संसदमा मेरो उपस्थितिले केपी ओलीको सातो गएको छ, जाओस् : माधव नेपाल

A+ A A-

एकीकृत समाजवादीका अध्यक्ष माधवकुमार नेपालले संसदमा आफ्नो उपस्थितिले एमाले अध्यक्ष केपी शर्मा ओलीको सातो गएको बताएका छन् ।

मंगलबार पोखरामा आयोजित पार्टीको गण्डकी प्रदेशस्तरीय प्रशिक्षण कार्यक्रममा उनले संसदमा संविधानको सम्मान गर्ने नारा लगाए पनि एमालेले कहिल्यै सम्मान नगरेको दाबी गरे । एमालेले संसदीय मर्यादाको समेत पालना नगरेको उनको आरोप थियो ।

संसदमा आफ्नो उपस्थितिले ओलीको सातो गए पनि आफूहरूको ध्येय भने कम्युनिस्ट आन्दोलन र नेपाल राष्ट्रको गरिमालाई उचो बनाउनु रहेको उनले बताए ।

‘कमसेकम मेरो उपस्थितिले केपी ओलीको सातो गइरहेको छ । सातो जाओस् । केही मतलब छैन । नेपाली जनताको सातो कायम रहनुपर्छ,' नेपालले भने, 'नेपाल राष्ट्रको गरिमामाथि उठ्नुपर्छ । कम्युनिस्ट आन्दोलन जोगिनुपर्छ । कम्युनिस्ट आन्दोलनलाई लोकप्रिय बनाउनुपर्छ । हाम्रो ध्येय यही नै हो ।'

एमालेले संसदीय मर्यादाको पनि पालना नगरेको नेपालले बताए ।

'संसद बैठकहरूमा आउँछन्, नारा लगाउन सुरु गर्छन् । नारा लगाउन सिकाएको हो कि क्या हो ? नारा लगाइरहेका विषयहरू के–के छन् ? नारामा भनिएका कुरा सुन्नुस्त । नम्बर एक–संसदीय मर्यादा पालना गर । ओली गुटले मर्यादा पालना गरेको छ ?,' उनले भने ।

एमालेले संसदबाट आफूहरूलाई हटाउन दबाब दिए पनि त्यो अधिकार कसैलाई नरहेको नेपालले जिकिर गरे । एमालेले आफूहरूलाई शत्रु घोषणा गरेको उनको भनाइ थियो ।

'नेकपा (एमाले) त्यो हाम्रो सबैभन्दा पहिलो प्रतिद्वन्द्वी पार्टी बन्न पुगेको छ । उसले हामीलाई शत्रु घोषणा गरेको छ । हाम्रो अनुहार पनि हेर्दिनँ भनेको छ । तर कस्तो संयोग, नेपाली कांग्रेसको कार्यक्रममा अनुहार हेर्दै जानुपरेको छ । रमाइलो भाछ । भनेपछि नेपाली कांग्रेसको कार्यक्रममा आउन हुने, एउटै स्टेजमा बस्न पनि हुने, तर अन्य ठाउँमा हामीलाई छुवाछुतको व्यवहार गर्ने,' नेपालले भने ।

प्रकाशित मिति: मंगलबार, पुस ६, २०७८ १७:३३