प्रचण्डमाथि कार्कीका आरोप: मार्क्सवादको उपहास, अन्तरविरोधमा रमेर उपलब्धिलाई बेवास्ता

प्रचण्डमाथि कार्कीका आरोप: मार्क्सवादको उपहास, अन्तरविरोधमा रमेर उपलब्धिलाई बेवास्ता

A+ A A-

नेकपा माओवादी केन्द्रका अध्यक्ष पुष्पकमल दाहाल प्रचण्डले महाधिवेशनमा प्रस्तुत राजनीतिक प्रतिवेदनमा आत्मकेन्द्रित समीक्षा गरेका छन् । आत्मालोचना गर्दै उनले आफ्नो व्‍यक्तिवादी र उदारवादी चरित्रका कारण पार्टी विभाजन भएको, प्रगतिशील संविधान बनाउन नसकेको, पार्टीको जनवादी केन्द्रीयतालाई भत्काएको उल्लेख गरेका छन् ।

प्रचण्डको प्रतिवेदनमाथि फरक मत राख्दै नेता राम कार्कीले उनीमाथि मार्क्सवादको उपहास गरेको र बैरी पक्षको अन्तरविरोधमा रमाएर जनताको क्रान्तिको संघर्षमा बेवास्ता गरेको आरोप लगाएका छन् ।

कार्कीले लोकतन्त्रमाथि पुँजीवादीहरूको एकाधिकार तोड्न नसक्नु पार्टीको गल्ती भएको औँल्याएका छन् । 'हामीले प्रजातन्त्रको राजनीतिक पक्षमाथि ध्यान दिनु भनेको प्रजातन्त्रको सामाजिक पक्ष अर्थात् रोजगारी, आवास, स्वच्छ पिउने पानी, सडक सञ्जाल, स्वास्थ्य शिक्षा आदिमाथि उत्पीडित वर्गको पहुँच र अधिकारसहितको प्रजातन्त्रलाई त्याग्नु होइन । यो अवधिमा प्रजातन्त्रको सामाजिक पक्षप्रति हाम्रो पार्टी विल्कुल उदासिन रह्यो,' उनले भनेका छन् ।

प्रजातान्त्रिक सामाजिक पक्ष क्रान्तिकारी भूमिसुधार, जनमुखी शिक्षा नीति र सुरक्षा क्षेत्रका विषयमा शान्ति प्रक्रियामा आएपछि पार्टीले भूमिका निर्वाह नगरेको उनले उल्लेख गरेका छन् । कम्युनिस्ट पार्टीले संसदको उपयोग विचार र नीति निर्माणमा गर्नुपर्ने भए पनि नेतृत्वले पार्टीले संसदीय भासमा लगेको कार्कीको भनाइ छ । 'क्रान्तिकारी कम्युनिस्टहरूले संसदको उपयोग गर्दा वा सरकारमा सामेल हुँदा त्यसलाई शासन गर्ने सौभाग्यका रूपमा बुझ्दैनन् । बरु त्यसको ठीक विपरीत त्यो अवसरलाई विचार, ज्ञान र सोच्ने तरिका फेर्ने कामका निम्ति उपयोग गर्दछन्,' कार्कीले भनेका छन्, 'हाम्रो सन्दर्भमा त्यस्तो कतै नदेखिएकाले हामी संसदवादमा भासिएकै कुरालाई प्रमाणित गर्दछ ।'

यो पनि : प्रचण्डको प्रतिवेदनमा फरक मत राख्दै राम कार्कीले औँल्याए संघीयता बुख्याँचा हुने खतरा (पूर्णपाठ)

बैरी पक्षको अन्तरविरोधमा पार्टीले खेल्दा जनताको क्रान्तिकारी संघर्षबाट प्राप्त उपलब्धिमा खतरा उत्पन्न भएकाले पार्टी सच्चिनुपर्ने उनको भनाइ छ । 'जनताको क्रान्तिकारी संघर्षलाई नै समाप्त पार्ने गरी बैरी पक्षबीचको अन्तरविरोधमा खेल्ने चातुर्यलाई पूर्ण रूपमा त्याग्नु पर्दछ,' कार्कीले भनेका छन् ।

नेतृत्वमा आएको विचलनका कारण पार्टीमा मार्क्सवादी विचारधारात्मक कार्य स्वीकार नभएकाले नेतृत्व सच्चिनुपर्ने आवाज कार्कीले उठाएका छन् । 'पार्टीको ऐतिहासिक दस्तावेजमा स-गौरव अमूक र अमूक नेताको मेलले इतिहास नै कोल्टे फर्कियो भनेर लेखिनु मार्क्सवादको उपहास हो,' उनले भनेका छन् ।

पार्टीको जीवनमा र राजनीतिक नीति निर्माण निरन्तर विचलित हुँदा कार्यकर्तामा विराग र विरक्‍तता निम्तिएको उनले बताएका छन् । 'नीति निर्माणमा विचलित हुँदा कार्यकर्ताको आत्मविश्वास र सिर्जनशीलतालाई क्रमशः समाप्त पार्दै लगेको छ । यस्तो कार्यकर्ता भरिएको पार्टीले क्रान्तिको रक्षाका निम्ति प्रतिक्रान्तिसँग लड्ने साहस जुटाउन सक्दैन,' उनले भनेका छन् ।

यो पनि : राम कार्कीको फरक मत: चुनाव लड्ने र सरकार बनाउने गतिविधिमा पार्टी बन्धक बन्न हुँदैन

पार्टीभित्र भ्रष्ट आचरणलाई दुरुत्साहित गर्दै उत्पीडित सामाजिक वर्गको मन जित्न केन्द्रित हुनुपर्ने उनले बताएका छन् । 'पार्टीले आफैँभित्रको भ्रष्ट आचरणलाई दुरुत्साहित गरेर र उत्पीडित सामाजिक वर्गको मन जित्नु पर्दछ र त्यसरी बलशाली भएपछि समाजको भ्रष्ट तत्वविरुद्ध आन्दोलन चलाउनु पर्दछ,' उनको प्रतिवेदनमा उल्लेख छ ।

कार्कीको फरक मत :

प्रकाशित मिति: मंगलबार, पुस १३, २०७८ १३:१३