पदाधिकारीका लागि माओवादीमा मारामार, महासचिवमा पुन र शर्माकाे द्वन्द्वले महराकाे पल्ला भारी

पदाधिकारीका लागि माओवादीमा मारामार, महासचिवमा पुन र शर्माकाे द्वन्द्वले महराकाे पल्ला भारी

A+ A A-

नेकपा माओवादी केन्द्रको राष्ट्रिय सम्मेलनबाट अध्यक्षसहित पदाधिकारीहरू चयन हुँदैछन् । साउनमा माओवादी केन्द्रको स्थायी कमिटी बैठकले संशोधन गरेको विधानअनुसार उपाध्यक्ष, महासचिव, उपमहासचिव र सचिवसम्मको व्यवस्था गरेको छ ।

त्यसकारणले पनि पदाधिकारीका आंकाक्षीहरूको संख्या बढ्दो छ । विगतमा माओवादीमा उपमहासचिवको व्यवस्था थिएन । माओवादीले ०६९ को हेटौँडा महाधिवेशनबाट उपाध्यक्ष, महासचिव, सचिव र कोषाध्यक्षको व्यवस्था गरेको थियो ।

खासमा नेताहरूको व्यवस्थापनका लागि उपमहासचिवको व्यवस्था गरेको देखिन्छ । अहिले अध्यक्षमा प्रचण्डको विकल्प नभए पनि उपाध्यक्षदेखि सचिवसम्मका पदमा भने माओवादीभित्र ठूलो संख्या प्रतिस्पर्धामा देखिन्छ ।

माओवादीका पुराना नेताहरू दीनानाथ शर्मा, गणेश साह र रामकुमार यादवलगायतका केही नेताहरू पदाधिकारीको दौडमा देखिएका छैनन् । उनीहरू उमेरले ७५ वर्ष कटिसकेका कारण पनि पदाधिकारीका आकांक्षी छैनन् ।

०६२ मा केन्द्रीय कमिटीमा रहेका ३५ जना नेताहरू नै अहिले पदाधिकारीका दाबेदार हुन् । त्यतिबेलामा ३५ जनामध्ये बाबुराम भट्टराई, मोहन वैद्य किरण, सीपी गजुरेल, रामबहादुर थापा बादल, लेखराज भट्ट, टोपबहादुर रायमाझी, हिसिला यमीलगायत नेताहरू बाहिरिइसकेका कारण पुराना नेताहरूमध्ये अधिकांशलाई पदाधिकारीमा समेट्न सकिने आकलन माओवादीभित्र भइरहेको छ ।

उपाध्यक्षमा कम्तीमा तीन जना नेताहरू समेटिने सम्भावना छ । उपाध्यक्षमध्ये वरिष्ठ उपाध्यक्ष पद नारायणकाजी श्रेष्ठका लागि सुरक्षित ठानिएकाे छ । अध्यक्षमा प्रचण्ड र उपाध्यक्षमा श्रेष्ठको विकल्प तत्काल माओवादीभित्र देखिएको छैन । त्यसबाहेक पदाधिकारीमा उक्लिने नेतृमा पम्फा भुसाल पनि छिन् । भुसाल अहिले महासचिवको दाबेदारको रूपमा देखिएकी छिन् ।

महासचिवका आकांक्षीको संख्या धेरै भएकाले भुसाल कहाँ समेटिन्छिन् भन्न सकिँदैन । तर, महासचिव नभएको अवस्थामा उपाध्यक्षमा समेटिन सक्ने माओवादी नेताको भनाइ छ । भुसालजस्तै देव गुरुङ पनि पदाधिकारीमा समेटिने नेता हुन् ।

एक माओवादी नेताको भनाइमा माओवादी केन्द्रको प्रमुख सचेतकसमेत रहेका गुरुङ सम्भवत: उपाध्यक्षमा समेटिनेछन् । महासचिवमा भुसालबाहेक नेताहरू वर्षमान पुन, जनार्दन शर्मा, गिरिराजमणि पोखरेल प्रमुख दाबेदारका रूपमा देखिएका छन् ।

यी चार नेताले महासचिवमा दाबी गरे पनि कृष्णबहादुर महरा बलियाे सम्भावना रहेकाे दाबेदारका रूपमा देखिएका छन् ।स्वास्थ्य समस्याका कारण चीनमा उपचाररत पुन महासचिवकै दाबीका लागि उपचार छोट्याएर आउने चर्चा माओवादीभित्र चलिरहेको छ ।

यद्यपि, उनी अहिलेसम्म नेपाल आइसकेका छैनन् । पुन, शर्मा र पोखरेलले यसअघि माओवादीमा सचिवका रूपमा काम गरिसकेका छन् । त्यसैले स्वाभाविक दाबेदारको रूपमा देखिएका हुन् । हेटौँडा महाधिवेशनपछि महासचिवमा पुनले निकै प्रयास गरेका थिए । तर, महराका अघि पुनको जोर नचलेपछि पुन सचिवमा बसेका हुन् । अहिले पनि उनलाई स्वास्थ्यले धोका दिएको छ ।

यता, शर्मा भने देशव्यापी सम्पर्क र सम्बन्ध विस्तारमा लागेका छन् । संगठन विभाग प्रमुख भएका कारण पनि शर्मा पार्टी संरचनामा आफूलाई बलियो बनाउने प्रयासमा जुटेका छन् । भ्रातृ संगठन र पार्टी संगठनमा शर्माले आफ्नो पकड बनाउने प्रयास गरिरहेका छन् ।

वाईसीएलको नेतृत्व चयनमा पनि शर्मा र पुन समूहबीच शीतयुद्ध चलेको थियो । अन्तिममा प्रचण्डले पुननिकट सुमन देवकोटालाई संयोजक बनाए । यता, विद्यार्थी संगठनको नेतृत्वमा पनि त्यही संकेत देखिएको थियो ।

त्यहाँ भने प्रचण्डले शर्मानिकट पञ्चा सिंहलाई अध्यक्ष बनाए । तर, प्रेस सेन्टरमा शर्मा पक्ष हावी हुन सकेको छैन भने पार्टीको बागमती प्रदेश अध्यक्षमा पनि शर्मा पक्षका अध्यक्षका दाबेदार पराजित भए ।

त्यसैले शर्मा अहिले जसरी पनि महासचिव हुने दाउमा लागेका छन् । तर, महराले महासचिवमा दोहोरिन चाहेको अवस्थामा शर्मा र पुनका लागि निकै दरिलो तगारो बन्ने स्थिति छ । महरा आफैँ भने पूर्वमाओवादीकाे एकता गरेर महासचिवमा आफूभन्दा पनि नेत्रविक्रम चन्द विप्लवलाई ल्याउन चाहन्छन् ।

केही दिनअघि शिलापत्रसँगको कुराकानीमा महराले एकताका लागि वार्ता भइरहेको तर परिणाम आइनसकेको बताएका थिए । प्रचण्डकै रणनीतिअनुसार पूर्वमाओवादीलाई एक बनाउने प्रयासमा महरा जुटेका हुन् । त्यसैले विप्लव महासचिव बन्ने गरी पूर्वमाओवादीको एकता नभएको अवस्थामा महरा नै दोहोरिन सक्ने आँकलन पनि माओवादीमा भइरहेको छ ।

यता, पोखरेल भने नारायणकाजी श्रेष्ठनिकट भएकाले महासचिवको दाबीमा त छन् तर उनलाई प्रचण्डले उपमहासचिवमा समेट्न सक्ने एक माओवादी नेताले बताए । महरा महासचिव भएको अवस्थामा भने पुन र शर्मा पनि उपमहासचिवमा समेटिन सक्छन् ।

यद्यपि, एमाले र कांग्रेसमा दोस्रो पुस्ताका नेताहरू महासचिव र महामन्त्रीमा निर्वाचित भएका कारण माओवादीभित्र पनि दोस्रो पुस्तालाई महासचिव बनाउनुपर्ने दबाब बढेको छ ।

पदाधिकारीका आकांक्षीमा हरिबोल गजुरेल र मातृका यादव पनि हुन् । मधेसी समुदायबाट यादव पदाधिकारीमा अटाउनुपर्ने नेता पनि हुन् । उमेरकै कारण गणेश साह माओवादीमा पदाधिकारीभन्दा पनि सल्लाहकार कमिटीतिर समेटिने भएका कारण पनि यादव बलियो दाबेदार हुन् । यता, शक्ति बस्नेत र चक्रपाणि खनाल, हितमान शाक्य पनि पदधिकारीमा दाबेदार देखिएका छन् ।

उनीहरू सचिवमा समेटिन सक्ने नेताहरू हुन् । त्यसो त, समावेशी प्रतिनिधित्वका लागि महिला, दलित, मुस्लिम, मधेसी, जनजातिलाई पनि पदाधिकारीमा समेट्नुपर्ने बाध्यतामा माओवादी देखिएको छ ।

तुलनात्मक रूपमा स्थायी कमिटीमा जनजाति नेताहरू बढ्ता भएका कारण पदाधिकारीमा पनि उनीहरू उक्लिने सम्भावना छ । तर, माओवादीको पदाधिकारीमा सुदूरपश्चिम प्रदेशबाट पनि प्रतिनिधित्व हुने सम्भावना न्यून छ । लेखराज एमालेमा प्रवेश गरेपछि सुदूरपश्चिममा खगराज भट्टले कमाण्ड सम्हालेका छन् । उनी स्थायी कमिटीसम्म उक्लिन सक्छन् । महिलाबाट अञ्जना विसंखे, शशि श्रेष्ठ, अमृता थापा, जयपुपरी घर्ती, ओनसरी घर्तीलगायतका नेतृहरू पदाधिकारीको दाबेदारीमा छन् । उनीहरूमध्ये केहीलाई सचिवमा अटाउनैपर्ने बाध्यता माओवादीमा देखिन्छ ।

प्रकाशित मिति: बुधबार, पुस ७, २०७८ १४:१६