नबिल र नेपाल बंगलादेश बैंक मर्जरको अन्तिम तयारी, एमओयु तयार पार्न समिति गठन

A+ A A-

नबिल बैंक र नेपाल बंगलादेश बैंक मर्जरका लागि संयुक्त मर्जर समिति गठन गरिएको छ । एक साताभित्र मर्जसम्बन्धी सबै काम सकेर सहमतिपत्रमा हस्ताक्षर गर्ने तयारी भएको नबिल बैंक स्रोतले जनाएको छ ।

स्रोतका अनुसार नबिल बैंकका सञ्चालक उदयकृष्ण उपाध्यायको संयोजकत्वमा समिति गठन गरिएको छ । नबिल बैंकले ३० पुसमा साधारणसभा समेत डाकिसकेकाले त्यसअघि नै मर्जरसम्बन्धी प्रक्रिया टुंग्याउन खोजिएको हो । नबिल सञ्चालक समितिको बैठकले विदेशी साझेदार भएको बैंक तथा वित्तीय संस्थासँग मर्जर गर्ने वा प्राप्ति गर्ने निर्णय गरेको थिय‍ो ।

दुई बैंकबीचको शेयर आदानप्रदान अनुपात (स्वाप रेसियो) टुंग्याउने जिम्मा पनि उपाध्यालाई दिइएको छ । यद्यपि यी दुई बैंक चुक्ता पुँजी जोड्दा २२ अर्ब बढी पुग्छ । दुई बैंकको निक्षेप ३ खर्ब ९ अर्ब रुपैयाँ पुग्छ । अहिले नबिल बैंकको निक्षेप २ खर्ब ३० अर्ब ५३ करोड रहेको छ भने बंगलादेश बैंकको निक्षेप ७८ अर्ब ९३ करोड रुपैयाँ छ ।

त्यस्तै, दुई बैंकको कर्जा ३ खर्ब ५१ अर्ब रुपैयाँ पुग्नेछ । अहिले नबिल बैंकको कर्जा २ खर्ब १३ अर्ब ४९ करोड पुगेको छ भने बंगलादेश बैंकको ७५ अर्ब ५५ करोड रुपैयाँ पुगेको छ । अहिले वाणिज्‍य बैंकहरू एकापसमा मर्जरमा जाने तयारी गरिरहेका छन् भने राष्ट्र बैंकसमेतले नीतिगत प्रोत्साहन गरेको छ ।

राष्ट्र बैंकले दुई वाणिज्य बैंकलाई मर्जरमा जान दबाब दिन थालेपछि तत्कालीन ग्लोबल आईएमई बैंक र जनता बैंक मर्जरमा गएका थिए । त्यसपछि हिमालयन बैंक र नेपाल इन्भेस्टमेन्ट बैं‌क पनि मर्जरमा जान एकापसमा सहमति गरेर एकीकृत कारोबार गर्ने मितिको पर्खाइमा छन् ।