समूहगत छलफलको निष्कर्ष सुनाउन प्रज्ञा भवनमा भेला हुँदै माओवादी प्रतिनिधि

A+ A A-

माओवादी केन्द्रको बन्दसत्रमा समूहगत छलफलको निष्कर्ष सुनाउन प्रतिनिधिहरू प्रज्ञा भवनमा जम्मा हुन थालेका छन् । दिउँसो १ बजेबाट २५ वटा समूहमा भएको छलफल टोली नेताले निष्कर्षका रूपमा सुनाउने कार्यतालिका तय भएको थियो ।

प्रचण्डको राजनीतिक प्रतिवेदन र नेता देव गुरुङले प्रस्तुत गरेको विधान मस्यौदामाथि प्रतिनिधिहरूले आफ्नो समूहमा धारणा राखेका थिए । त्यसका लागि मंगलबार र बुधबार दिउँसो १२ बजेसम्म समूहगत छलफलको समय निर्धारण गरिएको थियो । उक्त छलफलपछि निस्केको निष्कर्ष सुनाउन नेताहरू प्रज्ञा भवनमा जम्मा भइरहेको नेता युवराज चौलागाईंले जानकारी दिए ।

चौलागाईंका अनुसार समूहले छानेका नेताले समूहभित्र भएको छलफलको निचोड बन्दसत्रमा सुनाउनेछन् । समूहगत छलफलमा प्रचण्डले भारतप्रति नरम नीति लिएको कतिपय नेताहरूले प्रश्न उठाएका छन् । प्रचण्डले राजनीतिक प्रतिवेदनमा भारतप्रति मौनता प्रकट गरेको प्रतिनिधिहरूको भनाइ छ । पहिला भारतलाई माओवादीले विस्तारवादी मुलुकका रूपमा व्याख्या गर्ने गरेको छ । त्यसैगरी, एमसीसीको विषयमा पनि दोहोरो धारणा आएको छ ।

अधिकांश समूहमा एमसीसी अस्वीकार गर्नुपर्ने मत आएको थियो भने विदेश विभागको समूहमा भने अमेरिकी सहयोगलाई अस्वीकार गर्न नहुने मत पनि आएको थियो । एमसीसीलाई स्वीकार गर्नुपर्ने मत पूर्वराजदूत लक्की शेर्पाले राखेकी थिइन् ।

त्यसैगरीऽ प्रचण्डले उत्पादनसँग जोड्ने कार्यक्रमप्रति पनि प्रतिनिधिहरूले प्रश्न उठाएका छन् । विगतमा उठाएको उत्पादन बिग्रेडलाई कामयाबी नबनाएको माओवादीले त्यही नारा दोहोर्‍याउनु उचित नहुने तर्क पनि उठेका छन् । यी सबै धारणाको निष्कर्ष टोली नेताले प्रज्ञा भवनको बन्दसत्र हलमा प्रस्तुत गर्नेछन् ।