उपचाररत वर्षमानलाई चिनियाँ नेताको प्रश्न- वाम एकताको सम्भावना छ ?

A+ A A-

माओवादी केन्द्रका स्थायी कमिटी सदस्य वर्षमान पुन र चिनियाँ उपमन्त्री चेन झाओबीच भेटवार्ता भएको छ । त्यसक्रममा वाम गठबन्धनको एजेण्डामा छलफल भएको छ । उचारका क्रममा चीनको सेनजेनमा रहेका पुन र चिनियाँ कम्युनिष्ट पार्टीका नेता तथा उपमन्त्री झाओबीच सोमबार भेटवार्ता भएको हो ।

नेपालको समसामयिक राजनीति, वामपन्थीहरूबीचको सहकार्य र एकता, आउँदो निर्वाचनमा हुने सम्भावित तालमेल, वामपन्थीबीचको पार्टी एकताका विषयमा छलफल भएको थियो ।

उपमन्त्रीसहितको चिनियाँ टोलीसँगको भेटवार्तामा पूर्वसभामुख तथा माओवादी केन्द्रको लुम्बिनी प्रदेश अध्यक्ष ओनसरी घर्ती पनि सहभागी थिइन् । ‘उहाँहरूले माओवादीको आठौँ राष्ट्रिय महाधिवेशनको सफलताको शुभकामना दिनुभयो, अध्यक्ष क. प्रचण्डको नेतृत्वमा माओवादी अझ सुदृढ हुने विश्वास व्यक्त गर्दै चिनियाँ कम्युनिष्ट पार्टी र नेकपा माओवादी केन्द्र सवैभन्दा नजिकका मित्र भएकाले आगामी दिनमा यो सम्बन्ध अझ बलियो बनाउने कुरा गर्नुभयो,’ पुनले भने ।

चिनियाँ पक्षको जिज्ञासाको जबाफमा नेता पुनले विचार मिल्ने तथा असल क्रान्तिकारी कम्युनिष्टहरूका बीचमा पार्टी एकता गर्ने, त्यो संभव नभए सहकार्य र गठबन्धन गरेर आगामी चुनाव र त्यसभन्दा पछिसम्म जानका लागि माओवादी तयार रहेको बताएका थिए ।

विगतमा एमाले अध्यक्ष केपी ओलीको संविधानविरोधी, पार्टीको विधान र सहकार्यको भावनाविरोधी गतिविधिका कारण नेकपा एकताले निरन्तरता पाउने नसकेको र अहिले पनि ओलीकै कारण एमालेसँग सहकार्य संभव नभएको बताएका पुनले ओली गुणात्मक रूपमा रुपान्तरण भएर आएमा सहकार्यका लागि छलफल गर्न सकिने बताएका थिए ।

चिनियाँ पक्षले नेपालका वाम दलहरू एक भएर अघि बढुन् भन्ने शुभेच्छा व्यक्त गरेको पुनले जानकारी दिए । अहिलेको गठबन्धन आगामी चुनावसम्म जाने र त्यसपछि पनि सहकार्य गर्न तयार रहेको बताएका पुनले चिनियाँ पक्षको एमसीसी परियोजनाबारेको जिज्ञासाको समेत जबाफ दिएका थिए ।

एमसीसीबारे नेपालमा बहस चलिरहेको र गठबन्धनले समेत अध्ययनका लागि कार्यदल बनाएको प्रसंग उल्लेख गर्दै पुनले कार्यदलको रिपोर्ट आएपछि राष्ट्रिय हितअनुकुल हुनेगरी मित्र राष्ट्रहरूको सहयोग स्वीकार गर्ने नेपालको नीतिअनुरुप सरकार र गठबन्धन अघि बढ्ने बताएका थिए ।

बैंककमा अपेक्षित सुधार नभएपछि थप उपचारका लागि चीन पुगेका पुनको स्वास्थ्यमा उल्लेख्य सुधार भएपछि उनी द्वीपक्षीय भेटवार्तामा जुटेका हुन् । वंशाणुगत तथा विश्वमा विरलै देखिने जण्डिस रोगका कारण झण्डै ३ महिनादेखि उपचार गराइरहेका पुन माओवादीको आठौँ राष्ट्रिय महाधिवेशन जारी रहँदा चीनमा उपचारारत छन् ।

प्रकाशित मिति: मंगलबार, पुस १३, २०७८ १४:३७