श्रमिक महिलाका समस्या सम्बोधन गर्न सरकार गम्भीर छ : मन्त्री श्रेष्ठ

A+ A A-

श्रम, रोजगार तथा सामाजिक सुरक्षामन्त्री कृष्णकुमार श्रेष्ठले श्रमिक महिलाका समस्या सम्बोधन गर्न सरकार गम्भीर रहेको बताएका छन् ।

पछिल्लो समय रोजगारीका विभिन्न क्षेत्रमा महिलाको सहभागिता बढे पनि अनौपचारिक, निजी तथा स्वरोजगारमा रहेका श्रमिक महिलाको अवस्था जोखिमयुक्त रहेको भन्दै समस्या सम्बोधन गर्ने श्रेष्ठले बताए ।

श्रमिक महिलाका समस्या सम्बोधनका लागि ज्ञापनपत्र बुझाउन मन्त्रालय गएका संयुक्त ट्रेड युनियन समन्वय केन्द्र अन्तर्गत महिला समितिका पदाधिकारीहरूसँग श्रेष्ठले श्रमिक महिलाको हक सुनिश्चित गरी उनीहरूका संवेदनशील सवाललाई अविलम्ब सम्बोधन गर्ने प्रतिबद्धता जनाएका हुन् ।

समितिका सदस्यहरूले औपचारिक, अनौपचारिक तथा सार्वजनिक क्षेत्रमा कार्यरत महिलाहरू शारीरिक तथा मानसिक हिंसाका कारण रोजगारीको हक तथा मर्यादित जीवनयापनको अधिकारबाट बञ्चित भएको बताएका थिए । कोभिड महामारीका कारण औपचारिक तथा अनौपचारिक क्षेत्रमा काम गर्ने महिलाहरू बढी प्रभावित भएको उनीहरूको भनाइ थियो ।

मन्त्री श्रेष्ठले हरेक व्यक्तिले बिनाभेदभाव समान कार्यका लागि समान पारिश्रमिक पाउने संवैधानिक अधिकार रहेको बताउँदै श्रम गर्न पाउनु र श्रमको उचित मूल्य दाबी गर्नु मानवअधिकारको विषय भएको बताए ।

संविधानले लैंगिक समानताको पक्षमा उत्कृष्ट व्यवस्था गरेको भए पनि व्यवहारमा विभेद कायम रहेको महिला अधिकारकर्मीहरूको भनाइ थियो । संयुक्त ट्रेड युनियन समन्वय केन्द्रका पदाधिकारीहरूले हिंसा र दुर्व्यवहार सम्बन्धी आईएलओ महासन्धिलाई सरकारले अवलम्बन गर्नुपर्ने, कार्यस्थलमा हुने यौनजन्य दुर्व्यवहार निवारण ऐन, २०७१ पूर्ण कार्यन्वयन गर्नुपर्ने माग गरेका थिए ।

प्रकाशित मिति: मंगलबार, पुस १३, २०७८ १९:४१