प्रचण्डको योजनामा लोकेन्द्रको टिप्पणी: पेट र दिमागमा बोसो लागेको माओवादीले श्रम गर्दैन

प्रचण्डको योजनामा लोकेन्द्रको टिप्पणी: पेट र दिमागमा बोसो लागेको माओवादीले श्रम गर्दैन

लोकेन्द्र विष्ट मगर ।

A+ A A-

२०६९ सालमा मकवापुरको हेटौँडा भएको सातौँ महाधिवेशनमा माओवादी केन्द्रका अध्यक्ष पुष्पकमल दाहाल प्रचण्डले पार्टीलाई उत्पादनसँग जोड्ने कार्यक्रम ल्याएका थिए । उनले उत्पादन ब्रिगेड बनाउने योजना अघि सारेपछि लोकेन्द्र विष्ट मगरको प्रस्ताव थियो,' सानो इकाइबाट सुरु गरौँ एकैपटक ब्रिगेड सम्भव हुँदैन ।'

उनको प्रस्‍तावलाई स्वीकार गर्न पार्टी तयार भएन । यो योजना कार्यान्वयन गर्ने भन्दै कास्कीको पोखरामा कृषि फर्म पनि खुलेको थियो । ठूलो फर्म बन्‍द भएपछि अन्यत्रका फर्म पनि बन्द भए । उत्पादन ब्रिगेड बनाउने ९ वर्षअघिको सपना साकार नभएको परिस्थितिमा माओवादी अध्यक्ष प्रचण्डले आठौँ महाधिवेशनमा पनि पार्टीलाई उत्पादनसँग जोड्ने १० वटा कार्यक्रम अघि सारेका छन् । प्रचण्डले दस्तावेजमा भनेका छन्, 'पार्टीलाई उत्पादन र श्रमसँग जोड्दै अर्थतन्त्रलाई दलाल र विचौलियाबाट फुत्काउँदै बढ्दो उपभोक्तावादी संस्कृति रोक्ने र स्वतन्त्र एवं आत्मनिर्भर अर्थतन्त्र निर्माण गरी समाजवादमा पुग्ने लक्ष्य हुनेछ ।'

प्रचण्डले अघि सारेको योजनामा हरेक पालिकामा कम्तिमा ५० जना संलग्न गरी अनिवार्य एक कृषि उद्योग स्थापना गर्ने उल्लेख छ । यस्तै स्थानीय बजारलाई ध्यानमा राख्दै खाद्यान्न,पशुपालन फलफूल तरकारी, नगदेबाली घरेलु तथा साना उद्योग बजार अनुकूल स्थापना गर्ने भनिएको छ । यता, जमिनको चक्लाबन्दी गरी किसानको स्वामित्व कायमै रहने र उनीहरू शेयर धनी हुने गरी कम्पनी र सहकारी सञ्चालन गर्नुपर्ने उनको प्रस्ताव छ ।

प्रचण्डले ठूलो परिणाममा काम गर्न दुई वा दुईभन्दा बढी पालिकाले त्यस्ता उद्योग व्यवसाय सञ्चालन गर्ने योजना ल्याएका छन् । यस्तै राज्यले प्रदान गर्ने सहुलियत/सुविधा पूर्वाधार निर्माण पालिका, जिल्ला, प्रदेश र केन्द्रले सूचना सम्प्रेषण समन्वय सहजीकरण तथा सहयोग जुटाउन पहल हुनुपर्ने उनको प्रस्ताव छ ।

पार्टीलाई उत्पादनसँग जोड्न जिल्ला तहमा पालिकास्तरका उद्यमीबीच समन्वय गराउने र पालिकास्तरका उद्यमलाई चाहिने प्राविधिक तथा बजार व्यवस्थामा सघाउने भनिएको छ । प्रदेशमा कम्तिमा १०० जनालाई रोजगारी दिने गरी एक कृषि प्रशोधन केन्द्र वा बजार, चिस्यान केन्द्र सम्बन्धी उद्योगहरू स्थापना गर्ने उनको दस्तावेजमा उल्लेख छ । यता केन्द्रमा केन्द्रीयस्तरको प्रशिक्षण केन्द्र बजार व्यवस्था र त्यसका लागि शक्तिशाली उद्योग व्यवसाय पहिचान विभागको नेतृत्व गर्ने भनिएको छ ।

प्रचण्डले पार्टीका हरेक कार्यकर्ताले कम्तिमा १५ दिनमा एक पटक स्थानीय कृषि, श्रम वा स्थानीय जनसमुदायसँग बसेर श्रम गर्नुपर्ने उल्लेख गरेका छन् । उनको प्रतिवेदनमा भनिएको छ, 'प्रत्येक कमिटीले निर्देशन समिति बनाएर योजना कार्यान्वयनको अनुगमन गर्नेछ ।' यी योजना कार्यान्वयन भएको खण्डमा विदेसिएका युवालाई स्वदेश फर्काउन सकिने प्रचण्डको भनाइ छ ।

'पार्टीले धर्ती नटेक्दा जनता र श्रमसँग जोड्न सकिएन'

माओवादी केन्द्रका पूर्व नेता लोकेन्द्र विष्ट मगरले उत्पादनसँग पार्टीलाई जोड्न नसकिएको बताउँछन् । 'उत्पादन ब्रिगेड रणनीति थियो, यो योजना काल्पनिक भयो । कार्यनीति बनाउँदा सानो रूपले जाने हो इकाई हुँदै ब्रिगेडमा जानुपर्थ्यो ,' उनले भने ।

माओवादीको कार्यशैली कागजमा भन्ने व्यवहारमा कार्यान्वयन नगर्ने भएकाले पनि पार्टीलाई उत्पादनसँग जोड्ने योजना सफल नभएको उनले बताए । 'कागजमा लेख्ने, जनता र श्रमसँग पार्टीलाई जोड्ने योजना कार्यान्वयन नगर्ने परिपाटीले उत्पादनसँग पार्टीलाई जोड्ने काम सफल भएन,' उनले भने, 'पार्टीले धर्ती टेकेन ।'

माओवादी केन्द्रले श्रम गर्न नसक्ने उनको दाबी छ । 'माओवादी केन्द्रको पेट र दिमागमा बोसो लागेकाले उसले जनतामाझ गएर श्रम गर्छ भन्ने लाग्दैन,' विष्टले भने, 'बोसो लागेपछि अल्छी हुन्छ, बिलासी हुन्छ ठग्ने प्रवृत्ति सुरु हुन्छ । जनतामाझ गएर श्रम गरे त राम्रै हुनेछ ।'

प्रकाशित मिति: मंगलबार, पुस १३, २०७८ १७:२३