यी हुन् कांग्रेसको नवनिर्वाचित केन्द्रीय समितिले गरेका चार निर्णय

A+ A A-

चार वटा निर्णय गर्दै नेपाली कांग्रेसको नवनिर्वाचित केन्द्रीय समितिको पहिलो बैठक सकिएको छ । पार्टी केन्द्रीय कार्यालय सानेपामा शनिबार दिउँसो बसेको १४औँ महाधिवेशनबाट निर्वाचित नेपाली कांग्रेसको पहिलो बैठक पार्टीलाई अझै सुदृढ एकताका साथ लैजाने संकल्पसहितका ४ वटा निर्णय गरेको हो ।

बैठकले पार्टीको महाधिवेशनमा शुभेच्छा प्रकट गर्ने आउने विभिन्न राजनीतिक दलका नेताहरू, महाधिवेशन सम्पन्न गर्न पार्टीको विभिन्न तहमा रहेर काम गरेका केन्द्रीय निर्वाचन समिति, सञ्चार माध्यामसहितलाई धन्यवाद दिने निर्णय गरेको छ ।

त्यसैगरी राष्ट्रियसभा निर्वाचन प्रयोजनका लागि नेपाली कांग्रेसका उम्मेदवारहरूको लागि पार्टीका सभापति शेरबहादुर देउवाको हस्ताक्षर प्रयोग गर्ने निर्णय पनि बैठकले गरेको पार्टीका महामन्त्री गगन थापाले जानकारी दिए ।

'राष्ट्रियसभा निर्वाचन प्रयोजनका लागि नेपाली कांग्रेसको तर्फबाट उम्मेदवारी दिनका लागि पार्टी सभापति शेरबहादुर देउवाको हस्ताक्षर प्रयोग गर्ने कार्यादेश दिने निर्णय पनि गरिएको छ,' थापाले भने, 'त्यसैगरी निर्वाचन आयोगमा दल दर्ता गर्ने प्रयोजनका लागि दलको तर्फबाट मुख्य सचिव कृष्णप्रसाद पौडेललाई जिम्मेवारी दिने निर्णय पनि गरिएको छ ।’

‘१४औँ महाधिवेशनको जुन नारा थियो–उत्साह, एकता र रुपान्तरण । त्यो नाराको मर्म अनुरुप इतिहासले सुम्पेको दायित्वलाई आत्मासात गर्दै अझै सुदृढ एकता बनाएर पार्टीको अगाडिको यात्रालाई अगाडि बढाउने संकल्प यो बैठकले गरेको छ,' थापाले भने ।

मंसिर २४ देखि २८ सम्म भएको कांग्रेसको १४औँ महाधिवेशनले सभापति देउवासहित १३४ जनाको केन्द्रीय समिति निर्वाचित गरेको छ । निर्वाचित केन्द्रीय समितिका पदाधिकारी तथा सदस्यहरूले आजै निर्वाचित भएको प्रमाण पत्र पनि ग्रहण गरेका छन् ।

प्रकाशित मिति: शनिबार, पुस १०, २०७८ १५:४५