पोखरा पुगेर माधव नेपालले भने- सभामुखज्यू तपाईं एक्लो हुनुहुन्न, हामी साथमा छौँ

पोखरा पुगेर माधव नेपालले भने- सभामुखज्यू तपाईं एक्लो हुनुहुन्न, हामी साथमा छौँ

A+ A A-

एकीकृत समाजवादीका अध्यक्ष माधवकुमार नेपालले प्रतिनिधिसभाका सभामुख अग्निप्रसाद सापकोटाको साथमा आफ्नो पार्टी रहेको बताएका छन् ।

पार्टीको गण्डकी प्रदेश कमिटीले मंगलबार पोखरामा आयोजना गरेको प्रदेशस्तरीय कार्यकर्ता प्रशिक्षणमा उनले कानुनको शासन पालना गर्ने र संविधानको सर्वोच्चताको स्वीकार गर्नेहरूले सर्वोच्च अदालतको फैसला स्वीकार गर्नुपर्ने बताए ।

'सभामुखज्यू तपाईं एक्लो हुनुहुन्न, तपाईंको साथमा हामी पनि छौँ । दृढताका साथ अगाडि बढनुहोस्,' नेपालले भने ।

तत्कालीन एमाले पार्टीबाट विद्रोह गरेर कम्युनिष्ट आन्दोलन जोगाउन र बचाउन कानुनको आधारमा साहसिक कदम चालेको नेपालको दाबी छ । नेपालको राजनीतिमा कम्युनिष्ट पार्टीलाई स्थापित गर्दै मार्क्सवाद र लेनिनवादप्रति पूर्ण प्रतिबद्ध रहेर कम्युनिष्ट मूल्य, मान्यता र सिद्धान्तलाई आत्मसात् गरी बेतिथि, गरिबीलाई समाप्त गरेर सुन्दर समाजको निर्माणमा आफ्नो पार्टी लाग्ने उनले बताए ।

'भिन्न चरित्रको पार्टी बनाउने, क्रान्तिकारी चरित्र, सुसंस्कार बोकेको, आदर्शप्रति प्रतिबद्ध, निष्ठाको राजनीति गर्ने जनताको सेवाको भावनाबाट उत्प्रेरित पार्टी बनाउनका लागि आफैँले यसअघि बनाएको पार्टीबाट विद्रोह गर्नुपरेको हो,' उनले भने ।

श्रम, रोजगार तथा सामाजिक सुरक्षामन्त्री किसान श्रेष्ठले गण्डकी प्रदेशमा आगामी दिनमा एकीकृत समाजवादीलाई पहिलो पार्टीका रूपमा स्थापित गरिने बताए । अहिलेका मन्त्रिपरिषद्का सदस्यले जनमुखी काम गरेको उनको दाबी थियो ।

रासस ।

प्रकाशित मिति: मंगलबार, पुस ६, २०७८ १६:४७