माओवादीको केन्द्रीय कमिटीबाट यसरी बिदा हुँदैछन् पुराना नेता

A+ A A-

माओवादीको अन्तरिम विधानले राष्ट्रिय सम्मेलनबाट बन्ने केन्द्रीय कमिटीका लागि महिला, दलित, मुस्लिम र युवाका लागि कोटा छुट्याएको छ । अबको २ सय ९९ सदस्यीय केन्द्रीय कमिटीमा यी कोटाबाहेकले भने खुला प्रतिस्पर्धाबाट आउनुपर्नेछ ।

पार्टी संगठनलाई समावेशी मात्र होइन, नेतृत्व विकासका लागि पनि कोटा निर्धारण गरेकाे दाबी माओवादीले गर्दै आएको छ । नेकपा विभाजन भयो, त्यसपछि तयार पारिएको अन्तरिम विधानले २ सय ९९ सदस्यीय केन्द्रीय कमिटी बनाउने निर्णयसँगै कोटा निर्धारण गरेको हो ।

माओवादीको अन्तरिम विधान २०७८ को धारा १६ (४ क) र धारा ३८(१–८) अनुसार २ सय ९९ सदस्यीय केन्द्रीय कमिटीमा महिला ३५ प्रतिशत, युवा २० प्रतिशत, दलित १५ प्रतिशत, मुस्लिम ५ प्रतिशत हुनेछन् । त्यसरी हेर्दा माओवादीको राष्ट्रिय सम्मेलनपछिको केन्द्रीय कमिटीमा दलित समुदायबाट कम्तीमा ४५ जना हुनेछन्, त्यसभित्र पनि महिला १३ जना, युवा महिला ३ जना, युवा ६ जना र खुला २३ जना हुनेछन् ।

माओवादीले गरेको व्यवस्थाअनुसार अबको केन्द्रीय कमिटीमा मुस्लिम १५ जना सदस्य निर्वाचित हुनेछन् र त्यसरी निर्वाचित गर्दा महिला ४ जना, युवा महिला १ जना, युवा २ जना र खुल्ला ८ जना पर्नेछन् । अनि, युवाबाट ४८ जना निर्वाचित हुनेछन् । ती ४५ जनाभित्र पनि महिला १७ र पुरुष ३१ जना समेटिनेछन् ।

माओवादीको २ सय ९९ सदस्यीय केन्द्रीय कमिटीमध्ये दलित र मुस्लिमको कोटाबाहेक अन्यबाट २ सय ३९ जना हुनेछन् । जसबाट महिला ६७ जना, युवा महिला १७ र युवा ३१ जना केन्द्रीय कमिटीमा आउनेछन् भने खुला कोटाबाट १ सय २४ जना केन्द्रीय कमिटीमा आउनेछन् ।

माओवादीको विधानअनुसार खसआर्य, मधेसी, थारु, आदीवासी जनजाति, अपाङ्गता भएका व्यक्तिहरू सबै खुला कोटाबाट आउनेछन् । यसरी हेर्दा, माओवादीको १ सय ७९ सदस्यीय केन्द्रीय कमिटीमा दलित, महिला, मुस्लिम, युवाहरूबाहेक १ सय ३१ जना केन्द्रीय कमिटी सदस्य छन् ।

माओवादीको विधानले निर्धारण गरेको कोटाका कारण खुलाबाट १ सय २४ जना निर्वाचित हुनेछन् । त्यसअर्थमा अहिले खुला कोटामा रहेका १ सय ३१ सदस्यहरू दोहिरने अवस्थामा पनि कम्तीमा ६ जना नेता बाहिर पर्ने अवस्था देखिन्छ । त्यसबाहेक अहिले केन्द्रीय कमिटीमा रहेका नेताभन्दा बाहिरबाट पनि खुला कोटामा ल्याउनुपर्ने अवस्थामा ६ जनाको संख्या बढ्ने सक्ने देखिन्छ ।

प्रकाशित मिति: बुधबार, पुस ७, २०७८ १४:४२