प्रचण्डको प्रतिवेदनमाथि प्रतिनिधिको प्रश्न : उत्पादन भनेको कृषि मात्रै हो ?

प्रचण्डको प्रतिवेदनमाथि प्रतिनिधिको प्रश्न : उत्पादन भनेको कृषि मात्रै हो ?

A+ A A-

माओवादी केन्द्रको बन्दसत्रमा समूहगत छलफलका क्रममा अध्यक्ष प्रचण्डको राजनीतिक प्रतिवेदनमा नेता/कार्यकर्तालाई उत्पादनसँग जोड्ने प्रस्तावलाई फरक ढंगले व्याख्या गर्नुपर्ने आवाज उठेको छ । प्रचण्डको प्रस्तावमाथि छलफल गर्ने क्रममा उत्पादनलाई कृषिसँग मात्र जोडिएको भन्दै असन्तुष्टि पोखिएको हो ।

उत्पादनक्षेत्रका रूपहरू फेरिएको र ती फेरिएका रूप पक्षको पनि व्याख्या गर्नुपर्ने तर्क समूहगत छलफलमा उठेको नेताहरूले बताएका छन् । केन्द्रीय विभागहरूको समूहगत छलफल भइरहेको क्वालिटी बैंक्वेटमा विदेश मामिला विभागकी सदस्य लक्की शेर्पाले उत्पादनलाई कृषिबाहेकका क्षेत्रसँग पनि जोडेर व्याख्या गर्नुपर्ने बताएकी छिन् ।

शेर्पाले कृषिबाहेक विस्तार भएको सेवाक्षेत्र र वैदेशिक रोजगारीलाई पनि समेटेर व्याख्या गर्नुपर्ने उनकाे भनाइ छ । शेर्पाले भनिन्, ‘उत्पादनसँग जोड्ने भन्नेबित्तिकै कृषि मात्रै जोड दिइएको छ, लाखौँ श्रमिकहरू आबद्ध भएको वैदेशिक रोजगारलाई पनि सँगै जोडेर व्याख्या गर्नुपर्छ ।’

वैदेशिक रोजगारीमा रहेका श्रमिकलाई स्वदेशमै उत्पादनका विभिन्न क्षेत्रमा सहभागी गराउने योजना, कार्यक्रम र रणनीति आवश्यक रहेको पनि प्रतिनिधिहरूले उल्लेख गरेका थिए । शेर्पाले भनिन्, ‘विदेशबाट आउने रेमिट्यान्सको उपयोगितामाथिमा पनि नीति बनाउन आवश्यक छ ,त्यसमा पनि छलफल गर्नुपर्ने हुन्छ ।’

कतिपय नेता कार्यकर्ताले भने उत्पादनसँग जोडिने प्रस्तावित कार्यक्रमको कार्यान्वयनमै प्रश्न उठाएका छन् । ०६९ सालको हेटौँडा महाधिवेशनले उत्पादन बिग्रेड बनाउने निर्णय लिएको थियो । तर, माओवादीले त्यसलाई कार्यान्वयन नै गरेन ।

त्यसैले अहिले प्रचण्डको प्रस्तावको कार्यान्वयनप्रति प्रश्न उठेको हो । नेता लेखनाथ न्यौपानेले दस्तावेजमा लेखेर मात्रै नहुने र त्यसलाई कार्यान्वयमा लैजानु मुख्य कुरा हुने बताउँछन् । शिलापत्रसँगको कुराकानीमा न्यौपानेले अब दस्तावेजमा लेखेर मात्रै कसैले नपत्याउने दाबी गरे । उनका अनुसार व्यहार र शैलीमा नै परिवर्तन हुन आवश्यक देखिएको छ ।

प्रकाशित मिति: बुधबार, पुस १४, २०७८ १०:४७