कतारमा विश्वकपकेन्द्रित श्रम कानुन : भिसा व्यापार गरे ३ वर्ष जेलसहित ५० हजार रियाल जरिवाना

कतारमा विश्वकपकेन्द्रित श्रम कानुन : भिसा व्यापार गरे ३ वर्ष जेलसहित ५० हजार रियाल जरिवाना

A+ A A-

विश्वकप फुटबलको समय नजिकिएसँगै कतारले विदेशी कामदारका हकअधिकार व्यवस्थित गर्न बनाएको कानुन लागू गर्न रोजगारदाता कम्पनीलाई दबाब दिएको छ । कतारमा कार्यरत तथा रोजगारीका लागि भित्रिने विदेशी कामदारका हकअधिकार व्यवस्थित गर्न बनाएको कानुन लागू गर्न कतारले रोजगारदाता कम्पनीहरूलाई दबाब दिन थालेको हो ।

गतसाता कतारले आवासीय अनुमति बनाउन तथा नवीकरण गर्न कामदारसँग लिएको राहदानी (पासपोर्ट) फिर्ता नगर्ने रोजगारदाताहरूलाई २५ हजार रियाल (करिब ८ लाख रुपैयाँ) जरिवाना गर्ने जनाएको थियो ।

कतारको आन्तरिक मन्त्रालयले आवासीय अनुमतिपत्र बनाउने तथा नवीकरण गर्ने प्रयोजन सकिएपछि विदेशी कामदारको राहदानी फिर्ता नगर्ने रोजगारदातालाई त्यस्तो आग्रह गरेको हो । विदेशी कामदारको राहदानी राखेका रोजगारदाता कम्पनीलाई उनीहरूको पासफोर्ट तत्काल फिर्ता गर्न मन्त्रालयले निर्देशन दिएको कतारी सञ्चारमाध्यम द पेनन्सुलले जनाएको छ ।

गत सोमबार आन्तरिक मन्त्रालयले आयोजना गरेको वेबिनारमा विदेशी कामदारको राहदानी राख्ने रोजगारदाता कम्पनीलाई जरिवानासँगै समस्या हेरेर ३ वर्ष जेल सजायसमेत गर्ने बताइएको पेनन्सुलमा उल्लेख छ । यस्तै, विदेशी कामदारको आवासीय अनुमति नवीकरण गर्ने समयावधि सकिएको ९० दिनभित्र नवीकरण नगराउने रोजगारदातालाई १० हजार रियालसम्म जरिवाना हुने मन्त्रालयले जनाएको छ ।

वेबिनारमा विभिन्न मुलुकका २ सय ८० जनाभन्दा बढी सहभागिता थियो । कार्यक्रममा भिसाको म्याद सकिएर अवैधानिक भएकाहरूलाई कतारमै बस्नेलाई कानुनी बनाउन दिएको अवसरका बारेमा छलफल गरिएको थियो । उक्त छलफलमा विभिन्न मुलुकका श्रमविज्ञहरू सहभागी रहेको पेनन्सुलले उल्लेख गरेको छ । वेबिनारमा सहभागी विदेशी श्रमविज्ञहरूले कतारको पछिल्लो नीतिगत कानुनको स्वागत गरेका थिए ।

गैरकानुनी रूपमा भिसाको किनबेच गरेमा कडा कारबाही गर्ने पनि मन्त्रालयले चेतावनी दिएको छ । विदेशी कामदारलक्षित भिसाको किनबेच गर्ने स्वदेशी तथा विदेशी विचौलियालाई ३ वर्षसम्म जेल सजाय तथा ५० हजार कतारी रियालसम्म जरिवाना गर्ने आन्तारिक मन्त्रालयले जनाएको छ ।

यसैगरी, पुनः सोही गल्ती दोहोरिए १ लाख रियाल जरिवानासमेत थपिने जनाइएको छ । कतारमा करिब साढे ४ लाख कामदार कार्यरत रहेको त्यहाँस्थित नेपाली दूतावासले जनाएको छ ।

कतारको पछिल्लो कानुनले नेपाली कामदारलाई समेत फाइदा पुग्ने दूतावासका कन्सुलर सह–प्रमुख लक्ष्मण खनालले बताए । कतारमा कार्यरत नेपाली कामदारको राहदानी रोजगारदाता कम्पनी राख्दै आए पनि नयाँ कानुन लागू भएपछि श्रमिककै साथमा हुने उनको भनाइ छ ।

वैधानिक बन्न २० हजारको आवेदन

कतारले आगामी ३१ डिसेम्बरभित्र अवैधानिक रूपमा बसेका विदेशी कामदारलाई रोजगारदाता कम्पनीमै वैधानिक हुने अवसरसहित समयसीमा दिएको छ ।

कतारले वैधानिक बन्न दिएको सुविधा कार्यक्रममा करिब २० हजार विदेशी कामदारले आवेदन दिइसकेको त्यहाँको आन्तरिक मन्त्रालयले जनाएको छ । कतारमा ३० हजारभन्दा बढी नेपाली कामदार पनि अवैधानिक हैसियतमा बसेर काम गरिरहेको नेपाली दूतावासको अनुमान छ ।

कतारले वैधानिक बन्न दिएको स्किममा नेपालीहरू सहभागी भइरहेको दूतावासले जानकारी दिएको छ । कतारले अवैधानिक विदेशी कामदारलाई वैधानिक बन्न दिएको अवसरमा सहभागी भएर वैधानिक हुन दूतावासले नेपाली कामदारलाई आग्रह गरेको छ ।

घरेलु रोजगारीमा गएका अधिकांश नेपाली कामदार अवैधानिक रूपमा बसेर काम गरिरहेको दूतावासको अनुमान छ ।

याे पनि...

कतारको अन्यायपूर्ण निर्णय : रंगशाला बनाउने कामदारले विश्वकप हेर्न नपाउने
एमनेस्टीको प्रतिवेदन : कतारमा नेपाली कामदारमाथि चरम शोषण, बोल्दैन सरकार
अवैधानिक रूपमा कतारमा बसिरहेकाहरूलाई वैधानिक हुन बाटाे खुला

प्रकाशित मिति: बिहीबार, पुस ८, २०७८ १८:३५