भैरहवा विमानस्थलको टर्मिनल चित्तबुझ्दो छैन, डिजाइन र स्वीकृत गर्नेको नाम दिनुस्: माधव नेपाल

भैरहवा विमानस्थलको टर्मिनल चित्तबुझ्दो छैन, डिजाइन र स्वीकृत गर्नेको नाम दिनुस्: माधव नेपाल

A+ A A-

एकीकृत समाजवादीका अध्यक्ष तथा पूर्वप्रधानमन्त्री माधव कुमार नेपालले भैरहवा विमानस्थलको टर्मिनल चित्तबुझ्दो नरहेको बताएका छन् ।

प्रतिनिधिसभा अन्तर्गतको अन्तर्राष्ट्रिय सम्बन्ध समितिका सदस्यसमेत रहेका नेपालले मंगलबार समितिको बैठकमा उक्त टर्मिनलको डिजाइनर, इन्जिनियर र स्वीकार गर्ने पदाधिकारीको नाम दिन माग गरे ।

‘भैरहवा विमानस्थलको टर्मिनल जुन बनेको छ, त्यो चित्तबुझ्दो छैन । अनि जो जुन भवनको डिजाइन तयार भयो, त्यो डिजाइनर को हो ? त्यसको नाम चाहियो । कम्पनी, इन्जिनियर, त्यसलाई स्वीकार गर्ने पदाधिकारी को हुन् । त्यो नाम चाहियो,' नेपालले भने, 'मन्त्री को थिए ? प्रधानमन्त्री को थिए ? त्यो पनि चाहियो ।'

अन्तर्राष्ट्रिय विमानस्थल बनाउँदा विभिन्न त्रुटिहरू भएको भन्दै सुधार्न प्रयास गर्नुपर्ने नेपालको भनाइ थियो । 'निजगढ विमानस्थलको कुरा उठाएको र अघि बढाउनु पर्छ भनेको धेरै वर्ष भइसक्यो, यो ढिला गर्ने मान्छे को-को हुन् ? किन ढिला गर्न खोजेको ? यो राज्यको गम्भीर चिन्त र चासोको विषय भइरहेको छ । कसले रोकेको छ ?' उनले भने, 'मैले स्मार्ट सिटी पनि त्यहाँ जोडिएको छ भन्ने सुनेँ, स्मार्ट सिटीसँग विमानस्थल जोडिँदैन, कामै रोकिदिने अर्को डिजाइन भनेर ? के हो यो ?’

समितिकी सदस्य पुष्पा भुसालले लुम्बिनी विमानस्थल सञ्चालनको काम पर्यटन मन्त्रालयबाट नै रोकिएको सूचना आफूले पाएको बताउँदै सञ्चालन गर्नुपर्नेमा जोड दिइन् । ‘लुम्बिनी विमानस्थलमा काम लगभग अघि बढीसकेको, स्ट्रक्चर तयार भइसकेको, हामीले सुन्दै गर्दा पर्यटनमन्त्रालयबाट नै केही फाइलहरू अघि बढाउनुपर्ने,' भुसालले भनिन्, 'स्ट्रक्चरहरू तयार भइसकेको अवस्थामा त्यसलाई हाम्रै कार्यकालमा छिटो भन्दा छिटो त्यसलाई सञ्चालन गरेर अघि बढ्नुपर्छ ।’

समितिका सदस्य मोहन बानियाँले पोखरा अन्तर्राष्ट्रिय विमानस्थलको पुनः सर्वे डिजाइन र डीपीआर गर्ने भन्ने आएकोमा खेद प्रकट गरे । करिब ९५ प्रतिशत काम भइसकेको अवस्थामा यस्तो कुरा गर्नु लापरबाही भएको उनको भनाइ थियो । '४० मिटर डाँडा काट्नुपर्छ, त्यसको पुनः सर्वे डिजाइन र डीपीआर गर्ने भन्ने कुरा आएको छ, करिब ९५ प्रतिशत काम भइसकेको छ, अब त्यसको प्रोजेक्टको अन्तिम समयमा आएर यो कुरा गर्नु लापरबाही नै हो,' बानियाँले भने, 'फेरि के को चलखेल हो ? त्यो डाँडा नकाटी पनि प्लेन ल्याण्ड गर्नसक्छ ।’

प्रकाशित मिति: मंगलबार, पुस १३, २०७८ १८:२०