महिला हिंसाविरुद्ध गीति चलचित्रमार्फत विद्रोही भूमिकामा देखिँदै राजेश हमाल

महिला हिंसाविरुद्ध गीति चलचित्रमार्फत विद्रोही भूमिकामा देखिँदै राजेश हमाल

A+ A A-

चलचित्रमार्फत सामाजिक न्याय र आम नागरिकको हक अधिकारका लागि आवाज उठाएर सर्वसाधारणको ढुकढुकीमा बसेका महानायक राजेश हमाल सोही मुद्दामा गीति चलचित्रमार्फत देखिने भएका छन् ।

महानायक हमालको मूल विद्रोही भूमिकामा माधव न्यौपानेको गीत तथा कथामा बनेको ‘कठै म त कठै’ बोलको गीति चलचित्र छायांकन सम्पन्न भएको छ । काभ्रेको कुशादेवीमा छायांकन गरिएको गीत महिला हिंसाको बीभत्स रूप बलात्कारविरुद्ध निर्माण भएको छ ।

सती प्रथामाथि बनेको चलचित्र झोलाका निर्देशक यादव भट्टराईले निर्देशन गरेको गीति चलचित्रमा खुमन अधिकारी, देवी घर्ती र शान्तिश्री परियारले स्वर दिएका छन् भने मूल भूमिकामा महानायक राजेश हमालसँगै कलाकारहरू सुनिशा बजगाई, उमेश खड्का, लक्ष्मी गिरी र सरिता गिरी रहेका छन् ।

विज्ञान प्रविधिको विकाससँगै मानिस यो चेतनासम्म आइपुग्दा पनि महिलामाथि हेर्ने पितृसत्तात्मक दृष्टिकोण आजका दिनसम्म पनि नबदलिएर महिलामाथि हुने नमिठो अत्याचारविरुद्ध गीत निर्माण भएको निर्देशक यादव कुमार भट्टराईले बताए ।

राज्य व्यवस्था, प्रशासन र राजनीतिक चलखेलका कारण अपराधीहरू संरक्षित गर्ने र पीडितले न्याय नपाउने कारण पीडित कसरी विद्रोही भएर निस्किन्छ र त्यसले समाजमा कस्तो प्रभाव पार्छ भन्ने गीतमा देखाइएको निर्देशक भट्टराईले बताए ।

‘बलात्कार जस्तो जघन्य अपराधमा पनि अनुसन्धानमा लापरबाहीका कारण समाजलाई कसरी गाँजेको छ। अपराधी खुलेआम हिँड्दा पीडितको मानसिक अवस्थाका कारण जुन विद्रोह जन्माउँछ । त्यो विद्रोहले स्वभाविक रूपमा प्रस्तुत हुन्छ भन्ने गीतमा देखाइएको छ,’ उनले भने, ‘पीडितले न्याय नपाउँदा ऊ आफैँ न्यायका लागि विद्रोह गर्छ, त्यो अवस्थाको सिर्जना राज्यले नै गरेकाले त्यसबाट निस्किने नतिजाको जिम्मेवारी लिनुपर्छ भन्ने उद्देश्यले सामाजिक चेतनाका रुपमा यो गीत निर्माण भएको छ ।’

महानायक हमालले सामाजिक अन्यायविरुद्ध फरक किसिमको गीति चलचित्रमा काम गरेकाले यसले राम्रो सन्देश दिने बताए । ‘सामाजिक न्यायका लागि यो गीति चलचित्रले सकारात्मक सन्देश दिन्छ भनेरै यसमा काम गरेको हुँ,’ उनले भने । गीत २० देखि २५ मिनेटसम्म लामो हुने र पुसभित्र रिलिज गर्ने तयारी गरिएको छ ।

प्रकाशित मिति: बुधबार, पुस ७, २०७८ १७:४४