सप्तकोशी डेभलपमेन्ट बैंक घोटाला प्रकरणः सीईओसहित थप तीन जना कर्मचारी पक्राउ

सप्तकोशी डेभलपमेन्ट बैंक घोटाला प्रकरणः सीईओसहित थप तीन जना कर्मचारी पक्राउ

A+ A A-

विराटनगरस्थित सप्तकोशी डेभलपमेन्ट बैंक घोटला प्रकरणमा बैंकका सीईओ नवीन सुवेदीसहित थप तीन जना कर्मचारी पक्राउ परेका छन् ।

बैंकमा करोडौँ रुपैयाँ हिनामिना भएको तथ्य बाहिरिएपछि सीईओ सुवेदीसहित तीन जनालाई बुधबार पक्राउ गरिएको हो । बुधबार विराटनगरस्थित बैंकको कार्यालयमै पुगेर प्रहरीले उनीहरूलाई पक्राउ गरेको हो ।

पक्राउ पर्नेमा बैंकका प्रमुख कार्यकारी अधिकृत सुवेदीसहित फाइनान्स हेड देवी प्रसाद भण्डारी र अपरेशन हेड अमित थापा मगर छन् । प्रहरीले यसअघि नै बैंक घोटाला आरोपमा सप्तकोशी बैंक विराटनगर कर्पोरेट कार्यालयका जनरल सर्भिस डिपार्टमेन्ट (जीएसडी) प्रमुख हिमाल भट्टराईलाई पक्राउ गरेको थियो । भट्टराईलाई १९ मंसिरमा नियन्त्रणमा लिएर प्रहरीले अनुसन्धान प्रक्रिया अगाडि बढाएको थियो ।

पक्राउ परेकाहरूलाई जिल्ला प्रहरी कार्यालय मोरङको हिरासतमा राखिएको छ । बैंकमा झन्डै १५ करोड ७५ लाख ४० हजार ५ सय ७५ रुपैयाँ हिनामिना भएको बाहिरिएपछि अनुसन्धानका लागि उनीहरूलाई पक्राउ गरिएको जिल्ला प्रहरी कार्यालय मोरङका प्रवक्ता प्रहरी नायब उपरीक्षक दीपक श्रेष्ठले जानकारी दिए ।

‘बैंकिङ कसुरमा बैंकले जाहरी दिएको थियो । हिमाल भट्टराईलाई पहिले नै पक्राउ गरिएको थियो,’ श्रेष्ठले शिलापत्रसँग भने, ‘आज थप तीन जनालाई पक्राउ गरिएको हो । अहिले थप अनुसन्धन भइरहेको छ ।’

बैंकका एक कर्मचारीले नेपाल राष्ट्र बैंकमा विस्तृत तथ्यसहितको गोप्य उजुरी दिएपछि नेपाल राष्ट्र बैंकले समेत सो विषयमा चासो देखाएको थियो । बैंकका सीईओ सुवेदीसहित कर्मचारीहरूको समूहले मिलेमतोमा बैंक घोटाला गरेको स्रोतको दाबी छ ।

यसअघि सबैभन्दा पहिला पक्राउ परेका हिमाल भट्टराईका आफन्तले १२ पुसमा विराटनगरमा पत्रकार सम्मेलन गर्दै सीईओ सुवेदीकै योजनामा बैंक घोटाला भएको आरोप लगाएका थिए ।

प्रकाशित मिति: बुधबार, पुस १४, २०७८ २०:५१