कतारको अन्यायपूर्ण निर्णय : रंगशाला बनाउने कामदारले विश्वकप हेर्न नपाउने

A+ A A-

सन् २०२२ मा कतारमा विश्वकप फुटबल हुँदैछ । विश्वकपका लागि कतारले झण्डै एक दशकदेखि रंगशाला निर्माणलगायतका तयारी गरिरहेकाे छ । आगामी वर्षको २१ नोभेम्बरदेखि सुरु हुने विश्वकप फुटबलको २२औँ संस्करणका लागि कतारले विभिन्न शहरमा आठवटा रंगशाला निर्माण गरेको छ । यी रंगशालामध्ये केहीको काम सम्पन्न भएर पनि फुटबल खेलको अभ्यास भइरहेकाे छ ।

कतारमा हुने विश्वकप फुटबलमा ३२ टिमले प्रतिस्पर्धा गर्दैछन् । निमार्णाधीन कतार रंगशालाको निर्माणक्षेत्रमा बहुसंख्यक वैदेशिक कामदारहरू खटिएका छन् । तीमध्ये सबैभन्दा धेरै नेपाली, भारतीय, पास्कितानी, बंगलादेशी र श्रीलंकन कामदारहरू छन् । तर, आफ्नै मिहिनेत र परिश्रमबाट निर्मित रंगशालामा हुने विश्वकपका खेलहरू भने यी कामदारले हेर्न नपाउने भएका छन् । कतारको पछिल्लो निर्णयले रंगशाला निर्माणमा खटिएका विदेशी कामदारले विश्वकप फुटबल हेर्न नपाउने भएका हुन् ।

विदेशी कामदारलाई चार महिना बिदा

आगामी वर्ष हुने विश्वकप फुटबलका लागि कतार सरकारले विदेशी कामदारलाई चार महिना बिदा दिने निर्णय गरेको छ ।

गतसाता कतार सरकारको प्रशासनिक विकास, श्रम तथा सामाजिक मामिला मन्त्रालयले विश्वकपको समयमा दुई महिनाअघि नै ‘अत्यावश्यकभन्दा बाहिरका’ विदेशी कामदारलाई चार महिना बिदा दिने घोषणा गरेको छ ।

२१ सेप्टेम्बर २०२२ देखि १८ जनवरी २०२३ सम्म विश्वकपको समयमा प्राय: तल्लो तहका विदेशी कामदारले बिदा पाउनुपर्ने श्रम मन्त्रालय प्रस्ट पारेको छ । कतारले फुटबल हेर्न विश्व समुदायलाई आमन्त्रण गरिरहेका बेला विदेशी कामदारलाई बिदाको घोषणा गर्नुलाई अर्थपूर्ण रूपमा हेरिएको भन्दै पश्चिमा मिडियाले आलोचनासमेत गरिरहेका छन् ।

नेपाल, भारत, बंगलादेशसहित करिब २६ लाख विदेशी कामदार रंगशालालगायत कतारको निर्माण क्षेत्रमा कार्यरत छन् । जसमध्ये कम्तीमा ९ देखि ११ लाख नेपालीसहित अन्य देशका कामदार रंगशाला निर्माणका खटिएको गल्फ न्युजले जनाएको छ । उनीहरूसहित विश्वकप हुने समयमा २० लाख विदेशी कामदारले बिदा पाउँदैछन् ।

कतारमा २८ दिन चल्ने विश्वकप हेर्न कम्तीमा १५ लाख दर्शक भित्रिने कतारको अनुमान छ । सोहीअनुसार कतारले होटल र लजहरूको व्यवस्थापन गरिरहेको बेला रोजगारीका लागि कतार पुगेका विदेशी कामदारलाई भने बिदा दिनुले वैदेशिक रोजगारीमा जानेहरू दु:खी छन् ।

रंगशाला निर्माणमा खटिएका र कतारमै पसिना बगाएका कामदारलाई बिदामा पठाउने निर्णय गरेर कतारले अन्याय गरेको कतारका लागि पूर्वराजदूत नारदनाथ भारद्वाजले बताए । कतिपय विदेशी कामदार कतारमा हुने फुटबल हेर्नका लागि भनेर त्यहाँ रोजगारीका लागि पुगेको उनको बुझाइ छ ।

‘कतार सरकारले विदेशी कामदारलाई विश्वकपका समयमा बिदा दिएर अन्याय नै गर्‍यो । रोजगारीका लागि मात्र कामदार लिने तर, विश्वकप जस्तो समयमा बिदा दिँदा कतार सरकारमाथि नै प्रश्न सिर्जना हुन्छ’, उनले भने, ‘आफूले काम गरेको रंगशालामा हुने फुटबल हेर्ने रहर सबै कामदारको हुन्छ । उनीहरूको सपना पनि हो । तर, कतारको पछिल्लो निर्णयले भविष्यमा कामदार भित्र्याउन समस्या हुन्छ ।’

रोजगारीभन्दा ठूलो विश्वकप ठानेका विदेशी कामदारलाई विश्वकप हुने समयमा बिदा दिने निर्णयलाई कतारले पुनर्विचार गर्नुपर्ने उनको भनाइ छ । कतारले विश्वकपका बेला विदेशी कामदारलाई कसरी बिदामा स्वदेश फर्काउने हाे भन्ने निश्चित मापदण्ड प्रस्ट नभएको पूर्वश्रम सचिव तथा रोजगारविज्ञ पूर्णचन्द्र भट्टराईले बताए ।

हाल कतारमा ४ लाख नेपाली कामदार कार्यरत छन् । आगामी वर्ष हुने विश्वकपको समयमा कम्तीमा ३ लाख नेपालीले बिदा पाउने कतारस्थित नेपाली दूतावासको अनुमान छ ।

प्रकाशित मिति: बुधबार, मंसिर २२, २०७८ १२:३३