मोलमोलाइले मनमुटावः के हो ‘सापटी–घिरौले’ र जीवन दाहालको लफडा ?

दिवाकर भण्डारी (सापटी) र लेखान्त भुसाल (घिरौले)

A+ A A-

सानाठूला गरेर पोखरामा वर्षमा एक दर्जनभन्दा बढी महोत्सव हुन्छन् । तीमध्ये दर्शक खचाखच हुने सडक महोत्सवको २३औँ संस्करण बिहीबारदेखि लेकसाइडमा सुरु भएको छ । रेष्टुरेन्ट एण्ड बार एसोसिएसन (रेबान) पोखराको आयोजनामा अंग्रेजी नयाँ वर्षको अवसरमा सडक महोत्सव हुँदै आएको छ ।

पहिलो दिन दर्शक हसाउन स्टेजमा दिवाकर भण्डारी (सापटी) र लेखान्त भुसाल (घिरौले) उभिने कार्यक्रम थियो । हास्य टेलिशृंखला मेरी बास्सैको यो जोडी कलाकारले भने महोत्सव नै बहिष्कार गरेको छ । महोत्सवलाई भनेर पोखरा आएका लेखान्त (घिरौले) पनि बिहीबारै काठमाडौं फर्किएका छन् । अर्का कलाकार भण्डारीको घर लेकसाइड नै हो ।

भएको के हो ?

यस्ता मेलामहोत्सवमा कलाकार ल्याउने जिम्मा लिएर आयोजकसँग पैसा लिन्छन् । त्यसरी सडक महोत्सवमा जिम्मा लिने मध्येका एक हुन्, गायक जीवन दाहाल । भण्डारीका अनुसार आयोजकसँग पहिल्यै पारिश्रमिकबारे मौखिक कुरा भएको थियो । पछि सहमतिभन्दा आधा पारिश्रमिक दिने दाहालले प्रस्ताव गरेको भण्डारीले बताए ।

‘मैले आयोजक दाइहरूसँग डिल गरेको थिएँ । ठेकेदारी प्रथा सबैलाई थाहा छ । पारिश्रमिक घटाउने, बोल्दा पनि ठेकेदारले ज्यामीलाई बोलेजस्तै गरे । त्यसपछि कार्यक्रम बहिष्कार गरेका हौँ,’ भण्डारीले शिलापत्रसँग भने । आयोजकसँग भइसकेको डिलमा हात हालेर मूल्य घटाउने दाहाल कलाकारहरूका नेता हुन् । उनी राष्ट्रिय लोक तथा दोहोरी गीत प्रतिष्ठान, नेपालका केन्द्रीय सचिव हुन् ।

जीवन दाहाल

आयोजक रेबानसँग नजिक र पोखराकै भएकाले भण्डारीलाई स्टेजमा ल्याउनेमा आयोजक सकरात्मक थियो । पारिश्रमिक घटाएर दाहाल बीचमा पसेपछि आफ्नै आँगनको महोत्सव छोडेर सापटी बिहीबार कास्कीको रुपा गाउँपालिका पुगे । ‘आयोजकलाई केही थाहा छैन । जीवन दाहालले ठेकेदारी गरेर नाङ्गो नाच देखाए । आज हामी आउने भनेर विज्ञापन पनि गरेका रहेछन् । हामी गएनौँ । विशुद्ध कलाकारितामात्रै गर्नेलाई ठेकेदारी प्रथा मन परेन,’ उनले दुःखेसो पोखे ।

महोत्सवमा लोकदोहोरी र हास्य कलाकार ल्याउने जिम्मा दाहालको समूहले लिएको छ । उद्घाटनको चाप भएको र स्टेजको जिम्मा दाहाललाई दिइएकाले आयोजकले पनि कलाकार आए/नआएकोबारे चासो दिएन । दुई हास्य कलाकार नआएकोबारे आफूलाई केही जानकारी नभएको रेबान पोखराका अध्यक्ष लक्ष्मण बरालले बताए । ‘हामीले कलाकार-कलाकारसँग कुरा गर्दैनौँ । कलाकारहरूकै समिति छ । संस्थालाई फाइदा हुने भएकाले उहाँहरूलाई पैसा दिन्छौँ,’ उनले थपे, ‘उहाँहरूले कुन कलाकारको कति भनेर लिस्ट दिनुहुन्छ । त्यहीअनुसार पैसा लैजानुहुन्छ । आज के भयो थाहा भएन ।’

आयोजकले सापटी–घिरौलेको जोडीलाई २० हजार रुपैयाँ छुट्याएको थियो । दाहालका अनुसार भण्डारीले २५ हजार रुपैयाँभन्दा कममा आफूहरू नआउने बताएका थिए । ‘सांस्कृति संयोजक र म बसेर उहाँलाई फोन गर्दा २५ हजार रुपैयाँभन्दा घटी आउँदैनौँ भन्नुभयो । नआउने भए अर्कैलाई भन्छोँ भनेर पोखरेली हास्य कलाकार दीपक थापालाई भनियो,’ दाहालले भने ।

डिल नहुँदै प्रचार ब्रोसरमा नाम कसरी पर्‍यो ?

दाहालले भने, ‘स्थानीय कलाकार हुन् भनेर सुरुमा नसोधी हाल्नुभएछ । नाम हालेपछि पारिश्रमिकमा कुरा मिलेन । अहिले दिवाकरजीले सरासर निहु खोज्ने काम गर्नुभयो ।’ पारिश्रमिकमा कुरा नमिलेको र नआउने भएपछि विकल्प खोज्दा भण्डारी मिडियाबाजीमा लागेको दाहालको आरोप छ । आफू र रेबान अध्यक्षले भण्डारीको चित्तदुखाइबारे बुझ्न खोज्दा फोन नउठाएको दाहालले बताए ।

अंग्रेजी नयाँ वर्षको अवसरमा हुने महोत्सव पुस १७ गतेसम्म लेकसाइडको तीन किलोमिटर क्षेत्रमा चल्ने छ । न्यू इयर इभ अर्थात् शुक्रबार महोत्सव हेर्न आउनेको ठूलो भीड लाग्छ ।

महोत्सवको दोस्रो दिन शुक्रबार बद्री पंगेनी, प्रिती आले, रामजी पौडेल, लक्ष्मी मल्ल, चिज गुरुङ, अस्मिता डल्लाकोटी, अलिफ मियाँ, आशा विसी, निशा पोख्रेल, काजल गुरुङको गायन प्रस्तुत हुँदैछ । सो दिन राजेन्द्र नेपाली (लट्टे), युवराज भण्डारी र दीपक थापाको हास्यव्यंग्य रहँदा राति आत्मासर्ग, भिटेन र विपुल क्षेत्री एण्ड दि ट्राभलिङ ब्यान्डको प्रस्तुति रहने रेबानले जनाएको छ ।

अन्तिम दिन १७ पुसमा परुषोत्तम न्यौपाने, सम्झना भण्डारी, सरला पाण्डे, शंकर विरही गुरुङ, चोलेन्द्र पौडेल, राजन कार्की, रेशम निर्दोष, प्रकाश पराजुली, मिना बुढाथोकी, माया गुरुङ, सविना गुरुङ र चिना थापा आउने छन् । हास्यतर्फ राजा राजेन्द्र आउँदा राति याम बरालको प्रस्तुति रहने आयोजकले जनाएको छ ।

प्रकाशित मिति: बिहीबार, पुस १५, २०७८ २२:१३