माओवादी महाधिवेशनको बन्दसत्रमा 'प्रचण्डपथ': माेह कि चाकडी ?

A+ A A-

माओवादी केन्द्रको आठौँ महाधिवेशनको बन्दसत्रमा नेताहरूले प्रचण्डको राजनीतिक प्रतिवेदनपको पुरकको रूपमा भन्दा पनि उनको चाकडीमा समय खर्च गरेका छन् । समूहगत छलफलपछि टोली नेताले बन्दसत्रमा समूहभित्र उठेको छलफलका विषयको निष्कर्षभन्दा बढी प्रचण्डको चाकडीका शब्द खर्चिएका हुन् ।

प्रचण्डको राजनीतिक प्रतिवेदनमाथि छलफल गर्न २५ वटा समूह बनाइएको थियो । ती समूहमा भएको छलफलको निष्कर्ष सुनाउन टोली नेता चयन भएका थिए ।

प्रचण्डको देवत्वकरण र चाकडी गर्ने क्रममा टोली नेताहरूले सबैभन्दा धेरै प्रचण्डपथको विकास र विस्तारमा जोड दिए । केही टोली नेताले भने 'प्रचण्ड युग'को घोषणा गर्नुपर्नेसमेत भन्न भ्याए ।

बागमती प्रदेशका अध्यक्षसमेत रहेका सरल सहयात्रीले आफ्नो समूहमा उठेका विषयको निष्कर्ष सुनाउने क्रममा अब 'प्रचण्ड युग' घोषणा गर्न प्रस्ताव गरेका थिए । युद्धकालीन समयमा माओवादीले प्रचण्डपथको विकास गरेको थियो ।

त्यसलाई विचारधाराको रूपमा विकास गरेर प्रचण्डवादमा पुग्ने अभिलाषा मा‌ओवादीले त्यतिबेला राखेको थियो । शान्तिप्रक्रियामा आएपछि माओ‌वादीले प्रचण्डपथ छोडेन मात्रै त्यसको चर्चासमेत गर्न छोड्यो । सोहीकारण आठौँ महाधिवेशनको राजनीतिक प्रतिवेदनमा प्रचण्डले प्रचण्डपथको उपादेयता सकिएको लेखेका छन् ।

रिपोर्टिङ गर्ने क्रममा नेता टंक राईले सरल सहयात्रीले जस्तै प्रचण्ड युगको प्रसंग त ल्याएनन् तर प्रचण्डपथ होइन, प्रचण्ड विचारधारा भन्ने र यसलाई लागू गर्नुपर्ने मत राखे । १४ पुसको बन्दसत्रमा नेताहरूले जसरी प्रचण्डपथको विकासमा जोड दिए त्यसरी नै १५ पुसको बन्दसत्रमा पनि प्रचण्डपथको पक्षमा वकालत गरे ।

सम्पर्क समन्वय विशेष प्रदेश कमिटीको तर्फबाट टोली नेता रहेका श्रीकृष्ण अधिकारीले पनि प्रचण्डको दस्तावेजलाई प्रचण्ड विचारधाराको रूपमा अगाडि बढाउनुपर्ने तर्क गरे । अधिकारीले भनेका थिए, ‘प्रचण्ड विचारधाराको नेतृत्वमा बृहत् कम्युनिस्ट एकताको आह्वान गरौँ । यसले मात्र माओवादीलाई पुनर्जीवन दिन्छ ।’

अर्का नेता गोपाल शर्माको प्रश्न थियो- प्रचण्डपथमा के गल्ती थियो र छोडियो ? छोड्नु गल्ती थियो भन्ने हो भने संश्लेषण गरेर किन अगाडि नबढाउने ? शर्माले भने, ‘अब जे आएको छ, यसलाई प्रचण्ड विचारधाराको रूपमा अघि बढाइनुपर्ने उपयुक्त देख्छु । प्रचण्डपथलाई ब्युँत्याइए पश्चगमन हुन्छ भनेर राजनीतिक प्रतिवेदनमा प्रस्तुत गरिनु आफैँमा विरोधाभासपूर्ण धारणा हो । यसमा संशोधन आवश्यक छ ।’

प्रचण्डपथकै पक्षमा वकालत गर्ने क्रममा उपत्यका विशेष प्रदेश समूहका नेता जगत सिंखडाले समूहको छलफलमा प्रचण्डपथको पक्षमा मत रहेको बताएका थिए । सिंखडाले भने, ‘हाम्रो छलफलमा प्रचण्ड पथलाई ब्युँत्याउनुपर्ने सुझाव आएको छ ।’

प्रकाशित मिति: बिहीबार, पुस १५, २०७८ २३:५६