एक हजार अंकले घटेपछि नेप्सेको लय फेरिँदै, जानकार भन्छन्- बढ्ने आधार धेरै छ

A+ A A-

२ भदौमा नेप्सेले ३२१८ को विन्दु छुँदै अलटाइम हाई रेकर्ड तोडेको थियो । त्यसको भोलिपल्टबाट घटेको बजार त्यसपछिका दिनहरूमा भने निरन्तर फराकिलो अंकले घट्यो । २७ मंसिरमा आइपुग्दा नेप्सेले न्यूनतम विन्दु २२५८ सम्म छुन पुग्यो । त्यसै दिन २३५२ अंकमा पुगेर बन्द भएको नेप्से त्यसयता उतारचढावपूर्ण बन्दै भए पनि उकालो नै लागिरहेको छ ।

आइतबार यो सामाचार तयार पार्दासम्म नेप्से २६ सय अंकको हाराहारीमा आइपुगेको छ । आइतबार कारोबार सुरु भएको डेढ घण्टामा नै नेप्से ७० अंकले बृद्धि भइसकेको छ ।

तीन महिनामा बजार ३२१८ अंकबाट २२५८ अंकमा पुगी झण्डै एक हजार अंकले नेप्से घट्न पुगेको थियो । तर २२५८ अंकमा टेवा पाएर फर्किएको बजार त्यसपछि भने निरन्तर उकालो लागिरहेको छ । यसबीचका केही दिन नेताको विवादास्पद भनाइ र अर्थमन्त्रीको शेयरबजारविरोधी अभिव्यक्तिले बजार घटबढ हुन सघायो । कहिले सकारात्मक सर्किट लाग्यो भने कहिले झण्डै ९० अंकसम्म नेप्से घट्यो ।

इन्भेष्टर फोरमका निर्वतमान अध्यक्ष चन्द्र सिंह साउद बजार पहिलेबाटै बुलिस ट्रेण्डमा रहे पनि नियामक निकाय र नेताहरूका अभिव्यक्तिले बजार घट्न सघाएको बताउँछन् । बजार बुलिस ट्रेण्डमै रहेकोले बीचमा घटबढ भए पनि अन्ततः बजार केही समय निरन्तर बड्ने उनको विश्लेषण छ ।

उनी भन्छन्, 'बजार करेक्सन मुडमा हुँदै गर्दा सेबोनको विज्ञप्तिदेखि नियामक निकायको पुँजीबजारविरोधी नीति र अहिले राजनीतिक दलको अभिव्यक्तिले पनि बजार थप घट्न पुगेको हो । यद्यपी अब बढ्छ ।’

केही महिनायता चरम तरलता अभावबाट गुज्रिएका बैंक तथा वित्तिय संस्थाहरूमा राष्ट्र बैंकको नयाँ नीति तथा निक्षेपको दर बढ्नुले पनि तरलता केही सहज हुने अनुमान गर्न सकिन्छ । तीन सयभन्दा बढी वस्तुको आयातमा अब आयातकर्ताले शतप्रतिशत मार्जिन राख्नुपर्ने व्यवस्थाले पनि बजार बढ्न सघाउने देखिन्छ । आयातमा कडाइ गर्दा छोटो समयमा नाफा कमाउने उदेश्यले शेयरबजारमा भित्रने संभावाना बढ्छ ।

पछिल्लो ६ कारोबारको दिन हेर्दा बढेको दिनमा नेप्से भारी अंकले बढेको छ भने घट्दा सामान्य अंकले गिरावट आएको छ । यसको जानकारहरू नेप्से आक्रामक रूपमा बढ्दा भोलिपल्ट लगानीकर्ता सर्टटम प्रोफिट बुक गर्दै बजारबाट बाहिरिने हुँदा पनि भोलिपल्ट बजार सानो अंकले घट्ने गरेको बताउँछन् । यद्यपि लामो करेक्सनपछि अब भने बजार आक्रामक रूपमा अगडि बढ्ने उनीहरूको बुझाइ छ ।

तर, लगानीकर्तामा कारोबार गर्ने आत्मविश्वास अझै पलाइसकेको देखिँदैन । एक हजार अंकले नेप्से घटेपछि लगानीकर्ता बुलिस् ट्रेण्डलाई पर्खने र बजारमा शेयर होल्ड गर्ने रणनीति अपनाउन पुगे । जसले गर्दा नेप्सेमा ठूलो अंकको वृद्धि भए पनि सोहीअनुसार लगानीकर्ता उत्साही बन्न सकेका छैनन् । नेप्सेले पोजेटिभ सर्किट लगाउँदा होस् या एक सय अंकले बृद्धि हुँदा बजार तीन अर्बदेखि साँढे चार अर्ब रुपैयाँमै कारोबार सीमित बनिरहेको छ ।

‘३२ सयमा बजारमा पसेका लगानीकर्ता घाटा खाएर बाहिरिनु भन्दा पर्खनु उचित हो नी,' साउद भन्छन्, ‘यही मनसायले पनि किन्ने लगानीकर्ता बढेर नेप्से बढे पनि आफूसँग भएको शेयर भने बेच्न अझै तयार छैनन् ।’

प्रकाशित मिति: आइतबार, पुस ११, २०७८ १४:३९