माओवादी केन्द्रमा दुई धार: माधव नेपालसँग एकता गर्ने कि विप्लवलाई भित्र्याउने ?

माओवादी केन्द्रमा दुई धार: माधव नेपालसँग एकता गर्ने कि विप्लवलाई भित्र्याउने ?

A+ A A-

नेकपा माओवादी केन्द्रभित्र पार्टी एकता र सहकार्यको सन्दर्भमा दुई धार देखिएको छ । ती दुईधार निरन्तर सक्रिय पनि छन् । आउँदो निर्वाचनसम्म देखिने परिणाम ल्याउनुपर्ने प्रयासमा देखिन्छन् ।

माओवादी केन्द्र स्रोतका अनुसार माओवादीभित्रको एउटा धारले पूर्वमाओवादी घटक एकसाथ हुनुपर्ने प्रयासमा बढ्ता जोड दिइरहेको छ । त्यसको नेतृत्व नेता कृष्णबहादुर महराले गरेका छन् । महरा पूर्वमाओवादी नेताहरू मोहन वैद्य, नेत्रविक्रम चन्द विप्लव र गोपाल किराँतीसम्मलाई मिलाउने प्रयासमा छन् । त्यसका लागि अनौपचारिक संवादहरू भइरहेका पनि छन् ।

माओवादीको महाधिवेशनभन्दा पहिला नै विप्लवलाई भित्र्याउने प्रयासमा महरा देखिन्थे । माओवादी केन्द्रको राष्ट्रिय सम्मेलनले विप्लवलाई बाटो खोल्ने गरी राजनीतिक प्रतिवेदन आउने चर्चा पनि गरिएको थियो । प्रचण्डको आत्मालोचनाले त्यसलाई बल दिएको माओवादी नेता-कार्यकर्ताको बुझाइ पनि देखिन्छ ।

प्रचण्डको प्रतिवेदनमाथि विप्लव स्वयम्‌ले चाहिँ अहिलेसम्म कुनै धारणा सार्वजनिक गरेका छैनन् । विप्लव नेतृत्वको पार्टी नेकपाका एक नेताले शिलापत्रसँगको कुराकानीमा विप्लवले प्रचण्डसँग एकताभन्दा पनि मोर्चाबन्दीमा बढ्ता जोड दिएका छन् । ती नेताका अनुसार, आन्तरिक प्रशिक्षणमा विप्लवले प्रचण्डसँग मोर्चाबन्दीमात्रै हुने तर तत्काल पार्टी एकता नहुने बताउने गरेका छन् ।

उनले एकतै नहुने भनेर ठोकुवा भने कार्यकर्ताहरूलाई गरेका छैनन् । त्यही सन्दर्भमा विप्लव नेतृत्वको नेकपाका नेता धर्मेन्द्र बाँस्तोला बृहत् समाजवादी केन्द्र बनाउने कुरामा सहमति हुनसक्ने चाहिँ बताउँछन् । बाँस्तोलाले शिलापत्रसँग भने, ‘हामी अहिले बृहत् समाजवादी केन्द्र बनाउनुपर्छ भन्ने प्रयासमा छौँ । त्यसमा प्रचण्ड, माधव नेपाल सबै नेताहरू सामेल हुने हो ।’

पूर्वमाओवादी घटकहरूबीच एकता गर्ने सन्दर्भमा महराको पहलसँगै माओवादीभित्र अर्को पहल चाहिँ एकीकृत समाजवादीसँग एकतामा जोड दिनुपर्ने तर्क गरिरहेका छन् । संसदीय राजनीतिबाटै शक्ति आर्जन गर्ने हो भने माधव नेपाल नेतृत्वको समाजवादी पार्टीसँग एकता पहिलो प्राथमिकतामा हुनुपर्ने तर्क गरेका छन् । यो धारमा नारायणकाजी श्रेष्ठलगायतका नेताहरू सक्रिय रहेको माओवादी स्रोतको दाबी छ ।

स्रोतका अनुसार माओवादीभित्रको यो धारले नेता नेपालले नेतृत्व गरेको पार्टीसँग एकता गर्दा संसदीय राजनीतिमा बलियो बन्ने सम्भावना रहेको विश्लेषण गरिरहेका छन् । माओवादीभित्र चलेको चर्चा अनुसार चाहिँ माओवादीले रातारात राष्ट्रिय सम्मेलनलाई महाधिवेशनमा परिणत गर्नुको कारण पनि नेता नेपाल नेतृत्वको एकीकृत समाजवादी पार्टीसँग एकता तत्कालका लागि टरेका कारणले भएको हो ।

अहिले राष्ट्रिय सम्मेलन गरेपछि ९ महिनापछि महाधिवेशन गर्नैपर्ने बाध्यता हुन्थ्यो, त्यो अहिले राष्ट्रिय सम्मेलन गर्ने र त्यतिबेला एकताको महाधिवेशन गर्नेसम्मको अनौपचारिक सन्देश माओवादी नेताहरूसम्म पुगेको थियो । शिलापत्रसँगको भेटमा ती नेताले नेपालसँगको एकता तत्काललाई टरेकै करण राष्ट्रिय सम्मेलनलाई महाधिवेशनमा ढालिएको दाबी गरेका छन् ।

ती नेताका अनुसार असोजमा माओवादीले जिल्ला तहसम्म एकीकृत समाजवादीका नेताहरूलाई माओवादीमा प्रवेश नगराउन र माओवादीका नेता-कार्यकर्तालाई पनि एकीकृत समाजवादीले प्रवेश नगराउने सहमति भएको र त्यसैअनुसार गर्नु भनेर सर्कुलर नै जारी भएको थियो । अहिले माधव नेपाल भने एमालेका असन्तुष्ट नेताहरूलाई एकता प्रक्रियामा जोडेर पार्टीलाई बलियो र व्यवस्थित बनाउने प्रयासमै जुटेका छन् ।

प्रकाशित मिति: शुक्रबार, पुस १६, २०७८ १६:१८