माओवादीले संशोधन गर्‍यो निर्वाचन कार्यतालिकाः भोलि २ बजे उम्मेदवारी दर्ता, ६:२५ देखि मतदान

माओवादीले संशोधन गर्‍यो निर्वाचन कार्यतालिकाः भोलि २ बजे उम्मेदवारी दर्ता, ६:२५ देखि मतदान

A+ A A-

नेकपा (माओवादी केन्द्र) को आठौँ महाधिवेशनको बन्दसत्र अन्तर्गत निर्वाचन कार्यतालिका संशोधन गरिएको छ । माओवादीको केन्द्रीय निर्वाचन आयोगका अध्यक्ष विष्णुपुकार श्रेष्ठले संशोधित कार्यतालिका प्रकाशित गरेका छन् ।

संशोधित कार्यतालिकाअनुसार भोलि (आइतबार) दिउँसो २ बजेदेखि साढे ३ बजेसम्म उम्मेदवारको मनोनयन दर्ताको समय तोकिएको छ ।

कार्यतालिकाअनुसार उम्मेदवारको मनोनयन पत्र दर्ता सूची ३:४० मा प्रकाशित गरिने छ भने दिउँसो ४ बजे उम्मेदवारको विरोधमा उजुरी दिने समय तोकिएको छ ।

आयोगका अनुसार ४:४० मा उम्मेदवारको नामावली पुनः प्रकाशन, साढे ५ बजे उम्मेदवारी फिर्ता र ५:४५ मा उम्मेदवारको अन्तिम नामावली प्रकाशनको समय निर्धारण गरिएको छ ।

त्यस्तै ६:२५ देखि १०:२५ सम्म मतदानको समय निर्धारण गरिएको श्रेष्ठले जनाएका छन् ।

आज साँझ निर्वाचनको प्रक्रिया सुरु भए पनि सहमतिका आधारमा केन्द्रीय समिति चयन गर्ने भन्दै बन्दसत्र स्थगन गरिएको हो ।

महाधिवेशनस्थल कमलादीमा आज साँझको बन्दसत्रलाई सम्बोधन गर्दै अध्यक्ष पुष्पकमल दाहाल ‘प्रचण्ड’ले सहमतिका आधारमा केन्द्रीय समिति चयनका लागि गृहकार्य भइरहेको भन्दै थप गृहकार्य गर्नुपर्ने भएकाले बन्दसत्र आइतबारसम्मका लागि स्थगन गर्ने प्रस्ताव गरेका थिए । प्रचण्डको प्रस्तावअनुसार आजका लागि निर्धारित सबै प्रक्रिया भोलिसम्मका लागि स्थगित गरिएको हो ।

महाधिवेशनले केन्द्रीय कमिटी, केन्द्रीय कमिटीले पोलिटव्यूरो, स्थायी कमिटी र पदाधिकारी चयन गर्ने माओवादीले जनाएको छ । पोलिटव्यूरो, स्थायी कमिटी र पदाधिकारी समावेशी सिद्धान्तका आधारमा चयन हुने प्रावधान राखिएको छ ।

प्रकाशित मिति: शनिबार, पुस १७, २०७८ २०:५०