मुख्यमन्त्री पाण्डेले ‘स्पष्टीकरण’ नदिए एमालेले प्रदेशसभा बैठक चल्न नदिने

मुख्यमन्त्री पाण्डेले ‘स्पष्टीकरण’ नदिए एमालेले प्रदेशसभा बैठक चल्न नदिने

A+ A A-

बागमती प्रदेशका मुख्यमन्त्री राजेन्द्र पाण्डेले १४ वटा मन्त्रालय विस्तार, प्रदेशको महत्वका योजनाको कटौती गरेको विषयमा स्पष्टीकरण नदिए प्रदेशसभा बैठक चल्न नदिने चेतावनी दिएको छ ।

हेटौँडामा बुधबार अपराह्न बसेको एमाले बागमती प्रदेश संसदीय दलको बैठकले मुख्यमन्त्री पाण्डेले चित्तबुझ्दो स्पष्टीकरण नदिए प्रदेशसभाको अवरोध कायम राख्ने निर्णय गरेको हो । बुधबार बसेको प्रदेशसभा बैठक पनि एमालेको अवरोधपछि स्थगित भएको थियो । सभामुख सानुकुमार श्रेष्ठले भोलि (बिहीबार) बिहान ११ बजेसम्मलाई बैठक स्थगित गरेका छन् ।

प्रदेशसभा बैठकमा बोल्दै बागमतीका पूर्वमुख्यमन्त्री डोरमणि पौडेलले गठबन्धन सरकारका कारण प्रदेशको बदनाम भएको आरोप लगाउँदै एमालेले यसलाई रोक्ने बताएका थिए । उनले मन्त्रालय विस्तारसँगै महत्वका योजना कटौती गर्नुको कारण माग गरे । मुख्यमन्त्रीका कारण प्रदेशको बदनामी हुन नदिने भन्दै पौडेलले चित्तबुझ्दो जवाफ मागेका हुन् ।

बागमतीको गठबन्धन सरकारले १४ वटा मन्त्रालय विस्तार गर्दै खर्च बढाएको, आफ्नो पार्टीको कमिटी बनेमा मात्रै बजेट हाल्ने अभिव्यक्ति मुख्यमन्त्रीबाट दिएको र अघिल्लो सरकारले अघि सारेको महत्वका योजना कटौती गरेर जनभावना विपरीत काम गरेको भन्दै एमालेले संसद अवरुद्ध गरेको हो ।

प्रदेश सरकारले नसच्चिए प्रदेशसभाको अवरोध कायम राख्ने निर्णय भएको एमाले सांसद तथा पूर्वमन्त्री सरेश नेपालले जानकारी दिए । ‘गठबन्धन सरकारले अलोकतान्त्रिक र जनविरोधी क्रियाकलापलाई तीव्रता दिएकोप्रति संसदीय दलको बैठकले निन्दा र भत्सर्ना गरेको छ । मुख्यमन्त्रीले चित्तबुझ्दो स्पष्टीकरण नदिएसम्म बैठक अवरुद्व गर्ने निर्णय गरेको छ,’ पूर्वमन्त्री नेपालले भने ।

दलको बैठकलाई सम्बोधन गर्दै एमाले बागमती प्रदेश संसदीय दलका नेता अष्टलक्ष्मी शाक्यले प्रदेश सरकारको गतिविधिले संघीयतामाथि प्रहार गरेको बताइन् । उनले राज्य स्रोतको दुरुपयोग गर्दै सरकार सञ्चालन भएकाले एमाले चुप लागेर नबस्ने बताएकी छन् । प्रदेश सरकारका कारण व्यवस्थामाथि नै प्रश्न उठेको भन्दै सरकारको गलत कामविरुद्ध एमाले प्रदेशसभामा सशक्त रूपमा उभिने शाक्यको भनाइ छ ।

प्रकाशित मिति: बुधबार, पुस ७, २०७८ १८:१४