तारागाउँ विकास समितिको नाममा रहेको सरकारी जग्गा फिर्ता ल्याउँछुः मन्त्री आले

तारागाउँ विकास समितिको नाममा रहेको सरकारी जग्गा फिर्ता ल्याउँछुः मन्त्री आले

A+ A A-

संस्कृति, पर्यटन तथा नागरिक उड्डयनमन्त्री प्रेमबहादुर आलेले संसदीय समितिहरूले दिएको निर्देशन हुवहु पालना गर्ने प्रतिबद्धता जनाएका छन् । मंगलबार प्रतिनिधिसभा अन्तर्गतको अन्तर्राष्ट्रिय सम्बन्ध समितिको बैठकमा आलेले भने, ‘तपाईंहरूले दिएका निर्देशन विगतमा के हो मलाई थाहा छैन, म हुबहु लागु हुनेगरी काम गर्नेछु ।'

सरकारी स्वामित्वमा रहेको १४८ रोपनी जग्गा तारागाउँ विकास समितिले आफ्नो नाममा पारेकोमा फिर्ता ल्याउन संसदीय समितिले दिएको निर्देशन पालना गर्ने उनको भनाइ थियो ।

'तारागाउँ विकास समितिको कुरा एकदमै गम्भिर छ । १४८ रोपनी जग्गा आफ्नो नाममा राखिएको छ । जबकी त्यो राख्नै पाइदैनँ । यहाँहरूले पठाउनुभएको निर्देशन समेत हेर्दाखेरी त्यो नेपाल सरकारको अधिनमा रहेको जग्गा कुनै व्यक्ति, कुनै प्राइभेट कम्पनी अथवा तारागाउँ रेजेन्सीमा त्यो राख्न मिल्दैन,' आलेले भने, 'तपाईंहरूले मलाई जुन निर्देशन दिनुभएको छ, हामी यसलाई हुबहु अगाडि बढाउने र नेपाल सरकारको जग्गा फिर्ता ल्याउने कुरामा तपाईंहरू माननीयज्यूहरूको पनि सहयोग रहनेछ भन्ने मैले विश्वास लिएको छु । तपाईंहरूले दिएको निर्देशन कार्यान्वयन गर्नेतिर म जानेछु भन्ने प्रतिबद्धता जनाउन चाहान्छु ।’

निजगढ अन्तर्राष्ट्रिय विमानस्थल निर्माणका लागि बजेट अभाब भएको आलेले बताए । ८ हजार ५० हेक्टर जमिन विमानस्थलको नाममा आइसकेको भए पनि बजेट अभाबका कारण काम सम्पन्न हुने नसकेको उनले बताए । पोखरा अन्तर्राष्ट्रिय विमानस्थल निर्माणको सम्बन्धमा रिठ्ठे डाँडाँको कटान प्रक्रिया पनि छिट्टै अगाडि बढाइने उनको भनाइ थियो ।

प्रकाशित मिति: मंगलबार, पुस १३, २०७८ १९:०१