चलचित्र ‘कठपुतली’ ले पायो दर्शकको राम्रो साथ

A+ A A-

शुक्रबारबाट प्रदर्शनमा आएको फिल्म ‘कठपुतली’ ले दर्शकको राम्रो साथ पाएको छ । प्रदर्शनको पहिलो दिन राजधानीका मल्टीप्लेक्समा फिल्मले ८० प्रतिशतको आसपास अकुपेन्सी कायम गरेको वितरक कम्पनीले जानकारी दिएको छ ।

शुक्रबारको ओपनिङ सुखद भएपछि काठमाडौंका मल्टीप्लेक्सले शनिबारका लागि फिल्मको शोमा भारी वृद्धि गरेका छन् । नेपालको सबैभन्दा ठूलो मल्टीप्लेक्स चेन क्यूएफएक्सले शुक्रबारका लागि १४ शो दिएको थियो । शुक्रबारको व्यापार राम्रो भएपछि शनिबारका लागि २२ शो उपलब्ध गराएको छ । राजधानीका अन्य मेजर मल्टीप्लेक्सले पनि शनिबारलाई शो बढाएका छन् । सिंगल थिएटरमा पनि फिल्म हेर्ने दर्शकको उपस्थिति सुखद रहेको छ ।

शुक्रबार राजधानीका विभिन्न हलमा पुग्दा फिल्म हेरेका दर्शकले उत्कृष्ट प्रतिक्रिया दिएका थिए । पहिलो पटक स्तरीय नेपाली हरर फिल्म हेर्न पाएको बताउँदै दर्शकहरुले कलाकारको अभिनय, कथावस्तु, निर्देशन, छायांकन, ब्याकग्राउन्ड स्कोरलगायतको प्रशंसा गरेका थिए । हलमा विशेषगरी तन्नेरी पुस्ताको उपस्थिति बाक्लो देखिन्थ्यो ।

फिल्मका निर्माता पृथ्वी राना मगरले चिसोको प्रवाह नगरी फिल्म हेर्न बिहानैदेखि हलमा दर्शकको उत्साहजनक उपस्थिति भएको देख्दा खुसी लागेको बताए । भिमसेन थापाले निर्देशन गरेको फिल्ममा मिथिला शर्मा, गौरी मल्ल, कर्मा, उषा रजक, शिल्पा मास्के, सुवर्ण थापा, ध्रुव कोइरालालगायतको मुख्य भूमिका छ । अष्ट्रेलियाका छायाकार जोएल फ्रूम खिचेको फिल्मको सह–निर्मातामा विशाल गुरुङ, धर्म श्रेष्ठ र हेम थापा छन् । सम्पदा मल्लले लेखेको फिल्मले राजाको शासनकालको कथा भन्छ ।

प्रकाशित मिति: शुक्रबार, पुस १६, २०७८ १८:४२