जयगढ-रामारोशन सडक कालोपत्रेमा ढिलाइ, सम्झौता अवधिमा निर्माण सकिनेमा स्थानीयको शंका

जयगढ-रामारोशन सडक कालोपत्रेमा ढिलाइ, सम्झौता अवधिमा निर्माण सकिनेमा स्थानीयको शंका

A+ A A-

जयगढ-रामरोशन सडक खण्ड कालोपत्रेमा ढिलाइ भएको छ । सडक खण्डको बान्नीगढी जयगढ गाउँपालिका जयगढ बजारदेखि दर्नासम्मको कालोपत्रे गर्न ढिलाइ भएको हो ।

ठेकेदार कम्पनी बज्रगुरु कन्स्ट्रक्सनको ढिलासुस्तिका कारण योजनाले गति लिन सकेको छैन । पूर्वाधार विकास कार्यालय अछामले ९ मिटर चौडाइको १२ किमि लामो सडक कालोपत्रे गर्न १९ कात्तिक २०७६ मा २४ करोड, ७७ लाख, ९० हजार ३६९ रुपैँयामा ठेक्का सम्झौता गरेको थियो । सम्झौताअनुसार बज्रगुरु कन्स्ट्रक्सनले १७ असार २०७९ सम्म कालोपत्रे गरिसक्नुपर्ने छ ।

सम्झौताको समय सकिन ६ महिना बाँकी रहदा कन्स्ट्रक्सनले ५० प्रतिशत काम पनि सकेको छैन । सडक कालोपत्रे गर्न ढिलाइ भएको स्थानीयको गुनासो छ । निर्धारित समयमै काम सम्पन्न हुनेमा धेरैले शंका व्यक्त गरेका छन् ।

यो सडक सुदूरपश्चिम प्रदेशको पर्यटकीय क्षेत्र रामारोशनको प्रवेश बिन्दु हो । सडक फराकिलो बनाउन कटिङ गरिएको ठाउँलगायत विभिन्न स्थानमा पहिरो गएको छ । पहिरो, हिलो तथा धुलोका कारण रामारोशन जाने पर्यटकलाई सास्ती हुने गरेको छ ।

कालोपत्रे गर्न ढिलाइ हुँदा पर्यटन क्षेत्र पनि प्रभावित बनेको स्थानीय लक्ष्मण साउँद बताउँछन् । कम्पनीले २ महिना काम गरेर ६ महिना काम रोक्ने गरेको साउँदको भनाइ छ ।

योजनाअनुसार सडक निर्माण गर्दा जयगढदेखि माझेठानासम्म करिब २५ वटा घर तथा टहरा भत्काउनु पर्ने बताइएको छ । सडक क्षेत्रमा पर्ने जयगढ गैरिबजारका ५ वटा, एक्लेसल्लाका ५, बाच्कोट पटाकानिका ३, बिर्खम बजारका ५, माझेठानका ६ वटा घर टहरा भत्काउनुपर्ने देखिएको छ ।

घर टहरा हटाउनेबारे कुरा भएको छैन : प्रभावित

सडक क्षेत्रभित्र पर्ने घर टहरा भत्काउनेबारे निर्माण कम्पनीले आफूहरूसँग परामर्श नगरेको प्रभावितहरूको गुनासो छ । सल्लाह नै नगरी घर टहरा हटाउने सूची तयार गरिएको भन्दै स्थानीय तपेन्द्र साउँदले आक्रोश पोखे ।

मापदण्डअनुसार सडक क्षेत्रभित्र घर टहरा परे हटाउन तथा व्यवस्थापन गर्न एक पटक घरधनीसँग सरसल्लाह गर्नुपर्ने साउँदको भनाइ छ । प्रभावित तथा जग्गा दातासँग सल्लाह नगरी घर टहरा भत्काउन नहुने उनी बताउँछन् ।

एक्लेसल्लामा व्यवसाय गर्दै आएका कमलराज तिमिल्सैनाले पनि घर भत्काउनेबारे आफूहरूसँग सल्लाह नगरिएको बताए । मापदण्डअनुसार घर टहरा भत्काउनुपर्ने भए पनि गाउँपालिका, निर्माण कम्पनी, सडक विभाग र पूर्वाधार विकास कार्यालयले आफूहरूसँग सल्लाह गर्नुपर्नेमा त्यसो नगरिएको उनको भनाइ छ ।

कोरोनाका कारण लामो समय निषेधाज्ञा लागेकाले सडक निर्माणमा ढिलाइ भएको साइट प्राविधिक उज्वल केसीको भनाइ छ । कोरोनाका कारण कामदारहरू बिदामा बसेको तथा घर टहरा समयमै भत्काउन सरोकारवालाले चासो नलिएकाले ढिलाइ भएको उनी बताउँछन् ।

जेठभित्र पिच गरिसक्छौँ : बस्नेत

ठेकेदार कम्पनीका बोर्ड डाइरेक्टर नरेन्द्र बस्नेत जेठसम्म पिचको काम सक्ने दाबी गर्छन् ।

यसअघि कोरोना तथा कैलाश खोलामा आएको बाढीले काममा ढिलाइ भएको बताउदै बस्नेतले जेठसम्ममा कालोपत्रेको गर्ने दाबी गरे । वर्षा यामसँगै सडकमा पहिरो आउदा काम प्रभावित बनेको उनको भनाइ छ ।

प्रकाशित मिति: शनिबार, पुस १७, २०७८ १९:१६