मनाङ ‘ए डिभिजन लिग’ को शीर्ष स्थानमा

A+ A A-

घरेलु मैदानमा बिग्रेड ब्वाइज क्लब (बीबीसी) माथि १–० को जित निकाल्दै मनाङ मर्स्याङ्दी क्लब ‘शहीद स्मारक ए डिभिजन लिग’ फुटबलको शीर्ष स्थानमा उक्लिएको छ ।

घरेलु मैदान पोखरा रङ्गशालामा आज आफ्नो दोस्रो खेलमा मनाङले बीबीसीमाथि कठिन र सङ्घर्षपूर्ण जित निकाल्दै लिगको अङ्क तालिकाको पहिलो स्थानमा उक्लिन सफल भयो । यससँगै मनाङले एएफसी कप छनोट खेल्ने सम्भावना पनि कायमै राखेको छ ।

घरेलु मैदानमा दोस्रो खेल खेल्ने क्रममा मनाङलाई बीबीसीले दबाबमा राखेको थियो । पहिलो हाफको इन्जुरी समयमा मनाङले कप्तान अञ्जन विष्टको गोलमार्फत खेलमा अग्रता बनायो ।

मनाङका विदेशी खेलाडी दयानन्न सिंहको पासमा खेलको ‘म्यान अफ दी म्याच’ घोषित विष्टले हेडमार्फत गोल गर्दै टोलीलाई महत्वपूर्ण तीन अङ्क दिलाए । यसअघि खेलको १५औँ मिनेटमा बीबीसीले अग्रता बनाउने सुन्दर मौका खेर फाल्यो । मनाङका डिफेण्डर आदित्य चौधरीले बीबीसीका शिशिर लेखीलाई फल गरेपछि रेफ्रीले पेनाल्टीको अवसर दिएकामा लेखीको पेनाल्टी प्रहार पोष्टमाथिबाट आकाशियो ।

घरेलु मैदानमा मनाङले आफ्नो स्वभाविक खेल प्रस्तुत गर्न नसक्दा खेल अवधिभर दबाबमा परेको थियो । बीबीसीले दोस्रो हाफमा पनि गोलका सुन्दर मौका सिर्जना गरे पनि सदुपयोग गर्न सकेन । मनाङ बीबीसीसँगको खेल जित्नै पर्ने दबाबमा थियो । एएफसी कपमा सहभागिता जनाउने आफ्नो गणितीय सम्भावना कामयै राख्नसमेत आजको खेल जित्नै पर्ने दबाबमा थियो मनाङ । लिगको छैटौँ चरणको खेलमा मछिन्द्र फुटबल क्लबसँग पराजित भएपछि मनाङको एएफसी कपमा छनोट हुने सम्भावना कमजोर बनेको थियो ।

बीबीसीसँगको खेलपछि मनाङ १६ अङ्कसहित लिगको अङ्क तालिकाको शीर्ष स्थानमा रहेको छ । मनाङभन्दा एक खेल कम खेलेको मच्छिन्द्र फुटबल क्लब १४ अङ्कसहित दोस्रो स्थानमा छ । मनाङको ध्यान बीबीसीसँगको खेलपछि अब मछिन्द्र र नेपाल पुलिस क्लबबीच आइतबार हुने खेलमा हुनेछ । पुलिससँग मछिन्द्र पराजित वा बराबरी खेलेको अवस्थामा मनाङले नेपालको प्रतिनिधित्व गर्दै एएफसी कपमा सहभागिता जनाउने छ । मछिन्द्र विजयी भएको अवस्थामा भने मनाङको एएफसी खेल्ने सम्भावना अन्त्य हुनेछ । मछिन्द्र एएफसीका लागि छनोट हुनेछ ।

खेलपछि पत्रकार सम्मेलनमा मनाङका प्रशिक्षक राजेन्द्र तामाङले टिमले स्वभाविक खेल खेल्न नसकेको स्वीकार गरे । आफ्नो टोलीलाई भाग्यले ठूलो साथ दिएको र खेल जितको बताउँदै उनले योजनाअनुसार खेल्न नसकेको र तालमेल नमिलेको बताए । खेल जस्तो भए पनि तीन अङ्क जोड्न पाउँदा उनले खुसी व्यक्त गरे ।

बीबीसीका प्रशिक्षक सनोज श्रेष्ठले पहिलो र दोस्रो हाफमा दुवैमा राम्रो खेलेर गोल गर्ने मौका पाए पनि सदुपयोग गर्न नसकेको बताए । पेनाल्टी सदुपयोग गर्न नसक्नु र दुई वटा बल पोलमा लाग्नु टोलीका लागि दुर्भाग्य भएको उनले बताए ।

जारी लिगका तीन खेल मनाङले आफ्नो घरेलु मैदान पोखरामा खेल्ने तालिका रहेकामा यसअघि नेपाल पुलिस क्लबसँग खेलिसकेको छ । मनाङ पुलिससँग ३–१ गोल अन्तरले विजयी भएको थियो । मनाङले अब आगामी पुस २४ गते च्यासल युथ क्लबसँग पोखरामा खेल्नेछ ।

प्रकाशित मिति: शनिबार, पुस १७, २०७८ १८:४३