नेप्सेमा ९२ अंकको वृद्धि, शेयर बेच्न अझै तयार भएनन् लगानीकर्ता

A+ A A-

नेप्से सूचक ९२ अंकले बढेर बुधबारको शेयरबजार हरियाली बन्न पुग्यो । मंगलबारबाटै बढ्न सुरु गरेको बजारले बुधबार पनि निरन्तरता पाउँदै दुई दिनमै नेप्से १ सय ४८ अंकले बढ्न पुग्यो ।

नेप्से बढे पनि शेयरबजारमा कारोबारीहरूको संख्या भने बढ्न सकेको छैन । बुधबार नेप्से सूचक २५०७.७० अंकमा आइपुग्दा ४ अर्ब ५२ करोड रुपैयाँको मात्रै शेयर कारोबार भएको छ । मंगलबार ५६ अंकले नेप्से बढ्दा पनि कारोबार रकम भने २ अर्ब ३८ करोड रुपैयाँ मात्रै थियो ।

नेप्से सूचक बढेसँगै आक्रामक रूपमा शेयर किनबेचमा उत्रिने लगानीकर्ता सुस्ताएको देखिएको छ । नेप्सेले सर्किट हान्दा होस् या झण्डै एक सय अंकले बढ्दा होस् कारोबारमा लगानीकर्ता खासै उत्साहित देखिएका छैनन् । एकैदिन २२ अर्बसम्मको कारोबार हुने बजारमा अहिले दैनिक दुईदेखि चार अर्ब रुपैयाँको हाराहारीमा मात्रै शेयर कारोबार भइरहेको छ । यद्यपि, मंगलबारको कारोबारको अवस्थालाई मात्रै हेर्ने हो भने आजको कारोबारमा केही सुधार भने पक्कै देखिएको छ ।

इन्भेष्टर फोरमका निवर्तमान अध्यक्ष चन्द्रसिंह साउद बजारमा नेप्से झण्डै ८ सय अंकले झरेपछि लगानीकर्ता 'स्टप लस'मा गएको बताउँछन् । साउदका अनुसार बजार धेरै घटेकाले पनि लगानीकर्ता लामो समयका लागि बिक्री रोकेर बस्ने मनसायमा पुगेका हुन् । जसले गर्दा नेप्से बढे पनि शेयर बेच्न लगानीकर्ता तयार छैनन् ।

यसरी लगानीकर्ता बिक्री गर्न नहतारिनु र बुलिसलाई पर्खनुले पनि शेयरबजार थप बढ्न सघाउने लगानीकर्ताको तर्क छ । बजार केही दिनमाथि गएको खण्डमा भने लगानीकर्ता नाफा बुक गर्नेतर्फ लाग्ने र फेरि पुरानै लयमा कारोबार रकम फर्कने उनीहरूको बुझाइ छ ।

आज कारोबारमा आएका २ सय ३३ कम्पनीको ८१ लाख ४ हजार ३ सय १९ कित्ता शेयर मात्रै खरिदबिक्री भएको छ । सामान्यतया नेप्से सूचक शेयरको माग बढेसँगै बढ्ने र घट्दा सूचक पनि घट्ने गर्छ । तर, माग बढेअनुसार बजारमा शेयर प्रवाह नहुँदा नेप्से बढे पनि कारोबार रकम सोही अनुरुप बढ्न सक्दैन । आजको बजारले पनि त्यस्तै अवस्था देखाएको छ । बजारमा किन्ने लगानीकर्ताको उपस्थिति बाक्लै देखिए पनि बेच्ने लगानीकर्ता न्यून नै देखिए । साउद बजारमा स्ट्रोङ बार्गेनिङ चलिरहेका कारण पनि कारोबार रकम बढ्न नसकेको बताउँछन् ।

बजार पहिलेबाटै बुलिस ट्रेण्डमा रहे पनि नियामक निकाय र राजनीतिक दल नेतारहरूका अभिव्यक्तिले प्रभाव पार्दा बजार घट्न थप सघाएको बताउँदै साउद बजार बुलिस ट्रेण्डमै रहेको बताउँछन् । उनले भने, ‘केही करेक्सन आएको पक्कै हो तर करेक्सन आइरहँदा नियामक निकायको शेयरबजारप्रतिको अनुदार नीति र राजनीतिक दलको पुँजीबजार विरोधी अभिव्यक्तिले बजार थप घटायो ।’ बजारप्रति नकारात्मक सूचना बाहिँरिदा लगानीकर्ताको मनोबल खस्केकै कारण बजार केही तल पुगे पनि बुलिस ट्रेण्ड भने नसकिएको उनको भनाइ छ ।

त्यसो त मंगलबार र बुधबारको बजार ट्रेण्डको टर्निङ प्वाइन्ट बनेको देखिएको छ । मंगलबार ५६ अंकले बढेको बजार बुधबार पनि ९२ अंकले बढ्न पुग्यो । आज बजारमा १ सय ८६ कम्पनीको शेयरमूल्य बढेको छ । समूहगत रूपमा सबै समूहको सूचक बढ्दा कारोबारमा आएका अधिकांश कम्पनीको शेयरमूल्य बढ्न पुगेको हो । जसमा अरुण भ्याली हाइड्रो, बरुण हाइड्रो, माथिल्लो तामाकोशी जलविद्युत र शिवम् सिमेन्टको सकारात्मक सर्किट लाग्दै १० प्रतिशतले शेयरमूल्य बढेको छ भने अन्य ६ कम्पनीको सर्किट लेबलमा नै शेयरमूल्य बढेको छ । बढेको बजारमा गार्खाज् फाइनान्स र सर्पोट माइक्रो फाइनान्सको शेयरमूल्य भने घटेको छ ।

यस्तै कारोबारका आधारमा भने हिमालयन डिस्टिलरीको सबैभन्दा धेरै शेयर किनबेच भएको छ । यो कम्पनीको ६८ करोड रुपैयाँको शेयर कराोबार भयो भने माथिल्लो तामाकोशीको १५ करोड र अरुण हाइड्रोको १३ करोड रुपैयाँको शेयर कारोबार भएको छ ।

प्रकाशित मिति: बुधबार, पुस ७, २०७८ १६:१५