आठ दिनपछि भेटिए चन्द्रे कामी, यस्तो थियो नालीबेली

A+ A A-

अन्तर्जातीय विवाहपछि केटी पक्षले बेपत्ता पारेको भनिएका हुम्लाका चन्द्रे कामी फेला परेका छन् । बेपत्ता भएको आठ दिनपछि उनी फेला परेका हुन् । गत २९ मंसिरदेखि सम्पर्कविहीन भएका उनलाई प्रहरीले हुम्लाकै खार्पुनाथ गाउँपालिकामा बुधबार बिहान फेला पारेको हो ।

खार्पुनाथमा हिँडिरहेको अवस्थामा उनलाई फेला पारिएको जिल्ला प्रहरी कार्यालय हुम्लाका प्रहरी निरीक्षक दानसिंह भण्डारीले जानकारी दिए । उनका अनुसार चन्द्रे सकुशल भेटिएका छन् । उनको खोजीका लागि ठूलो संख्यामा प्रहरी परिचालन भएको थियो ।

के थियो घटना ?

जातकै कारण मागी विवाह सम्भव नहुने निचोडमा पुगेर १८ वर्षका चन्द्रे र मुगुकी १७ वर्षीया रमिला मल्ल (सुन्तली)ले ५ मंसिरमा भागेर विवाह गरेका थिए । केटी पक्षले छुटाउने डरले चन्द्रे र सुन्तली घरतिर नगएर छिमेकी गाउँमा गएर बसे । सोरु गाउँपालिकाका प्रमुख प्रशासकीय अधिकृत लालबहादुर मल्लका अनुसार, चन्द्रेको गाउँ जैरबाट सुन्तलीको गाउँ सोरु–४, लिब्रु तीनरचार घण्टाको दूरीमा छ ।

मुगुस्थित एक होटलमा काम गर्दा चन्द्रेको भेट तीन वर्षअघि सुन्तलीसँग भएको थियो । त्यस बेलादेखि नै उनीहरू प्रेम सम्बन्धमा रहेको केटा पक्षको भनाइ छ । मंसिर लागेपछि दुवै जनाले सहमतिमै बिहे गरेका थिए ।

लुकेर बसेकै बेला चन्द्रेले आफ्नो घर रहेको सर्केगाड गाउँपालिका–१ का वडा अध्यक्ष गोकुल बुढालाई फोन गरेर विवाह दर्ता गरिदिन आग्रह गरे । वडा अध्यक्षले २० वर्षमुनिको विवाह दर्ता नहुने जवाफ दिए । अनि, २४ मंसिरमा सुन्तलीलाई लिएर चन्द्रे जैरस्थित आफ्नो घर फर्के ।

परिवारका काइँला छोरा चन्द्रेका बुबाआमासहित तीन दाइ, भाइजूहरू र एक भाइ छन् । नातामा चन्द्रेका दाइ गगन लोहारका अनुसार, गएकाे बुधबार मध्यरातमा २० जना जतिको समूह एकाएक जैर पस्यो । उनीहरूमध्ये केही चन्द्रेको घरभित्र छिरे भने कसैले छिमेकीको घरबाहिरका ढोका लगाइदिए ।

चन्द्रेको परिवारका अन्य सदस्य सुतेको कोठाको ढोका पनि बन्द गरिदिए । र, उनीहरूले चन्द्रे र सुन्तलीलाई घरबाट लिएर गए । ‘चन्द्रेलाई लैजानुअघि उनीहरूले कुटपिट गरेका थिए । होहल्ला सुनेपछि ढोका तोडेर बाहिर निस्केका एक छिमेकीको भनाइ उद्धृत गर्दै वडा अध्यक्ष गोकुल बुढाले शिलापत्रसित भनेका छन्, ‘परबाट हेर्दा चन्द्रेका दुवै हात बाँधिएको थियो । ऊ नाङ्गै थियो ।’

त्यसपछि चन्द्रे सम्पर्कमा नआएकाे परिवारकाे दाबी थियाे । सुन्तलीले पनि चन्द्रेको अवस्थाबारे अनभिज्ञता प्रकट गरेकी थिइन् । तर बेपत्ता भएकाे आठ दिनपछि चन्द्रे भेटिएका हुन् । याे बीचमा चन्द्रे कहाँ थिए भन्ने खुल्न बाँकी छ । प्रहरी निरीक्षक भण्डारीले भने, 'फाेन सम्पर्क हुन नसक्दा घरमा खबर गर्न नसकेकाे भन्ने छ । थप हामी बुझ्दैछाैँ ।'

प्रकाशित मिति: बुधबार, पुस ७, २०७८ १०:२१