाल्न आएलगत्तै ३० खेलाडीलाई बन्द प्रशिक्षणमा बोलाइएको थियो ।

यी हुन् बन्द प्रशिक्षणमा बोलाइएका ३० खेलाडी

सन्दीप लामिछाने (कप्तान), ज्ञानेन्द्र मल्ल, दीपेन्द्रसिंह ऐरी, शरद भेष्वाकर, सोमपाल कामी, करण केसी, मोहम्मद आरिफ शेख, सुसन भारी, पवन सराफ, विक्रम सोब, विनोद भण्डारी, कुशल मल्ल, कुशल भुर्तेल र मोहम्मद आसिफ शेख छन् ।

त्यस्तै कमलसिंह ऐरी, सहाब आलम, सन्दीप जोरा, अविनाश बोहरा, भीम सार्की, राजेश पुलामी मगर, किशोर महतो, सागर ढकाल, हरिशंकर साह, रोहितकुमार पौडेल, प्रदीप ऐरी, गुल्सन कुमार झा, नन्दन यादव, जितेन्द्रकुमार मुखिया, विवेककुमार यादव र सौरभकुमार खनाललाई बन्द प्रशिक्षणमा बाेलाइएकाे छ ।

प्रकाशित मिति: आइतबार, पुस १८, २०७८ १६:२०