विवेकशील साझा पार्टीबाट मिलन पाण्डे निष्कासित

A+ A A-

विवेकशील साझा पार्टीले पार्टी संयोजक मिलन पाण्डेलाई पार्टीबाट निष्कासन गरेको छ । केन्द्रीय कार्यसम्पादन समितिको मंगलबार बसेको बैठकले संयोजक मिलन पाण्डेलाई पार्टीबाट निष्कासन गर्ने निर्णय गरेको हो ।

पाण्डेमाथि पार्टीलाई गम्भीर क्षति पुर्‍याउने गरी बदनियतपूर्वक पार्टी विधान र केन्द्रीय समितिका निर्णयविपरीतको गतिविधि लगातार जारी राखेको आरोप लगाइएको छ ।

यसअघि पाण्डेलाई २८ मंसिरमा विवेकशील साझाले स्पष्टीकरण सोधेको थियो । पाण्डेलाई ४ पुससम्मको समयसीमा दिएर स्पष्टीकरण सोधेकामा त्यसको एक दिनपछि सोमबार पाण्डेले स्पष्टीकरण दिएका थिए ।

'तपाईंको स्पष्टीकरणमा तपाईंसँग सोधिएका प्रश्नको यथार्थ, तथ्यपरक र चित्तबुझ्दो जवाफ नआएको केन्द्रीय कार्यसम्पादन समितिको ठहर छ,' पाण्डेलाई कारबाही गर्दै विवेकशील साझाले भनेको छ, 'तपाईंले बरु उल्टै पार्टीका निर्णय र नेतृत्वप्रति अनर्गल र भ्रमपूर्ण टिप्पणीसहित निकृष्ट व्यक्तिगत आरोप लगाउने कार्य जारी राखेको र समानान्तर समिति नै घोषणा गरेको देखिन्छ।'

पाण्डेलाई कारबाही गर्दै विवेकशील साझाले भनेको छ, 'पार्टीको केन्द्रीय कार्यसम्पादन समितिको आज मिति २०७८ पुस ६ गते बसेको बैठकले विवेकशील साझा पार्टीको विधान २०७८ को भाग ७ (३१.१) को अधिकार प्रयोग गर्दै तपाईंलाई आजकै मितिदेखि लागू हुने गरी पार्टीको सदस्यसमेत नरहने गरी निष्कासन गर्ने निर्णय गरेको छ ।'