माओवादीको केन्द्रीय सदस्य छान्ने जिम्मा प्रदेशलाई, महासचिव केन्द्रीय कमिटीले छान्ने

माओवादीको केन्द्रीय सदस्य छान्ने जिम्मा प्रदेशलाई, महासचिव केन्द्रीय कमिटीले छान्ने

A+ A A-

माओवादीले केन्द्रीय सदस्यको चयनको जिम्मा प्रदेश कमिटीलाई दिन लागेको छ । प्रदेश कमिटीले सिफारिस गरेका नेताहरूलाई महाधिवेशनको हलले केन्द्रीय सदस्यमा मनोनीत गर्ने तयारी भइरहेको छ ।

माओवादी नेताहरूले दिएको जानकारी अनुसार हरेक प्रदेशलाई केन्द्रीय सदस्यको संख्या तोकिनेछ र तोकिएको संख्यामा क्लष्टरसमेत मिलाएर पठाउनुपर्नेछ । त्यसरी पठाएको नाममा महाधिवेशनको हलमा प्रस्तुत हुनेछ । माओवादी केन्द्रका भूगोल र गैरभूगाल गरेर ९ वटा प्रदेश छन् । ती हरेक प्रदेशलाई संख्या दिइनेछ ।

प्रदेशगत सूची तयार गर्नका लागि निश्चित मोडालिटी तयार गरिनेछ । क्लष्टरवाइज सूची तयार गर्ने मोडालिटीका लागि देव गुरुङको नेतृत्वमा समिति पनि बनिसकेको छ । त्यस समितिमा जनार्दन शर्मा, शक्ति बस्नेत, विष्णुपुकार श्रेष्ठ, गिरिराजमणि पोखरेललगायतका नेता रहेका छन् ।

उनीहरूले अहिलेसम्म उक्त मोडालिटीलाई अन्तिम रूप दिएका छैनन् । माओवादीका एक नेताका अनुसार शुक्रबार दिउँसो प्रचण्डले राजनीतिक प्रतिवेदनमाथि उठेका प्रश्नको जवाफ दिएपछि केन्द्रीय सदस्य छनौटको मोडालिटी प्रस्तुत गर्ने तयारी छ । तर, अहिलेसम्म समितिले मोडालिटी तयार गरिसकेको छैन् ।

ती नेताले शिलापत्रसँग भने ‘ ‘कुन प्रदेशमा कुन समुदायबाट कति आउने, कुनबाट कति र जम्मा कुन प्रदेशलाई कति केन्द्रीय सदस्यको कोटा निर्धारण गर्ने भन्ने टुग्गो लगाएर प्रदेशलाई नै केन्द्रीय सदस्य छान्न दिने गरी पार्टीमा छलफल चलेको छ, त्यसरी नै प्रदेशलाई केन्द्रीय सदस्य छान्न दिइनेछ ।’ माओवादी केन्द्रले २ सय ९९ जनाको केन्द्रीय कमिटी बनाउँदैछ । केन्द्रीय कमिटी चयन भएपछि मात्रै महासचिवसहित पार्टीको पदाधिकारी चयन गर्ने माओवादीको विधानमा उल्लेख छ ।