राजसंस्था नभए नेपाल बिलय हुने खतरा छ : राजेन्द्र लिङ्देन

A+ A A-

राष्ट्रिय प्रजातन्त्र पार्टीका अध्यक्ष राजेन्द्र लिङ्देनले राजसंस्थाको आवश्यक्ता झनै बढेर गएको बताएका छन् । पूर्वराजा वीरेन्द्रको स्मृतिमा बुधबार काठमाडौंमा आयोजित कार्यक्रममा लिङ्देनले सिक्किम विलय भएको उदाहरण पेस गर्दै राजसंस्था नभए नेपाल पनि विलय हुने खतरा रहेकको टिप्पणी गरे ।

‘जब सिक्किममा राजसंस्थाको अन्त्य भयो । जनताका प्रतिनिधिहरूले भन्नेले त देशै भारतमा विलाई दिए,' लिङ्देनले भने, 'अहिले पछिल्लो दिनमा त्यहीँ खतरा हाम्रो देशले बोकिराखेको छ । त्यसका लागि नेपालको सन्दर्भमा राजसंस्थाको आवश्यकता छ भनेर मैले भन्ने गर्छु ।'

विरेन्द्रले अरु देशसँग नझुक्नका लागि २०४६ सालमा राजनीतिक दलसँग सम्झौता गरेर संवैधानिक राजाको रुपमा आफूलाई उभ्याएको उनले बताए । विरेन्द्र जनप्रेमी र देशभक्त राजा भएको लिङ्देनको भनाइ थियो ।

'भारतबाट तत्कालीन संस्थापनले के–के सर्त लिएर आएको थियो । त्यसबेला राजाले ती सर्तहरू मानेको भए आज पनि नेपालमा राजसंस्था पनि रहिराखथ्यो होला । त्यो नाम मात्रको हुन्थ्योहोला,' २०४६ सालको जनआन्दोलनको प्रसँग कोट्याउँदै लिङ्देनले भने, 'तर देशहितविरुद्धका तिम्रा सम्झौताहरू, सर्तहरू मान्नुभन्दा देशका राजनीतिक दलहरूसँग सम्झौता गर्छु, तिमीसँग झुक्नुभन्दा मेरो जनतासँग झुक्छु भनेर जब राजा वीरेन्द्रले दलहरुसँग सम्झौता गरेर संवैधानिक राजा बने ।'

राजनीतिक दलका नेताहरू भन्दा राजा बढी देशभक्त हुन्छन् भन्ने कुरा वीरेन्द्रले प्रमाणित गरेको लिङ्देनले बताए ।