मैले विवेकशील साझा छाडेको हो, राजनीति होइन: रञ्जु दर्शना (अन्तर्वार्ता)

A+ A A-

विवेकशील साझा पार्टीकी नेतृ रञ्जु दर्शनाले मूल नेतृत्वमा अधिकतम ढोँग पलाएको भन्दै पार्टी परित्यागको घोषणा गरेकी छिन् । रञ्जुले विवेकशील पार्टीले संघीय गणतान्त्रिक नेपालमा वैकल्पिक राजनीतिको खोल ओढेर अत्यधिक फोहोर गरिरहेको आरोप लगाएकी छिन् ।

आठ वर्षदेखि वैकल्पिक राजनीतिको वकालत गर्दै आएकी रञ्जुले अध्यक्ष रवीन्द्र मिश्रलाई पत्र लेख्दै सोही संगठनमा बसेर नेपाली राजनीतिमा थप फोहोर बढाउन नसक्ने भन्दै पार्टीत्याग गरेकी हुन् । पार्टी परित्यागको घोषणा गरेकी रञ्जु दर्शनासँग शिलापत्रले गरेको संक्षिप्त कुराकानी:

पार्टी छाड्नुभयो, विवेकशील साझा पार्टी अब तपाईंका लागि विवेकशील नरहेको हो ?

छैन, त्यो अब विवेकशील रहिरहेन । मलाईचाहिँ धेरै समयदेखि राखेको खिल आज निकाल्न पाएजस्तो लागिरहेको छ । हुन त, खिल पर्दा पनि दुख्छ । निकाल्दा पनि दुख्छ । तर, निकालिसकेपछि घाउ निको हुँदै जान्छ । आज मलाई त्यही फिल भइरहेको छ ।

राजनीति छाड्नुभएको हो ?

मैले विवेकशील साझा पार्टी छाडेको हो, राजनीति छाडेको छैन । म राजनीति छाड्दिनँ ।

त्यसो भए अबको बाटो के त ?

केही समय स्वतन्त्र रहेरै बस्छु । स्वतन्त्र भएरै राजनीतिमा युवा र महिला साथीहरूसँग हामीले बोक्ने मुद्दामा मन्थन गरेरै अघि बढ्छु ।

कांग्रेस, एमाले वा ठूला पार्टी प्रवेश गर्ने योजना छ कि ?

अहिलेलाई त्यस्तो कुनै सम्भावना छैन । एउटा समस्या छाडेर अर्को समस्यामा हामफाल्न त्यति ठीक नहोला ।

भनेको कांग्रेस-एमालेको राजनीतिसँग तपाईं अहिले पनि सहमत हुनुहुन्न ?

धेरै सहमत छैन । तर, मैले के महसुस गरेँ भने पार्टीलाई मिलाएर जान गाह्रै छ । पार्टीले जनताको दैनिक जीवनमा केही न केही सकारात्मक प्रभाव पार्न सक्नुपर्छ । थोरै भए पनि सकारात्मक परिवर्तन जनतामा दिन नसक्ने हो भने त्यो फगत एउटा छलफल गर्ने फोरम मात्र बन्छ । त्यसैले जो पार्टीको जरा मजबुत छ उसले सुधार भएर गयो भने देशकै लागि राम्रो हुन्छ ।

विवेकशीलमा धेरै वर्ष बिताउनुभयो । अहिले छाड्दा पछुतो लागेन ?

अहँ, पछुतो छैन । विवेकशील पार्टीमा मैले आठ वर्ष बिताए । विवेकशीलको राजनीति अघि बढाएर यति वर्ष बिताउँदा मलाई केही पछुतो छैन । मैले धेरै समय लगाएर सिक्नुपर्ने पाठ योबीचमा सिकेकी छु ।

कर्मा तामाङजीले वक्तव्य निकालेर पुरानै पार्टीमा फर्किनुस् भन्नुभएको छ । त्यो धारमा फर्किने सम्भावना कति छ ?

आजको मितिसम्म त्यो सम्भावना छैन ।

मिलन पाण्डे समूहसँग सहकार्य हुन्छ ?

रञ्जु अब स्वतन्त्र हुन्छ ।

यो पनि पढ्नु्स् :

रञ्जु दर्शनाले छोडिन् विवेकशील साझा

प्रकाशित मिति: बिहीबार, पुस ८, २०७८ १२:०८