प्रचण्डलाई लेखनाथ न्यौपानेको प्रश्न– जसलाई लडेर जित्नु छ, त्यही मित्रशक्ति ?

प्रचण्डलाई लेखनाथ न्यौपानेको प्रश्न– जसलाई लडेर जित्नु छ, त्यही मित्रशक्ति ?

A+ A A-

माओवादी केन्द्रको आठौँ महाधिवेशनको बन्दसत्रमा नेता लेखनाथ न्यौपानेले अध्यक्ष पुष्पकमल दाहाल प्रचण्डको राजनीतिक प्रतिवेदनबारे फरक मत दर्ज गर्दै कांग्रेससँगको गठबन्धनप्रति असहमति जनाएका छन् ।

कांग्रेसको नाम नलिएरै उनले दलाल पुँजीवादको घोडा चढेर दौडिरहेको उदार पुँजीवादी शक्तिसँग रणनीतिक मोर्चा बनाइएको भन्दै फरक मत राखेका छन् । कांग्रेससँगको गठबन्धनका कारण प्रचण्डको प्रतिवेदनमा समाजको वर्ग विश्लेषण र राजनीतिक शक्तिले कुन वर्गको हितमा काम गरिरहेको छ नखुलाइएको उनको टिप्पणी छ । माओवादीले अघिल्ला महाधिवेशन र सम्मेलनमा प्रस्तुत गरेका राजनीतिक प्रतिवेशनमा दुस्मन र मित्रशक्ति किटान गर्दै आएको थियो ।

‘एकातिर हामीले दलाल पुँजीवादविरुद्ध लड्ने कुरा गरेका छौँ भने अर्कोतिर दलाल पुँजीवादको घोडा चढेर दौडिरहेको उदार पुँजीवादी शक्तिसँग रणनीतिक मोर्चा बनाएर अघि बढ्ने प्रयोग र घोषणामा छौँ,’ उनले भनेका छन्, 'यसलाई सैद्धान्तिक र व्यावहारिक रूपमा सच्याएनौँ भने हामी पनि दलाल पुँजीवादको घोडसवार बन्नुको विकल्प छैन ।'

नेता न्यौपानेले जुन वर्गसँग लडेर जित्नु छ, त्यही वर्गलाई मित्रशक्ति बनाउने व्यवहारले वैज्ञानिक समाजवादको आधार निर्माणको पहल अघि होइन पछाडि धकेल्ने बताएका छन् । यसले वर्ग संघर्षलाई अस्वीकार गर्ने दाबी गर्दै उनले फरक मत राखेका छन्, ‘जब वर्ग विश्लेषण र वर्ग संघर्षमा हामी मौन वा निष्क्रिय हुन्छौँ, तब पार्टीमा अन्तरसंघर्षविहीन मान्छेहरूको झुण्ड मात्र रहन्छ । अन्तरसंघर्षविहीन पार्टी मृत पार्टी हुन्छ, जुन माओवादी हुनै सक्दैन ।’

एमालेसँग एकता गर्नु गल्ती

नेता न्यौपानेले एमालेसँगको पार्टी एकता छापामार तरिकाले गरिएको सैद्धान्तिक र प्रक्रियागत हिसाबले गम्भीर गल्ती भनेका छन् । ‘एमालेसँगको चुनावी तालमेल र कार्यगत मोर्चासम्मलाई सही मान्न सकिन्छ तर शान्तिपूर्ण संसद्‌वादमा डुबेको, उदारवादी अर्थतन्त्रको घोडा चढ्ने र ओलीजस्तो दक्षिणपन्थी विचारको नेतृत्वसँग छापामार तरिकाले गरिएको एकता सैद्धान्तिक र प्रक्रियागत हिसाबले गम्भीर गल्ती थियो,’ उनले भनेका छन् ।

फरक मतमा नेता न्यौपानेले अदालतले दुई पार्टी अलग-अलग गराएपछि माधव नेपाल समूह पेरिसडाँडाबाट लुरुलुरु फर्किनुले पनि एकता सही थियो भनेर पुष्टि नगर्ने दाबी गरेका छन् । ‘अदालतले दुई पार्टीलाई अलग बनाएपछि ओली त जान्थे गए तर ओलीलाई हामीले कारबाही गरेपछि बनाइएका अध्यक्षसहितको समूह पेरिसडाँडाबाट लुरुलुरु धुम्बराही जाने कुराले एकतालाई सही थियो भनेर पुष्टि गर्छ ?’ उनले भनेका छन्, ‘त्यसकारण त्यो गल्ती सामान्य उदारवादी कार्यशैलीमा मात्र सीमित थिएन, यसमा कमरेड प्रचण्डभित्र विकास भएको व्यक्तिवादी अराजकता र संसदवादी रुझान पनि जिम्मेवार छ ।’

प्रचण्डका लस्करै तस्वीर किन ?

न्यौपानेले अध्यक्ष प्रचण्डमा आत्मकेन्द्रित व्यक्तिवादको समस्या देखिएको आरोप लगाएका छन् । महाधिवेशन हलमा लस्करै प्रचण्डको तस्वीर राखिएकोमा पनि उनले प्रश्न उठाएका छन् । ‘तपाईंका प्रायः सबै सार्वजनिक अभिव्यक्तिमा हाम्रो वर्ग, हाम्रो पार्टी, हाम्रो आन्दोलन र हाम्रो केन्द्रीय समितिको निर्णय भन्ने कतै सुनिदैन,’ उनले भनेका छन्, ‘सुनिन्छ त म, मेरो, मैले, प्रचण्डले मात्र । यसको एउटा उदाहरण तपाईंले नेकपा कालमा केपी ओलीलाई खेलेको पत्रमा म भन्ने शब्द ३४ पटक दोहोरिएको छ भने हामी भन्ने एक ठाउँमा मात्र । हामीले ओलीभित्रको बा प्रवृत्तिले कम्युनिष्ट आन्दोलनमा पारेको नकारात्मक प्रभावको खण्डन गर्दै गर्दा हामीभित्र पनि अर्को रूपको बा प्रवृत्ति देखिएको छ ।’

उनले आफैँ सशरीर उपस्थित भएको ठाउँमा प्रचण्डको लस्करै तस्वीर राख्न कसले निर्देशन दिएको हो ? भनि प्रश्न उठाएका छन् । उनको प्रश्न छ, ‘कमरेड अध्यक्ष, त्यो ठाउँमा दिलबहादुर वा सुरेश वाग्ले अथवा शहीदहरूको तस्वीर राखेको भए हाम्रो संस्कृति कति सुसंगत हुन्थ्यो होला ?’

प्रकाशित मिति: बिहीबार, पुस १५, २०७८ २३:५५