एमाले सांसदलाई सभामुखले भने- माननीयज्यू, अदालतमा विचाराधीन मुद्दामा छलफल गर्न संविधानले बन्देज गरेको छ

एमाले सांसदलाई सभामुखले भने- माननीयज्यू, अदालतमा विचाराधीन मुद्दामा छलफल गर्न संविधानले बन्देज गरेको छ

A+ A A-

सभामुख अग्निप्रसाद सापकोटाले अदालतमा विचाराधीन मुद्दाको न्याय निरुपणमा प्रतिकूल असर पर्ने गरी प्रमुख प्रतिपक्ष दल नेकपा एमालेले संसद अवरुद्ध गरिरहेको बताएका छन् ।

सापकोटाले अदालतमा विचाराधीन मुद्दाका विषयमा संसदमा छलफल गर्न नपाउने संवैधानिक प्रबन्ध रहेको उल्लेख गर्दै एमालेलाई सचेत गराए ।

'नेपालको संविधान धारा १ को ५ ले अदालतमा विचाराधीन मुद्दाहरूका सन्दर्भमा न्याय निरुपणमा प्रतिकूल असर पार्ने विषयमाथि संघीय संसदको कुनै सदनमा छलफल गर्न बन्देज गरेको कुरा पुनः स्मरण गराउन चाहन्छु,' सापकोटाले भने ।

मंगलबारको प्रतिनिधिसभा बैठकमा पनि एमालेका सांसदहरूले नाराबाजीसहित अवरोध गरेपछि सापकोटाले आफ्ना असहमतिका विषय संसदमै राखेर अघि बढ्न पटकपटक आग्रह गरे ।

'सभाको नियमित प्रक्रियामा प्रवेश गरी आफ्ना असहमतिलाई राख्न अनुरोध गर्दछु । माननीय सदस्यहरू सभाको बैठकलाई सुव्यवस्थित तरिकाबाट सञ्चालन गर्न आ–आफ्नो आसनग्रहण गरिदिन र नेपालको संविधानअनुसार बैठक सञ्चालनमा आवश्यक सहयोग गर्न अनुरोध गर्दछु,' एमाले सांसदलाई सापकोटाको आग्रह थियो ।

राष्ट्रहितको कैयन् विषयमा आवश्यक निर्णय गरेर अघि बढाउनुपर्ने संसद अवरुद्ध पारेर एमालेले संसदीय विधि र प्रक्रियाविपरीत काम गरिरहेको बतए ।

‘परिस्थति र परिवेश सधैँ एकै रहँदैन । समसामयिक राजनीतिक परिस्थितिलाई राष्ट्रिय हितमा ध्यान राखी कार्य सम्पादन गर्नु र सरकारलाई गर्न लगाउनु संसदको प्रमुख कर्तव्य पनि हो,' सापकोटाले भने, 'उल्लेखित विषयवस्तु मनन गर्दै सहज सभा सञ्चालनमा सहयोग गर्न सम्पूर्ण माननीय सदस्यहरूको ध्यानाकर्षण गर्दछु ।'

आफूलाई सांसदहरूले जनताका कुरा बोल्न पाउनुपर्छ भनेको उनको भनाइ थियो । 'मलाई धेरै माननीय सदस्यहरूले जनताका कुराहरू बोल्न पाउनुपर्छ भनेर मेरो धेरै चोटि ध्यानाकर्षण गराउनुभएको छ,' सापकोटाले भने ।

प्रकाशित मिति: मंगलबार, पुस ६, २०७८ १५:५३