चार दिन निरन्तर घटेको नेप्सेमा मंगलबार ५६ अंकको वृद्धि, टर्निङ प्वाइन्ट बन्ला आजको कारोबार ?

चार दिन निरन्तर घटेको नेप्सेमा मंगलबार ५६ अंकको वृद्धि, टर्निङ प्वाइन्ट बन्ला आजको कारोबार ?

A+ A A-

निरन्तर चार दिनदेखि घटेको शेयरबजारमा आजको कारोबारले भने लगानीकर्तामा आशा जगाएको छ । गत हप्ताबाट दोहोरो अंकले घटिरहेको नेप्से सोमबार पनि घटेको थियो, यद्यपि मंगलबार भने ५६ अंकले बढ्न पुगेको छ ।

मंगलबार नेप्से सूचक ५६.७३ अंकले बढेर २४१५.५५ अंकमा बन्द हुँदा सेन्सेटिभ परिसूचक पनि ११.३४ अंकले बढेर ४६२.५२ अंकमा पुगेको छ । कारोबारमा आएका २ सय २६ कम्पनीको ४ ९ लाख ७४ हजार २ सय ५३ कित्ता शेयर २ अर्ब ३८ करोड ३२ लाख ५९ हजार ८ सय ४७ रुपैयाँमा किनबेच भएको हो ।

नेप्से सूचक दोहोरो अंकले बढेर अधिकांश कम्पनीले शेयरमूल्य बढाइरहँदा शेयर खरिदबिक्रीमा भने लगानीकर्ताको आकर्षण अझै बढेको पाइँदैन । दैनिक २२ अर्बसम्म कारोबार हुने बजारमा अहिले २ अर्बको हाराहारीमा शेयर कारोबार हुनुले पनि लगानीकर्तामा बढ्दो निराशालाई पुष्टि गरेको पाइन्छ ।

कारोबार रकम नबढे पनि नेप्से सूचक बढेसँगै आज कारोबारमा आएका सबै समूह हरियाली बनेका छन् । जसमा अन्य, जलविद्युत् विकास बैंकलगायत समूहका सूचक सबैभन्दा धेरै बढेका छन् । यता कम्पनीगत रूपमा भने १ सय ८० कम्पनीले शेयरमूल्य बढाएका छन् । जसमा ग्रीन डेभलपमेन्ट बैंकको शेयरमूल्यमा सकारात्मक सर्किट लागेको छ भने जानकी फाइनान्स र रसुवागढी हाइड्रोको शेयरमूल्य सर्किट लेबलमा नै बढ्न पुगेको छ ।

यता बढेको बजारमा पनि छवटा कम्पनीहरूको शेयरमूल्य भने घटेको छ । जसमा गोर्खाज फाइनान्सको ८.८९ प्रतिशतले शेयरमूल्य घटेको छ भने बाँकी ५ कम्पनीको शेयरमूल्य २ प्रतिशतभन्दा धेरैले घट्न पुगेको छ ।

कारोबारमा लगानीकर्ता अनिच्छुक देखिइरहँदा पनि हिमालय डिस्टिलरी, नबिल बैंक, एनटीसीलगायतका कम्पनीको शेयर किनबेचमा भने लगानीकर्ताको भिड नै देखियो । आज सर्वाधिक कारोबार हुनेमा हिमालयन डिस्टिलरी अगाडि छ । यो कम्पनीको १४ करोड मूल्यबराबरको शेयर किनबेच भयो भने नबिल बैंकको पनि १४ करोडकै शेयर किनबेच भयो । यता एनटीसीको भने १० करोड रुपैयाँको शेयर किनबेच भयो ।

आजको कारोबारलाई लिएर शेयरबजार विश्लेषक विष्णु बस्याल बजारमा लगानीकर्ताको डर हावी हुँदा निरन्तर नेप्से घट्न पुगेको बताउँछन् । उनले अहिलेको बजारको अवस्थालाई लक्षित गर्दै लगानीकर्ताको मनोबल घटिरहेको र अझै केही समय बजार घट्छ भन्ने मनोवैज्ञानिक त्रासका कारण पनि बजारअगाडि बढ्न नसकेको उल्लेख गरेका छन् ।

प्रकाशित मिति: मंगलबार, पुस ६, २०७८ १५:४०